"Մեր ձեւով". Սամվել Կարապետյանի՝ 300 հազար նոր աշխատատեղ ստեղծելու նախաձեռնությունը իրականություն կդառնա մարզերի համար

Արմինֆո."Տաշիր" ընկերությունների խմբի նախագահ Սամվել Կարապետյանի՝ 300 000 նոր աշխատատեղ ստեղծելու նախաձեռնությունը իրականություն կդառնա մարզերի, հատկապես, Գյումրի քաղաքի և ողջ Շիրակի մարզի համար: Այդ մասին հայտարարել է "Մեր ձեւով" շարժման անդամ Ռուբեն Մխիթարյանը։

"Երբ մենք խոսում ենք 300 000 աշխատատեղերի մասին, մենք խոսում ենք այն մասին, որ Գյումրիի և ողջ Շիրակի մարզի բնակիչների համար մենք կվերադարձնենք արժանապատիվ աշխատանքը, հույսը, վստահությունը ընտանիք կազմելու, երեխաներ ունենալու հարցում և, ի վերջո, մեր տարածաշրջանին ու քաղաքին կվերադարձնենք նրա կենսունակությունը", - ասել է Ռուբեն Մխիթարյանը:

Նա հավելել է, որ ներկայիս իշխանության օրոք մարզը լավագույն ժամանակներ չի ապրում ՝ աղքատություն, աշխատանքի հնարավորությունների բացակայություն, արտագաղթ: "Սամվել Կարապետյանի առաջարկած նախաձեռնությունն իսկական փրկություն կլինի Գյումրիի եւ ողջ Շիրակի մարզի համար", - ընդգծել է Ռուբեն Մխիթարյանը:

Հիշեցնենք, որ հունվարի վերջին Երևանում ներկայացվել է "Մեր ձեւով" շարժման ծրագիրը, որը ներառում է հինգ հիմնական ուղղություն․ 300 հազար նոր աշխատատեղերի ստեղծում, հատկապես, մարզերում, 0 տոկոս հարկեր փոքր բիզնեսի համար, դեղերի գների 20 տոկոս իջեցում բոլորի համար, գյուղերից բերքի երաշխավորված գնում, 20 հազար մատչելի բնակարան պետական աջակցությամբ: "Ես երաշխավորում եմ դրանց կատարումը", - նշել է գործարարը։