Ու՞մ կենսաթոշակը կբարձրանա: Նախարարի պարզաբանումները

Արմինֆո. Հայաստանում կենսաթոշակները հաշվարկվում են տարբեր բանաձևերով։ Այդ մասին փետրվարի 25-ին հաղորդել է ՀՀ աշխատանքի և սոցիալական հարցերի նախարար Արսեն Թորոսյանը՝ իր տեսաուղերձում:

Նրա խոսքով՝ այդ բանաձևերում գլխավոր տեղը վերապահված է "հիմնական կենսաթոշակ" հասկացությանը, որը ներկայումս կազմում է 24 հազար դրամ: Ապրիլի 1-ից այն կբարձրանա 10 հազար դրամով և կկազմի 34 հազար դրամ։ Այսպիսով, ինչպես նշել է նախարարը, բոլոր այն անձանց կենսաթոշակները, ում կենսաթոշակները հաշվարկվում են "հիմնական կենսաթոշակից" ելնելով, կբարձրացվեն 10 հազար դրամով: Արսեն Թորոսյանը  նաև հաղորդել է, որ կբարձրանա նաև նվազագույն կենսաթոշակի չափը, որը ներկայումս կազմում է 36 հազար դրամ, և ապրիլի 1-ից այն հավասար կլինի 46 հազար դրամի: Իսկ դա խոսում է այն մասին, որ 10 հազար դրամով կբարձրանա նաև ծերության կենսաթոշակը, որը տրվում է համապատասխան աշխատանքային ստաժ չունեցող քաղաքացիներին։

Նախարարը նաև հաղորդել է, որ կբարձրանա նաև 1-ին, 2-րդ և 3-րդ կարգի հաշմանդամների, ինչպես նաև ծանր և միջին ֆունկցիոնալություն ունեցող անձանց նպաստների չափը: 36, 37,5 և 39 հազար դրամի փոխարեն նրանք կստանան, համապատասխանաբար, 46, 47,5 և 49 հազար դրամ։

Կբարձրանան նաև երկարաժամկետ ծառայության զինվորական կենսաթոշակները, բայց հաշվարկման բանաձևն այստեղ մի փոքր այլ է։ Միջին հաշվով, զինվորական թոշակառուները կարող են ակնկալել լրացուցիչ 8,5 հազար դրամ, թեեւ որոշ դեպքերում հավելավճարը կկազմի 10 - 15 հազար դրամ:

Նախատեսվում է բարձրացնել նաև կերակրողին կորցրած ընտանիքների և սոցիալապես անապահով այլ կատեգորիաների կենսաթոշակները:

Նախարարը նաև նշել է, որ կպահպանվի անկանխիկ գնումների դիմաց 20% հետվճարը: Այսպիսով, կենսաթոշակների ընդհանուր չափը կարող է ավելանալ ևս 10 հազար դրամով, ինչը կնպաստի ստվերային շրջանառության կրճատմանը։