Թեհրանում դեմ են արտահայտվել Հայաստանի տարածքով "Թրամփի երթուղու " անցկացմանը

Արմինֆո.  Իսլամական հեղափոխության գերագույն առաջնորդի խորհրդական Ալի Աքբար Վելայաթին Հայաստանի դեսպան Գրիգոր Հակոբյանի հետ հանդիպմանը հայտարարել է, որ Կովկասի նկատմամբ "Թրամփի ծրագիր" կոչվածը  ոչ մի տարբերություն չունի "Զանգեզուրի միջանցք" կոչվող նախագծից, և Իրանի Իսլամական Հանրապետությունը կտրականապես դեմ է այդ նախաձեռնությանը։

Նա հայտարարել է, որ Իրանն ի սկզբանե դեմ է եղել "Զանգեզուրի միջանցքին", քանի որ Թեհրանը մերժում է տարածաշրջանային սահմանների ցանկացած փոփոխություն և զգուշանում է իրեն շրջապատող անվտանգության համար սպառնալիքներից:

Իրանցի պաշտոնյայի խոսքով՝ միջանցքը կարող է ապահովել ՆԱՏՕ-ի ներկայությունը Իրանից դեպի հյուսիս, ինչը անվտանգության լուրջ սպառնալիքներ կստեղծի Հյուսիսային Իրանի և Հարավային Ռուսաստանի համար: Նա հավելել է, որ "Թրամփի ծրագիրը", ըստ էության, նույն նախագիծն է, միայն փոփոխված անվանումով, և այժմ իրականացվում է ամերիկյան ընկերությունների՝ Հայաստան ներթափանցման միջոցով:

Վելայաթին ընդգծել է, որ պատմական փորձը որոշակի օրինաչափություն է դրսևորում. ամերիկյան կողմը հաճախ ներթափանցում է զգայուն տարածաշրջաններ տնտեսական նախագծերի իրականացման պատրվակով, սակայն ժամանակի ընթացքում նրանց ներկայությունն անխուսափելիորեն ընդլայնվում է ՝ հասնելով ռազմական և հետախուզական մասշտաբների: Նա նշել է, որ Իրանի սահմանների մոտ ԱՄՆ-ի հայտնվելը՝ ցանկացած ձևով, անվտանգության ոլորտում ակնհայտ սպառնալիքներ կառաջացնի:

Իր հերթին՝ Հայաստանի դեսպան Գրիգոր Հակոբյանը բանակցությունների ընթացքում երկու երկրների հարաբերությունները որակել է ռազմավարական և Թեհրանի հետ կապերի զարգացումը համարել Երևանի արտաքին քաղաքականության գլխավոր առաջնահերթություններից մեկը:

Ուշագրավ է, որ այդ հանդիպման վերաբերյալ ԻԻՀ-ում ՀՀ դեսպանության տարածած հաղորդագրության մեջ չի հիշատակվում Հայաստանի հարավով երթուղիների առնչությամբ իրանական կողմի դժգոհության փաստը: Հայաստանի դեսպանության տարածած հաղորդագրության մեջ նշվում է, որ զրուցակիցներն ընդգծել են երկկողմ հարաբերությունների պատմական և ռազմավարական բնույթը և դրանց հետագա խորացման փոխադարձ ձգտումը:

Դեսպանը ներկայացրել է Հայաստանի և Ադրբեջանի միջև խաղաղության գործընթացի վերջին զարգացումները: Վելայաթին ողջունել է երկու հարևան պետությունների միջև հարաբերությունների կարգավորմանն ու տարածաշրջանային կայունությանն ուղղված ջանքերը: