Երևանում մարտաֆիլմի կադրեր հիշեցնող միջադեպ է տեղի ունեցել

Արմինֆո.Փետրվարի 18-ին մարտաֆիլմի կադրեր հիշեցնող միջադեպ է տեղի ունեցել Երևանում: Ժամը 16:00-ի սահմաններում իրավապահ մարմինների աշխատակիցները հերթական օպերատիվ տեղեկությունն են ստացել Աբելյան 9 հասցեում հնչած կրակոցների և վիրավորների առկայության մասին:

Ինչպես հաղորդում է shamshyan.com կայքը,  դեպքի վայր է ժամանել  Ոստիկանության գրեթե ողջ ղեկավարությունը՝ ներքին գործերի նախարարի տեղակալ, ոստիկանության գեներալ-մայոր Կամո Ցուցուլյանի գլխավորությամբ: Տեղում պարզվել է, որ ստացված օպերատիվ տեղեկությունը հավաստի է․ նշված վայրից հրազենային վնասվածքներով Երևանի տարբեր հիվանդանոցներ են տեղափոխել 10 քաղաքացու:

Այս պահին դեպքի վայրում արդեն աշխատում են Քննչական կոմիտեի քննիչները։ Հարուցվել է քրեական գործ ՝ մի խումբ անձանց նկատմամբ սպանության փորձ կատարելու և ապօրինի կերպով հրազեն պահելու և օգտագործելու փաստի առթիվ: Դեպքի վայրում հայտնաբերվել են մի քանի դանակ, Lexus մակնիշի ավտոմեքենա՝ փամփուշտի հետքերով: Ոստիկանները պարզում են տուժածների և Lexus ավտոմեքենայի սեփականատիրոջ ինքնությունը: