Մայա Սանդուն հանդես է եկել Ռումինիայի հետ վերամիավորման օգտին

Արմինֆո. Մոլդովայի նախագահ Մայա Սանդուն հանդես է եկել Ռումինիայի հետ վերամիավորման օգտին:

"Եթե մեզ մոտ հանրաքվե լիներ, ես կքվեարկեի Ռումինիայի հետ վերամիավորման օգտին, սակայն այժմ մեծամասնությունը կողմ է ԵՄ-ին անդամակցելուն, եւ մենք գործում ենք այդ ուղղությամբ", - ըստ «Մոլդպրես»-ի՝ հայտարարել է Սանդուն:

Նա բրիտանացի լրագրողների հետ հարցազրույցում հավելել է, որ տարածաշրջանային եւ գլոբալ իրադարձությունները ավելի են բարդացնում այնպիսի երկրների գոյատեւումը, ինչպիսին Մոլդովան է, եւ ԵՄ-ին անդամակցելը դառնում է իրատեսական նպատակ՝ ինքնիշխանությունը պաշտպանելու համար:

Նշվում է, որ առաջին անգամ Մոլդովայի նախագահը հրապարակավ հայտարարել է, որ հանրաքվեի անցկացման դեպքում ինքը կքվեարկի Ռումինիայի հետ վերամիավորման օգտին: "Սակայն այդ հարցը լայն աջակցություն չի գտնի քաղաքական դասի շրջանում, ուստի եվրոպական ինտեգրման ձգտումը մնում է միակ լուծումը Մոլդովայի Հանրապետության գոյատեւման համար", - պարզաբանել է պետության ղեկավարը:

Քննարկման ընթացքում Մայա Սանդուն ընդգծել է աճող դժվարությունները, որոնց բախվում են փոքր պետությունները ներկայիս աշխարհաքաղաքական համատեքստում: Պետության ղեկավարը խոսել է նաեւ Ռուսաստանի Դաշնության կողմից սպառնալիքների մասին, հայտարարելով, որ Ռուսաստանի նախագահ Վլադիմիր Պուտինը ձգտում է ընդլայնել իր ազդեցությունը Եվրոպայի նկատմամբ: Նրա խոսքով ՝ Կրեմլի միջամտությունը Եվրամիության ներքին գործերին շատ ավելի խորն է, քան կարծում են շատ եվրոպացիներ։