Երեւանի քաղաքապետ․ Մերձավոր Արեւելքում լարված իրավիճակի պատճառով "Երեւան" երիտասարդական նվագախումբը ժամկետից շուտ կվերադառնա Բեյրութից

Արմինֆո. "Ալ Բուստան" փառատոնի շրջանակներում Բեյրութում գտնվող "Երևան" երիտասարդական նվագախումբը նախատեսված ժամկետից շուտ կվերադառնա Հայաստան ՝ նկատի ունենալով Մերձավոր Արևելքում տիրող լարված իրավիճակը: Այդ մասին Facebook-ի էջում հրապարակված տեսաուղերձում հայտարարել է Երևանի քաղաքապետ Տիգրան Ավինյանը։

"Հաշվի առնելով տարածաշրջանում ստեղծված լարված իրավիճակը՝ մենք որոշում ենք կայացրել մեր նվագախումբը Երևան վերադարձնել նախատեսված ժամկետներից շատ ավելի շուտ։ Մենք մշտական շփումների մեջ ենք Լիբանանում մեր դեսպանատան և Լիբանանի ազգային ավիափոխադրողի հետ, որպեսզի հնարավորինս շուտ ապահովենք թռիչքը", - հայտարարել է Ավինյանը։

Քաղաքապետը նաև պատմել է, որ շփվել է Հայաստանի պետական սիմֆոնիկ նվագախմբի գլխավոր դիրիժոր Սերգեյ Սմբատյանի հետ, ով հաստատել է, որ երեխաներն ապահով են և բարձր տրամադրությամբ: Այդ առնչությամբ Ավինյանը ծնողներին հորդորել է չանհանգստանալ,  վստահեցնելով, որ իրենք ամենժամյա ռեժիմով զբաղվում են այդ հարցով: "Մենք համարեցինք, որ սա ամենաօպտիմալ որոշումն է ՝ հաշվի առնելով տարածաշրջանում ստեղծված իրավիճակը", - ամփոփել է քաղաքապետը:

Հիշեցնենք, որ փետրվարի 28-ի առավոտյան ԱՄՆ-ն և Իսրայելը հարձակվել են Իրանի վրա ։ Ի պատասխան ՝ Իրանը հարվածներ է հասցնում Մերձավոր Արևելքում ամերիկյան ռազմակայաններին։ Ամերիկա-իսրայելական ագրեսիայի հետևանքով սպանվել են Իրանի գերագույն առաջնորդ Ալի Խամենեին և իրանցի մի քանի բարձրաստիճան զինվորականներ: Ամերիկյան կողմն առայժմ հաստատել է իր վեց զինվորականների մահը ։ Իրանի հարավային նահանգներից մեկում աղջիկների դպրոցի վրա իսրայելական հարվածի հետևանքով, վերջին տվյալներով, զոհվել են 170 աշակերտ և նրանց ուսուցիչները, ևս տասնյակ մարդիկ վիրավորվել են: Իսրայելը Իրանի ռմբակոծությանը զուգահեռ նաև հարվածներ է հասցնում Լիբանանին։