Քաղաքագետ․ Հայաստանում խորհրդարանական ընտրությունները կդառնան ընտրություն հանրապետությունը պահպանելու և երկիրն, այսպես կոչված, "Արևմտյան Ադրբեջանի" վերածելու միջև

Արմինֆո. 2026 թվականի հունիսի 7-ին Հայաստանում նախատեսված խորհրդարանական ընտրությունները լինելու են ոչ միայն քաղաքական մրցակցություն, այլ՝ ընտրություն Հայաստանի Հանրապետության պահպանման և, այսպես կոչված, "Արևմտյան Ադրբեջան" դառնալու հեռանկարի միջև: Այդ մասին ֆեյսբուքյան իր էջում գրել է քաղաքագետ, քաղաքական մեկնաբան Բենիամին Մաթևոսյանը՝ արձագանքելով Կովկասի մահմեդականների վարչության նախագահ շեյխ-ուլ-իսլամ Ալլահշուքյուր Փաշազադեի հերթական հայտարարությանը։

Նա հիշեցրել է, որ հենց Փաշազադեի արտահայտություններից հետո էր Հայաստանի վարչապետ Նիկոլ Փաշինյանը լայն արշավ ծավալել Հայ Առաքելական Եկեղեցու դեմ:

Մինչդեռ, արդեն այսօր, ինչպես նշել է Մաթևոսյանը, նույն Փաշազադեն տարածքային պահանջներ է ներկայացնում Հայաստանի նկատմամբ, պնդելով, որ Հայաստանի Սյունիքի մարզով ճանապարհի նկատմամբ վերահսկողության հաստատումը առաջնային լուծում պահանջող խնդիր է։

Քաղաքագետը հարց է տվել, թե արդյոք Հայաստանի արտաքին գործերի նախարարությունը կամ Փաշինյանը բողոքի նոտա կհղեն Ադրբեջանին՝ այդ հայտարարությունների առնչությամբ: "Չէ որ, եթե մենք ձգտում ենք իրական խաղաղության, դա չի կարող լինել" միակողմանի երթեւեկությամբ փողոց", խաղաղության պատրաստակամություն պետք է ցուցաբերի նաև Ադրբեջանը, թեկուզ՝ պաշտոնական հռետորաբանության և հրապարակային դիսկուրսի մակարդակով", - ընդգծել է քաղաքագետը:

Նա ուշագրավ է համարել նաև նման հայտարարությունների համար ընտրված ժամանակահատվածը, հիշեցնելով, որ դրանք արվել են Սումգայիթյան ջարդերի և ցեղասպանության զոհերի հիշատակի շաբաթվա ընթացքում: Մաթեւոսյանի խոսքով, դատելով ինչպես Փաշազադեի, այնպես էլ Ադրբեջանի նախագահ Իլհամ Ալիեւի հայտարարություններից, որոնցում հերքվում է  կառավարության "Խաղաղության խաչմերուկ" նախագծի գոյությունը, ինչպես նաեւ տեսնելով, թե որքան ակտիվ է զինվում Ադրբեջանը, երկիրը բախվում է դաժան ճշմարտության. ադրբեջանցիները Հայաստանի ամբողջ տարածքը համարում են իրենցը՝ այն անվանելով "Արեւմտյան Ադրբեջան":

"Պատմությունը ցույց է տալիս, որ այն տարածքներում, որոնք Ադրբեջանն իրենն է համարում, ցեղասպանություն է իրականացվում ։ Նրանց ներկայիս քաղաքականությունը և հանրային դիսկուրսը ոչ մի կերպ չեն մատնանշում այդ ձգտումների մերժումը: Սա ընդամենը ժամանակավոր նախընտրական դադար է։ Սակայն Հայաստանում կան բազմաթիվ քաղաքացիներ, ովքեր վճռականորեն "ոչ" են ասում, այսպես կոչված, "Արևմտյան Ադրբեջան" նախագծին և գիտակցում են, որ Հայաստանում կայանալիք խորհրդարանական ընտրությունները ընտրություն են հանրապետության պահպանման և, այսպես կոչված, "Արևմտյան Ադրբեջան" դառնալու հեռանկարի միջև: Վերջնական հետեւությունն ու ընտրությունը պետք է կատարի Հայաստանի քաղաքացին, որոշելով, թե ինչ ապագա է ուզում կառուցել իր հայրենիքի համար", - եզրափակել է Մաթևոսյանը։

Հիշեցնենք, որ 2025 թվականի մայիսին Փաշազադեն հայտարարել էր, որ Հայաստանում և տարածաշրջանում տասնյակ դարեր գործող հայկական սրբավայրերը, նույնիսկ 1700-ամյա Էջմիածնի մայր տաճարը, գտնվում են "պատմական ադրբեջանական հողերում", և որ հայերն, իբր, "յուրացրել" են այդ տարածքները։ Փաշազադեն իր անհեթեթ հայտարարությունների շարքը եզրափակել է նրանով, որ Հայ Առաքելական Եկեղեցին ներկայացրել է որպես սպառնալիք տարածաշրջանի երկրներին: Հատկանշական է, որ Հայաստանի վարչապետ Նիկոլ Փաշինյանի արշավն ընդդեմ հայկական եկեղեցու սկսվել է Փաշազադեի այդ հայտարարություններից անմիջապես հետո: