Հայաստանի ֆինանսների նախարարը հարցաքննվել է  ձեռնարկատիրական գործունեությանը պաշտոնատար անձի ապօրինի մասնակցության մասին գործով

Արմինֆո. Հայաստանի ֆինանսների նախարար Վահե Հովհաննիսյանը երկու օր առաջ հարցաքննվել է ձեռնարկատիրական գործունեությանը պաշտոնատար անձի ապօրինի մասնակցության քրեական գործի շրջանակներում՝ վկայի կարգավիճակով: Այդ մասին հունվարի 21-ին մամուլի ասուլիսի ժամանակ հաղորդել է Հովհաննիսյանը։

Ընդ որում, նա նշել է, որ ինքը չի հասկանում, թե ինչ նկատի ունեն, երբ իրեն հարցնում են "ապօրինի ձեռնարկատիրության հետ կապված գործի" մասին։

"Պետական ծառայող դառնալուց ի վեր ես ձեռնարկատիրությամբ չեմ զբաղվել, թեեւ մինչ այդ եղել են որոշ նախաձեռնություններ", - ասել է նա:

2025 թվականի սկզբին հայտնի էր դարձել, որ Վերաքննիչ դատարանը Հակակոռուպցիոն դատարանին պարտավորեցրել է քրեական վարույթ նախաձեռնել ֆինանսների նախարար Վահե Հովհաննիսյանի նկատմամբ: Ինչպես յաղորդել է փաստաբան Արա Զոհրաբյանը, ֆինանսների փոխնախարարի պաշտոնում նշանակվելու օրը՝ 2021 թվականի օգոստոսի 18 - ին, Վահե Հովհաննիսյանը ստացել է 1 000 000 ԱՄՆ դոլարի չափով անտոկոս փոխառություն, 50 000 ԱՄՆ դոլարի նվիրատվություն և ձեռք է բերել "Կարիտաս Իտալիանա" ընկերության բաժնետոմսերի 100%-ը: Նախարարի ներկայացրած 2021 թվականի հայտարարագրի համաձայն,  "Կարիտաս Իտալիանա" ընկերության (Caritas-Italiana, որը մասնագիտացած է տեղեկատվական տեխնոլոգիաների ոլորտում մշակումների մեջ և պետությունից արտոնություն է ստացել՝ որպես ստարտափ) մի մասը պատկանում է հենց Հովհաննիսյանին ։ Սակայն արդեն 2022 թվականի հունվարի 10-ին ընկերությունը վերակազմավորվել է և վերանվանվել J-Corder ։ Ընդ որում, Վահե Հովհաննիսյանի նույն տարվա հայտարարագրում նշված է, որ տարեվերջին նրա մոտ մնացել է 1.050.000 դոլարի բաժնետոմս: 2023 թվականի հայտարարագրում այդ բաժնետոմսերը «անհետանում են»։ "Ընկերության վերակազմավորումից հետո նրա 100%-անոց սեփականատերը դառնում է Ռուբիկ Կարապետյանը, ով, ըստ մամուլի հրապարակումների, Վահե Հովհաննիսյանիքեռին է", - գրել է Զոհրաբյանը:

Ինքը՝ Հովհաննիսյանը, 2025 թվականի մայիսին լրագրողներին հավաստիացրել էր, որ ոչ մի կապ չունի նշված ընկերության հետ՝ այն պահից, երբ պետական ծառայության է անցել ֆինանսների նախարարությունում։ Այսպես, նախարարի խոսքով, 2020 թվականի պատերազմից հետո իրենք մի խումբ ընկերների հետ որոշել են հիմնել տեխնոլոգիական պարկ, որը պետք է մեծացներ Հայաստանի հզորությունները տարբեր բարձր տեխնոլոգիական մշակումների ուղղությամբ։ «Իմ ընկերներից մեկը ներդրումներ կատարեց այս բիզնեսում և ձևակերպեց այն որպես պարտք: Որոշում էր կայացվել, որ ես պետք է ղեկավարեմ ընկերությունը։ 2021 թվականի օգոստոսին, երբ ինձ նշանակեցին փոխնախարարի պաշտոնում, իմ անունով ձևակերպված պարտքը և ընկերությանը փոխանցեցի երրորդ կողմի։ Որքան ինձ հայտնի է, այդ ընկերությունը կատարել է բոլոր ներդրումները եւ արդեն աշխատում է", - ասել է Հովհաննիսյանը։ Բացի այդ, ինչպես հավաստիացրել է ֆինանսների նախարարը, ինքը տեղյակ չի եղել, որ J-Corder ընկերությունը 2023 թվականին Հայաստանի կառավարությունից ստացել է մաքսատուրքից ազատման հարկային արտոնություններ ապրանքների ներմուծման ժամանակ։