Երևանի քաղաքապետարանի պաշտոնյայի հավաստիացումը. մայրաքաղաքի կանաչ գոտիների մակերեսը համապատասխանում է խորհրդային կանաչ ֆոնդի մակարդակին

Արմինֆո. Այսօր Երևանում հանրային օգտագործման կանաչ գոտիների ընդհանուր մակերեսը հասել է 910 հեկտարի, ինչը համապատասխանում է խորհրդային կանաչ ֆոնդի մակարդակին, որը լավագույն ժամանակներում կազմում էր 908 հեկտար: Այդ մասին Երևանում կայացած մամուլի ասուլիսում հայտարարել է Երևանի քաղաքապետարանի "Կանաչապատում և շրջակա միջավայրի պահպանություն" կազմակերպության տնօրեն Արմեն Բեգոյանը:

Նրա հավաստմամբ, ընդհանուր առմամբ, 2025 թվականին կանաչապատման աշխատանքները գերազանցել են 2024 թվականի արդյունքները. ընթացիկ տարում Երևանում ստեղծվել է 13,5 հեկտար նոր կանաչ գոտի, իսկ տնկված ծառերի ընդհանուր թիվը կազմել է 4500: "Ընդ որում, տնկված յուրաքանչյուր հարյուր ծառից 95-ն արմատավորվել են իրենց տեղերում եւ կատարում են իրենց գործառույթը", - նշել է պաշտոնյան:

Այնուհետև Բեգոյանը պատմել է այն նախաձեռնությունների մասին, որոնք, իր հավաստմամբ, նպաստել են Երևանի կանաչ ֆոնդի ավելացմանը: Մասնավորապես, 2025 թվականին իրականացվել է ձմեռային մշտադալար բույսերի տնկման նախաձեռնությունը։ "Փետրվարին մենք սկսեցինք այդ գործընթացը՝ տնկելով 200 մշտադալար սոճի և եղևնի, իսկ դեկտեմբերի 13-ին տնկվեց ևս մոտ 1000 նման ծառ ։ Այսպիսով, 2025 թվականին տնկված մշտադալար տնկարկների ընդհանուր թիվը կազմել է 1200։ Այս միջոցառումն ուղղված է օդի որակի բարելավմանը ձմռան ամիսներին, երբ մայրաքաղաքը բախվում է աղտոտվածության խնդիրների", - պարզաբանել է Բեգոյանը։

Բացի այդ, պաշտոնյայի խոսքով, փորձնական ծրագիր է մեկնարկել գերեզմանատների մոտ եւ ծանր երթեւեկությամբ ճանապարհների երկայնքով կանաչապատման համար: Մասնավորապես, Սիլիկյանի և Դավթաշենի գերեզմանոցի հատվածներում տնկվել է շուրջ 1,5 կմ կանաչ տարածք, որը, ինչպես հավաստիացրել է Բեգոյանը, նաեւ կբարելավի տեղանքի գեղագիտական տեսքը:

"Փետրվարին սկսվել են նաև քաղաքային նոր անտառի ստեղծման աշխատանքները, որը ձգվում է Աշտարակից մինչև Երևան։ Այդ անտառը կարևոր է մայրաքաղաքի շրջակայքում շինարարության արդյունքում առաջացած օդի աղտոտվածության դեմ պայքարելու համար: Դավիթ Բեկի փողոցի և Սուրբ Սարգիս եկեղեցու երկայնքով տնկվել է շուրջ 6 հեկտար քաղաքային անտառ, իսկ ձմռանը տնկվել են մշտադալար բույսեր: Եվս մեկ խոշոր նախագիծ է իրականացվել Դավիթաշենում, որտեղ ստեղծվել է մոտ 5 հեկտար մակերեսով քաղաքային այգի", - պատմել է պաշտոնյան։

Տարվա ընթացքում, ինչպես հավելել է Բեգոյանը, կատարվել է նաեւ հին ծառերի փոխարինում, որոնք վտանգ էին ներկայացնում բնակիչների առողջության համար: ՊՈԱԿ-ի տնօրենի խոսքով ՝ ամբողջությամբ փոխարինվել են Թումանյան փողոցի, ինչպես նաև Աբովյան և Մելիք Ադամյան փողոցների "փտած" ծառերը:

Այդ բոլոր միջոցառումները, ինչպես նշել է Բեգոյանը, ուղղված են օդի որակի բարելավմանը, հատկապես՝ ձմռան շրջանում։ Քանի որ, ինչպես հավաստիացրել է պաշտոնյան, ամռան ամիսներին օդի որակը, իրենց դիտարկմամբ, մնում է նորմալ մակարդակի վրա։

Նշենք, որ չնայած քաղաքապետարանի պաշտոնյայի հավաստիացմանը՝ քաղաքի աննախադեպ կանաչապատման մասին, բնապահպաններն այլ կարծիքի են: Հայ բնապահպաններն արդեն երրորդ տարին ահազանգում են, որ քաղաքապետարանը էկոցիդ է իրականացնում քաղաքում  հանուն սեփական հարստացման ՝ այդ ոլորտում փողերի լվացման միջոցով: Բնապահպանության ոլորտի փորձագետները հակված են կարծելու, որ երկրում օդի աղտոտվածության բարձր մակարդակն այսօր պայմանավորված է մայրաքաղաքում լայնածավալ շինարարության ընթացքում բնապահպանական նորմերի չպահպանմամբ և քաղաքապետարանի կողմից մեծ, առողջ ծառերի հատմամբ և դրանք դեկորատիվ ծառերով փոխարինելով, որոնք չեն կարող կլանել այդպիսի քանակությամբ արտանետումներ: