Փորձագետ․ ԱՄՆ տարածաշրջանային ռազմակայաններից անձնակազմի տարհանումը դիտարկվում է որպես Իրանի պատասխան հարվածներից զգուշանալու նախապատրաստական քայլ

Արմինֆո. Երբ պետությունը սկսում է սպառնալիքները փաստաթղթավորել միջազգային կառույցներում, դա արդեն խոսում է ոչ թե ռազմական էսկալացիայի տեսական հռետորաբանության, այլ դրանց գործնական բարձր ռիսկայնության մասին։ Այդ մասին Facebook-ի իր էջում գրել է ՀՀ պաշտպանության նախկին փոխնախարար Արտակ Զաքարյանը՝ անդրադառնալով Իրանի շուրջ ստեղծված իրավիճակին:

«Ըստ «The New York Times» -ի պենտագոնյան աղբյուրի, ԱՄՆ-ը էվակուացնում է Բահրեյնում (5-րդ նավատորմի ՌԾՈւ) և Քաթարում տեղակայված իր ռազմաբազանների անձնակազմին (իհարկե՝ ոչ բոլորին): Նշվում է նաև, որ արդեն էվակուացվել են Իրաքում, Սիրիայում, Քուվեյթում, Հորդանանում և ԱՄԷ-ում տեղակայված ռազմաբազանների անձնակազմի որոշ մասը:

Հարկ է նշել, որ Իրանը պաշտոնական նամակով, երեկ դիմել է ՄԱԿ-ի գլխավոր քարտուղար Գուտերեշին՝ զգուշացնելով իր վրա հավանական հարձակման մասին: Դա ապագա հնարավոր հակամարտությանը միջազգայնորեն իրավական հիմքեր տալու փորձ էր:

Տրամաբանությունն այն է, որ նախ, հնարավոր հարվածի դեպքում, Իրանը հղում անելով իր պաշտոնական նամակ-զգուշացմանը՝ պատասխան հարվածերը մեկնաբանելու է որպես միջազգային իրավունքին համապատասխան արված ինքնապաշտպանական գործողություններ:

Բացի այդ, այն պետք է ընկալել որպես պաշտոնական ազդանշան՝ ուղղված ոչ միայն ՄԱԿ-ին, այլ նաև տարածաշրջանի բոլոր երկրներին: Բնականաբար, ԱՄՆ տարածաշրջանային ռազմաբազաներից անձնակազմի էվակուացիան դիտարկվում է որպես Իրանի պատասխան հարվածներից զգուշանալու նախապատրաստական քայլ:

Եվ վերջապես, երբ պետությունը սկսում է սպառնալիքները փաստաթղթավորել միջազգային կառույցներում, դա արդեն խոսում է ոչ թե ռազմական էսկալացիայի տեսական հռետորաբանության, այլ դրանց գործնական բարձր ռիսկայնության մասին», - կարծում է Արտակ Զաքարյանը:

Հիշեցնենք, որ ԱՄՆ նախագահ Դոնալդ Թրամփը փետրվարի 19-ին հայտարարել էր, որ Իրանին ռազմական գործողություններ են սպառնում, եթե միջուկային ծրագրի շուրջ ընթացող բանակցություններն անարդյունք ավարտվեն: "Մենք պետք է բովանդակային համաձայնագիր կնքենք, այլապես վատ բաներ տեղի կունենան", - հայտարարել էր Թրամփը,  հավելելով, որ Թեհրանին "10-15 օր" ժամկետ է տալիս: Ելույթ ունենալով իր իսկ  կազմակերպած Խաղաղության խորհրդի  առաջին նիստում՝ Թրամփն ընդգծել է, որ պայմանավորվածության բացակայության դեպքում Վաշինգտոնը, հնարավոր է, ստիպված լինի "կատարել հաջորդ քայլը": Ավելի ուշ, Air Force One ինքնաթիռում պատասխանելով լրագրողների հարցերին, ԱՄՆ նախագահը հստակեցրել է. "Կարծում եմ՝ այդ ժամանակը բավարար կլինի․ 10, 15 օր՝ առավելագույնը":