Ռիտեր․ 2025 թվականի օգոստոսի 8-ի Վաշինգտոնյան փաստաթղթի ստորագրումից հետո Հայաստանի և Ադրբեջանի սահմանին թիրախային փոխհրաձգություն չի եղել

Արմինֆո.  2025 թվականի օգոստոսի 8-ին խաղաղության հաստատման մասին Վաշինգտոնյան փաստաթղթի ստորագրումից հետո Հայաստանի և Ադրբեջանի սահմանին թիրախային փոխհրաձգություն չի եղել։ Այդ մասին ՀՀՀ եթերում հայտարարել է Հայաստանում ԵՄ դիտորդական առաքելության ղեկավար Մարկուս Ռիտերը, ով ավարտում է իր առաքելությունը երկրում։

Նրա խոսքով՝ ԵՄ դիտորդական առաքելությունը երկու կողմից էլ արձանագրել է կրակոցներ օդ, սակայն թիրախային կրակոցներ չեն դիտվել: Նրա խոսքով ՝ հայ-ադրբեջանական սահմանին իրենց տեղակայումից ի վեր անվտանգության միջավայրն ամրապնդվել է, ինչն արձանագրում են նաև տեղի բնակիչները:

Ռիտերը նաև պատմել է, որ իրենք դիտարկում են ոչ միայն Ադրբեջանի, այլև Հայաստանի զինված ուժերի գործողությունները և աամեն ինչ զեկուցում են ԵՄ: "Այսինքն ՝ մենք հետևում ենք նաև հայկական կողմի վարքագծին, և եթե տեսնում ենք, որ ՀՀ ԶՈՒ դիրքերն ամրապնդվում են, այդ մասին ևս զեկուցվում է", - ասել է նա:

Հայաստանում ԵՄ դիտորդական առաքելության ղեկավար Մարկուս Ռիտերը նաեւ խոստովանել է, որ Հայաստանի և Ադրբեջանի միջև խաղաղության համաձայնագրի ստորագրումից և վավերացումից հետո իրենք այլևս առաքելություն չեն իրականացնելու սահմանին, քանի որ դրա կարիքը չի լինելու: Այդ մասին նա ասել է՝ ի պատասխան դիտարկմանը, որ նախաստորագրված համաձայնագրում կա կետ, որն արգելում է կողմերին երրորդ երկրների ուժեր տեղակայել սահմանին։ "Մենք այդպես ենք կարծում, թեեւ դա որոշակիորեն նշված չէ, բայց մենք գիտենք, որ խաղաղության համաձայնագրի ստորագրումից եւ վավերացումից հետո սահմանին մեր կարիքն այլեւս չի լինի, բայց մենք շարունակելու ենք այցելել սահմանամերձ բնակավայրեր: Կա փոխադարձ պայմանավորվածություն՝ շարունակելու մեր աշխատանքները, այցելելու սահմանամերձ բնակավայրեր", - ասել է նա: Ռիտերը նաեւ պատմել է, որ Հայաստանից մտադիր է մեկնել փետրվարի վերջին, եւ մինչ այդ հայտնի կդառնա, թե ով է փոխարինելու իրեն Հայաստանում ԵՄ քաղաքացիական առաքելության ղեկավարի պաշտոնում։

Հիշեցնենք, որ 2025 թվականի օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Վաշինգտոնում ստորագրել են յոթ կետից բաղկացած համատեղ "Խաղաղության հռչակագիր"։ Այն նախատեսում է համատեղ դիմում Եվրոպայի անվտանգության եւ համագործակցության կազմակերպությանը (ԵԱՀԿ) ԵԱՀԿ Մինսկի գործընթացի եւ դրա հետ կապված կառույցների դադարեցման մասին, ինչպես նաեւ Հայաստանի տարածքով տրանսպորտային միջանցքի ստեղծում, որը կկապի Ադրբեջանն իր նախիջեւանյան էքսկլավի հետ, որը շրջապատված է Հայաստանով, Թուրքիայով եւ Իրանով: