Քաղաքագետ․ Ընդդիմադիր քաղաքական ուժերը պետք է խուսափեն այնպիսի հայտարարություններից և գործողություններից, որոնք կարող են վտանգել զարգացող հասարակական բողոքը

Արմինֆո. Հայաստանում նոր քաղաքացիական բողոք է զարգանում, և ընդդիմադիր քաղաքական ուժերը պետք է խուսափեն այնպիսի գործողություններից ու հայտարարություններից, որոնք կարող են վտանգել այն: Այդ մասին գրել է քաղաքագետ, "Այլընտրանքային նախագծեր" խմբի համահիմնադիր Վահե Հովհաննիսյանը ՝ երեկ տեղի ունեցած ֆիասկոյի ֆոնին, որը կրեցին իշխանությունն ու նրան հաարող եպիսկոպոսները՝ Ամենայն  հայոց Գարեգին Բ կաթողիկոսին գահընկեց անելու փորձի ժամանակ։

Քաղաքագետի ասելով՝ ստեղծված իրավիճակում հանրային գործիչների խնդիրն է՝ լայն հասարակության համար ձևավորել ընթացիկ հարցադրումներ և ստեղծել գործելու, ինքնաարտահայտվելու դաշտ։ Օրինակ, ինչպես պարզաբանել է Հովհաննիսյանը, հասարակությունը իրավունք ունի և պետք է իմանա, թե որ բենզալցակայաններում է վաճառվելու ադրբեջանական բենզինը։

Նշենք, որ դեկտեմբերի 18-ին Հայաստանի վարչապետ Նիկոլ Փաշինյանը հայտարարել է, որ Ադրբեջանից Հայաստան է ուղևորվում նավթամթերք փոխադրող գնացք: Հատկանշական է, որ Հայաստանի վարչապետը չի կարողացել պատասխանել այն հարցին, թե ինչ ծավալների մասին է խոսքը։ Միաժամանակ, նա համոզմունք է հայտնել, որ համապատասխան պայմանների ստեղծմանը նպաստել է Հայաստանի և Ադրբեջանի միջև հաստատված խաղաղությունը:

«Վստահաբար, լինելու են հարյուր հազարավոր քաղաքացիներ, որոնք բարոյական խնդիր են տեսնելու այստեղ և չեն ուզելու հարստացնել այն երկրի բյուջեն, որը զենք է առնում՝ մեզ վրա կրակելու համար։ Այն երկրից, որի զորքը Ջերմուկի գլխին է։ Մեր հարյուր հազարավոր քաղաքացիներ չեն ուզենալու գնել այն երկրի ապրանքը, որը գերեվարում ու ցմահ ազատազրկման է դատապարտում մեր արժանապատիվ հայրենակիցներին։ Ի վերջո, դա այն երկիրն է, որն այս պահին ֆիզիկապես ոչնչացնում է հազարամյա Արցախը։ Մարդն անասունից տարբերվում է ոչ նյութական արժեքներով, հիշողությամբ, արժանապատվությամբ։ Սա խաղաղության հաստատման հետ որևէ կապ չունի, սա արժանապատվության հարց է։ Ադրբեջանական բենզինի մերժումը քաղաքացիական կեցվածք է։ Քաղաքակիրթ աշխարհը, Եվրոպան ունեն բազմաթիվ նման օրինակներ, երբ այս կամ երկրի հասարակությունները մերժում էին որևէ երկրի ապրանքները՝ բարոյական-էթիկական նորմերից դրդված», - նշել է քաղաքագետը։

Հովհաննիսյանը նաեւ նշել է, որ թափ առնող պահանջատեր հասարակությունը շատ բնական ճանապարհով ձևակերպելու է հիմնական խնդիրը. պետք է կանգնեցնել մեկ հոգու կառավարումը։

«Մեկ հոգին չի կարող յոթը տարի երկրում ներքին լարվածություն ու թշնամանք քարոզել, մեկ հոգին չի կարող ամեն օր լարվածություն բերել։ Միայն երեկ հասցրել է 3 վտանգավոր միտք ձևակերպել, որից յուրաքանչյուրը կարող է նոր աղետ բերել երկրին։ Յոթ տարի շարունակ՝ մեր երկիրը վնասվում և ավերվում է նրա արտաբերած վտանգավոր մտքերի և արած վտանգավոր քայլերի պատճառով։

Հանրային դիմադրության պրոցեսն առողջ ճանապարհով խմորվում է և, ի վերջո, բերելու է պատմական ձևակերպմանը. «Караул устал»։

Երեկվա սոցիոլոգիան ամեն ինչ ասում է. հանեք ուժայիններին, հանեք բերովի, ցուցադրական աղմկոտներին, տակը մնում է «հոգևոր գաուլայթերների» խումբը, և ոչ մի այլ բան։ Իսկ նրանց դիմաց հասարակությունն է։ Որոշ ժամանակ հետո այս սոցիոլոգիական պատկերը Մայր Աթոռի բակից տարածվելու է ամբողջ երկրի մասշտաբով։ Մնում է՝ քաղաքական ուժերն անխոհեմ քայլերով ու սխալներով չվտանգեն առողջ ու հաղթող պրոցեսը», - ամփոփել է քաղաքագետը։