Ընդդիմադիր․ Թրամփի հետ Փաշինյանի հերթական սելֆիի դիմաց հայ ժողովուրդը կարող է թանկ գին վճարել

Արմինֆո.  Հայաստանի քաղաքացիները պետք է 1 մլրդ դոլար վճարեն միայն այն բանի համար, որ ՀՀ վարչապետ Նիկոլ Փաշինյանը հերթական սելֆին անի ԱՄՆ նախագահ Դոնալդ Թրամփի հետ: Այդ մասին հունվարի 22-ին ճեպազրույցում հայտարարել է "Պատիվ ունեմ" ընդդիմադիր խմբակցության ղեկավար Հայկ Մամիջանյանը ՝ մեկնաբանելով Թրամփի "Խաղաղության խորհուրդ" նախագծի նախաձեռնությունը։

Ընդդիմադիր գործչի խոսքով՝ ԱՄՆ ղեկավարի այդ նախաձեռնությանը միացել է ընդամենը մի քանի երկիր, որոնցից յուրաքանչյուրը պետք է 1 մլրդ դոլար ներդրում կատարի խորհրդի կանոնադրական հիմնադրամում: "Կառավարող "Քաղաքացիական պայմանագիր" խմբակցության ներկայացուցիչները մշտապես խուսափում են պատասխանել այն հարցին, թե ինչ աղբյուրներից է Հայաստանը վճարելու այդ գումարը։ Նրանք անընդհատ հայտարարում են, որ դեռ հայտնի չէ, թե արդյոք կա նման պայման, թե՝ ոչ, բայց ինձ մոտ այդ դեպքում տրամաբանական հարց է առաջանում․ եթե, նույիսկ, երկիրը այդ գումարը չներդնի, արդյոք կունենա հավասար ձայնի իրավունք, թե՝ ոչ ։ Կարծում եմ ՝ պատասխանն այստեղ ակնհայտ է։ Բայց, եթե անգամ պարզվի, որ Հայաստանն, ամեն դեպքում, պետք է մուծի դա, արդյոք կնշանակի, որ երկրի բոլոր քաղաքացիները պետք է վճարեն այդ գումարը միայն նրա համար, որ Փաշինյանը ևս մեկ սելֆի անի Դոնալդ Թրամփի հետ", - նշել է Հայկ Մամիջանյանը։

Նա հավելել է, որ Հայաստանի վրա թանկ են նստում Փաշինյանի լուսանկարները ։ Օրինակ, երկրի վրա 60 մլն դոլարի ծանր բեռ է դրվել Սու-30 ՍՄ ինքնաթիռում սելֆիի համար, որը մեկ րոպե անգամ չի օգտագործվել պետության տարածքային ամբողջականությունը պաշտպանելու համար ՝ զինամթերքի բացակայության պատճառով։ Այդ գործարքի միակ շահը ՀՀ վարչապետի սելֆին էր։

Իր հերթին՝ կառավարող "Քաղաքացիական պայմանագիր" խմբակցության քարտուղար Արթուր Հովհաննիսյանը ենթադրություն է հայտնել, որ «Խաղաղության խորհրդին» Հայաստանի միանալու պայմանը կարող է և պարտադիր չլինել: Ամեն դեպքում, ինչպես շարունակել է Հովհաննիսյանը, այդ հարցի պատասխանը կարող է տալ ՀՀ վարչապետի աշխատակազմը։

Նշենք, որ հունվարի 22-ին Դավոսում պետք է տեղի ունենա "Խաղաղության խորհրդի" կանոնադրության ստորագրման արարողությունը, որին կմասնակցի նաև ՀՀ վարչապետ Նիկոլ Փաշինյանը: Խորհրդին մասնակցելու հրավերներ են ուղարկվել մոտ 60 պետությունների ղեկավարների, հաստատում է ստացվել է 35 երկրներից, այդ թվում ՝ Հայաստանից:

Խորհրդի գործադիր կոմիտեում, ի թիվս այլոց, կընդգրկվեն ԱՄՆ պետքարտուղար Մարկո Ռուբիոն, ԱՄՆ նախագահի փեսա Ջարեդ Քուշները և Միացյալ Թագավորության նախկին վարչապետ Թոնի Բլերը: Որոշ եվրոպական առաջնորդների, ինչպես գրում Է Reuters-ը, մտահոգում է այն, որ, դատելով կանոնադրության նախագծից, "Խաղաղության խորհրդում" որոշումներ կայացնելու լիազորությունները կկենտրոնանան Դոնալդ Թրամփի ձեռքում: Վերջինս, ակնհայտորեն, կկարողանա ցմահ պահպանել խորհրդի նախագահի պաշտոնը։