Երեւանում է Հնդկաստանի զինված ուժերի պաշտպանության շտաբի պետի գլխավորած պատվիրակությունը

Արմինֆո. Փետրվարի 1-ին պաշտոնական այցով Հայաստանի Հանրապետություն է ժամանել Հնդկաստանի զինված ուժերի պաշտպանության շտաբի պետ, գեներալ Անիլ Չաուհանի գլխավորած պատվիրակությունը։ Այդ մասին հաղորդում է Հայաստանի ՊՆ մամուլի ծառայությունը։ Այլ մանրամասներ չեն հաղորդվում։

Ավելի վաղ հնդկական լրատվամիջոցները գրել էին, որ Հայաստանը հնդկական պաշտպանական արտադրանքի խոշորագույն գնորդների եռյակում է՝ ԱՄՆ-ի և Ֆրանսիայի հետ միասին: Հայաստանը վերջին 4 տարիներին մի քանի գործարք է կնքել Հնդկաստանի հետ՝ հրթիռների, հրետանային զենքերի, հրթիռային համակարգերի, ռադարների, զրահաբաճկոնների և գիշերային տեսանելիության սարքերի, ինչպես նաև զինամթերքի և հրետանային արկերի լայն տեսականի ձեռք բերելու համար: Ընդ որում, Հայաստանը դարձել է հնդկական արտադրության "Ակաշ" ԶՀՀ առաջին օտարերկրյա գնորդը։ 2022 թվականի սեպտեմբերի վերջին Հայաստանը ստորագրել է ավելի քան 250 մլն դոլարի պայմանագիր ՝ Հնդկաստանից սպառազինություն գնելու համար, ներառյալ հնդկական 214 մմ Pinaka  համազարկային կրակի ռեակտիվ համակարգերը և դրանց համար նախատեսված ռեակտիվ արկերը, հակատանկային հրթիռային համալիրներ և տարբեր զինամթերք։

Իսկ արդեն 2023 թվականի աշնանը Indian Defence Research Wing-ը հաղորդել  էր, որ օգոստոսի սկզբին հնդկական Bharat Forge LTD պաշտպանական ընկերությունը Հայաստանին է փոխանցել վեց քարշակվող ATAGS 155 մմ հաուբից ՝ 155,5 մլն դոլար արժողությամբ պայմանագրի շրջանակներում։ Գործարքը նախատեսում է երեք տարվա ընթացքում Հայաստանին մատակարարել այդ տեսակի 90 հրետանային զենք։