Ուզում էին՝ ավելի լավ լինի, բայց ստացվեց՝ ինչպես միշտ։ Երևանի քաղաքապետը դժգոհ է քաղաքի փողոցները ձնից մաքրելու կոմունալ ծառայությունների աշխատանքից

Արմինֆո.Երևանի քաղաքապետ Տիգրան Ավինյանը դժգոհ է քաղաքի փողոցները ձնից մաքրելու կոմունալ ծառայությունների աշխատանքից:

Երևանի քաղաքապետարանում աշխատանքային խորհրդակցության ժամանակ Ավինյանը նշել է, որ պատշաճ վերահսկողություն չի իրականացվել այն տնտեսվարող սուբյեկտների գործունեության նկատմամբ, որոնք պարտավոր են ձյան ծածկույթից մաքրել խանութների և սպասարկման ոլորտի ձեռնարկությունների դիմացի տարածքները: Քաղաքապետը նշել է, որ Երևանի 4-5 վարչական շրջաններում տնտեսվարողների վրա դրված պարտավորությունների համար ոչ մի տուգանք չի գրվել, ինչին բացատրություն չկա: Ավելին, ինչպես նկատել է Ավինյանը, այդ սուբյեկտների շատ ղեկավարներ պատշաճ մակարդակով տեղեկացված չեն իրենց պարտավորությունների մասին։ "Օրինակ, Կիևյան փողոցում, որտեղ ես զբոսնում էի եղբորս հետ, փոքրիկ խանութի սեփականատերը, տարածքը մաքրելով և ինձ նկատելով, հայտարարեց, որ իր կատարած աշխատանքի համար քաղաքապետարանը պետք է իրեն գումար վճարի ։ Նա տեղյակ չէ, որ տարածքի մաքրումն իր պարտականությունն է, և այդ պարտականությունը սահմանված է ավագանու որոշմամբ: Փողոցների մաքրման հարցում ներգրավված են նաեւ համատիրությունները, որոնք նույնպես պարտավոր են կատարել իրենց վրա դրված պարտավորությունները ", - նշել է քաղաքապետը։

Նա հավելել է, որ նախորդ տարեվերջին քննարկվել և հաստատվել է ձնամաքրման համար լրացուցիչ ուժեր ներգրավելու հարցը, որպեսզի ծայրահեղ բարդ իրավիճակ չառաջանա, ինչպես՝ հունվարի 1-3-ն էր: Այնուամենայնիվ, ներուժն ամբողջությամբ չի իրականացվել։ Հասկանալի է, քաղաքապետի ասելով,  որ շատերը նշում էին Ամանորը, բայց 2025 թվականի վերջին պայմանավորվել էին աշխատել ծայրահեղ իրավիճակում ՝ 24/7 ռեժիմով։

Ավինյանը նշել է, որ թաղապետարանները, ընդհանուր առմամբ, մոտ 300 աշխատակից ունեն, որոնք պետք է ներգրավված լինեին սանիտարական նորմերի խախտման համար տարբեր տուգանքների կիրառմանը: "Երբ ես համադրում եմ կազմված արձանագրությունները 300 աշխատողներից յուրաքանչյուրի հետ , համեմատելով դրանք հասարակական կարգի խախտումների կամ շինարարական աշխատանքների ժամանակ խախտումների մասին արձանագրությունների հետ, ուղղակի խայտառակ թվեր են ստացվում ։ Եվ այս հարցում լուրջ փոփոխությունների անհրաժեշտություն կա, որոնք անպայման շուտով կքննարկենք ։ Անընդհատ լավ մարդ ներկայանալը լավ չէ: Տուգանքները հենց այնպես չեն գրվում։ Յուրաքանչյուր տնտեսվարող սուբյեկտ պարտավոր է կատարել ավագանու որոշումները", - ասել է Ավինյանը ՝ հանձնարարելով կոմունալ տնտեսության վարչության պետ Արսեն Կարոյանին գույքագրում կատարել և կողմնորոշվել լրացուցիչ միավոր ունիվերսալ տեխնիկայի գնման հարցում։

Հիշեցնենք, որ նախորդ տարեվերջին Երևանի քաղաքապետի խորհրդական Կամո Արեյանը զեկուցել էր, որ քաղաքի բոլոր ծառայությունները պատրաստ են հնարավոր առատ տեղումների: Ինչպես ասում են՝ ուզում էին ավելի լավ լինի, իսկ ստացվեց՝ ինչպես միշտ։