Քաղաքական գործիչը՝ Ալիևի հայտարարությունների մասին. "Եթե հայ գերիները նացիստներ են, իսկ ադրբեջանական դատական համակարգը՝ Նյուրնբերգյան դատավարություն, ապա Հայաստանը կապիտուլացված Գերմանիա է"

Արմինֆո. Եթե հայ գերիները, Ադրբեջանի նախագահ Իլհամ Ալիևի խոսքերով, ավելի վատն են, քան "նացիստները", իսկ ադրբեջանական դատական համակարգը Նյուրնբերգյան դատավարություն է, ապա Հայաստանը կապիտուլացված Գերմանիա է:

Այդ մասին փետրվարի 17-ին Երեւանում կայացած մամուլի ասուլիսի ժամանակ հայտարարել է "Դեմոկրատական այլընտրանք" կուսակցության առաջնորդ Սուրեն Սուրենյանցը՝ արձագանքելով Ալիեւի հայտարարությանը, որն արել էր անցած շաբաթվա վերջին France 24 հեռուստաալիքին տված հարցազրույցում։

Քաղաքական գործիչն ուշադրություն է հրավիրել այն հանգամանքի վրա, որ Ադրբեջանի նախագահի ձևակերպումները միայն հայ գերիներին չեն վերաբերում: Նրա խոսքով ՝ դրանք նկարագրում են հայ-ադրբեջանական հակամարտության կարգավորման հիմքում ընկած տրամաբանությունը։ Քաղաքական գործիչը վստահ է, որ Ալիևի այդ հայտարարություններն, առաջին հերթին, ուղղված էին միջազգային հանրությանը, այլ ոչ թե՝ ներքին լսարանին, նկատելով, որ դրանք հնչել են հեղինակավոր միջազգային հարթակ հանդիսացող ֆրանսիական France 24 հեռուստաալիքի եթերից:

"Այսինքն՝  Ալիևն, ըստ էության, հայտարարել է, որ հայ-ադրբեջանական հարաբերությունների կարգավորումը տեսնում է ոչ թե փոխադարձ համաձայնությունների կամ ուժերի հավասարակշռության հիման վրա, այլ՝ Հայաստանի վերջնական կապիտուլյացիայի տրամաբանության մեջ։ Եվ դա նա շատ հստակ է ասել", - կարծում է Սուրենյանցը։

Քաղաքական գործիչն ուշադրություն է հրավիրել այն հանգամանքի վրա, որ, ի տարբերություն Հայաստանի վարչապետ Նիկոլ Փաշինյանի, Ալիևն իր հայտարարություններում և գործողություններում հետևողականություն է ցուցաբերում: "Դեռ հետպատերազմյան շրջանում Արցախի շուրջ մենք ականատես եղանք, թե ինչպես են Ադրբեջանի նախագահի հայտարարությունները դառնում իրական քաղաքականություն, որի գինը վճարում է հայ ժողովուրդը", - նշել է քաղաքական ուժի առաջնորդը:

Սուրենյանցը համոզմունք է հայտնել, որ Հայաստանի և Ադրբեջանի միջև խաղաղության գործընթացի շրջանակներում հայ ռազմագերիները չեն վերադարձվի, նկատելով, որ այդ գործընթացի շրջանակներում ձևավորվել է այնպիսի մոդել, երբ Հայաստանը միշտ ավելի շատ է զիջում, քան Ադրբեջանը, և այն պայմաններում, երբ Բաքվի զիջումները խորհրդանշական բնույթ են կրում:

Հիշեցնենք, որ Ալիևը France 24 հեռուստաալիքի հարցազրույցում հայ գերիներին անվանել էր "նացիստներից" ավելի վտանգավոր և զուգահեռներ անցկացրել Արցախի ռազմաքաղաքական ղեկավարության նկատմամբ դատավարության և Նյուրնբերգյան դատավարության միջև:

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Փորձագետների գնահատմամբ ՝ նրանք մի քանի հարյուր են ։ Այսօր Ադրբեջանի իշխանությունները հաստատում են իրենց մոտ 19 հայերի առկայությունը ։ Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ․ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:

Փետրվարի 17-ին Ադրբեջանի խամաճիկային դատարանը Արցախի նախկին պետնախարար, բարերար  Ռուբեն Վարդանյանին դատապարտել է 20 տարվա ազատազրկման։ Փետրվարի սկզբին շինծու մեղադրանքներով  ցմահ ազատազրկման են դատապարտել Արայիկ Հարությունյանը, Դավիթ Բաբայանը, Դավիթ Իշխանյանը, Դավիթ Մանուկյանը, Լևոն Մնացականյանը, իսկ Բակո Սահակյանն ու Արկադի Ղուկասյանը՝ 20 տարվա ազատազրկման: Մնացած արցախցիներին, այսպես կոչված, դատարանը դատապարտել է մինչև 15 տարվա ազատազրկման։