Քաղաքագետ․ Արշակ արքեպիսկոպոս Խաչատրյանի ձերբակալությունը կաթողիկոսի դիրքերը թուլացնելու գործընթացի շարունակությունն է

Արմինֆո. Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանի ձերբակալությունն Ամենայն հայոց Գարեգին Բ կաթողիկոսի դիրքերը թուլացնելու գործընթացի շարունակությունն է՝ դեկտեմբերի 10-12-ը եպիսկոպոսաց ժողովին ընդառաջ: Այդ մասին «Ֆեյսբուքի» իր էջում գրել է քաղաքագետ Սուրեն Սուրենյանցը։

Քաղաքաագետի ասելով՝ Սրբազանին առաջադրված մեղադրանքը կրում է տարիներով կիրառված, մաշված մի ձեռագրի բոլոր հատկանիշները՝ հիշեցնելով «մենթական» մտածողությանը բնորոշ «գրպանը պլան գցելու» մեխանիկան։

«Ըստ քննչական մարմինի՝ նա դեռ 2018-ին փորձել է վարկաբեկել Վեհափառի դեմ ակցիա իրականացնողներից մեկին՝ նրա պայուսակում թմրամիջոց դնելով։  Իրավական առումով՝ թույլ և անհամաչափ, փլուզվող մեղադրանք, քաղաքական իմաստով՝ հաշվեհարդարի դրսևորում:

Մի քանի դիտարկում.

Նախապես կանխատեսել էի, որ դեկտեմբերի 10–12-ը կայանալիք Եպիսկոպոսաց ժողովից առաջ իշխանությունը կսրի ճնշումները Վեհափառի նկատմամբ՝ փորձելով արհեստական հակադրության միջավայրում թուլացնել նրա դիրքերը։ Արշակ Սրբազանի ձերբակալությունը այդ գործընթացի օրգանական շարունակությունն է՝ ուղղված եկեղեցական վերնախավի նկատմամբ վերահսկողություն հաստատելուն։

Այս ամենի ֆոնին Բրյուսելը հայտարարում է Հայաստանին 12 միլիոն եվրո տրամադրելու մասին՝ «օտարերկրյա տեղեկատվական մանիպուլյացիաների» և «միջամտությունների» դեմ պայքարի անվան տակ։ ԵՄ ընդլայնման հարցերով հանձնակատարը բաց տեքստով նշում է, որ Ռուսաստանն ու նրա «պրոքսիները» ակտիվացնում են իրենց ցանցերը Հայաստանում՝ նույն բանաձևով, ինչ Մոլդովայում։

Այս հայտարարությունը ձևավորում է նոր քաղաքական միջավայր, որտեղ

հակառուսական խոսույթը ծառայում է ներքաղաքական ռեպրեսիաների լեգիտիմացման նպատակին։

Մոլդովական նախադեպը ցույց տվեց, թե ինչպես կարող է «վտանգների չեզոքացման» փաթեթը վերածվել իշխանության ավտորիտար վերարտադրության գործիքի՝ ընդդիմադիր ուժերի, մեդիայի, եկեղեցական կառույցների և հանրային հեղինակություն ունեցող անհատների դեմ ուղղված ռեպրեսիաներով։

Այս համատեքստում 12 միլիոն եվրոն դառնում է ոչ թե տեխնիկական աջակցություն, այլ քաղաքական ուղերձ Փաշինյանի կառավարությանը՝ շարունակելու ռեպրեսիաները «օտարերկրյա ազդեցությունների դեմ պայքարի» անվան տակ։

Հենց այդ համատեքստում էլ պետք է դիտարկել Արշակ Սրբազանի ձերբակալությունը՝ չեկիստական մեթոդներով իրականացված ակնհայտ սադրանք, որը որևէ կերպ չի համապատասխանում իրավական պետության չափանիշներին։

Մայր Աթոռի շուրջ ճնշումների օղակը վտանգավոր կերպով սեղմվում է։

Հայաստանը մտնում է նոր ռեպրեսիվ փուլ, որտեղ ազգային ինստիտուտները և հանրային հեղինակությունը դառնում են իշխանության վերարտադրության թիրախ», - գրել է Սուրեն Սուրենյանցը։

Հիշեցնենք, որ ավելի վաղ թմրանյութերի ապօրինի շրջանառության գործով ձերբակալվել էր Մայր Աթոռի դիվանապետ Արշակ արքեպիսկոպոս Խաչատրյանը: Արքեպիսկոպոսի փաստաբան Արսեն Բաբայանի խոսքով՝ իր պաշտպանյալը հրավիրվել էր ՔԿ՝ "հայտնի տեսանյութի գործով" ցուցմունք տալու: Հարցաքննությունից հետո նրանք դուրս են եկել ՔԿ գլխավոր մուտքից, որտեղ նրանց դիմավորել են ԱԱԾ աշխատակիցները, հայտարարելով, որ կա արքեպիսկոպոսին ձերբակալելու վերաբերյալ քննիչի որոշում: Ավելի ուշ հայտնի է դարձել, որ արքեպիսկոպոսը մեղադրվում է այն բանում, որ 2018 թվականին, իբր, վարկաբեկելու նպատակով թմրանյութ է դրել Վեհափառ հայրապետի դեմ բողոքի ակցիայի մասնակիցներից մեկի պայուսակի մեջ: Ավելի վաղ իշխանամետ հարթակներում տարածվել էր նաև տեսանյութ, որում, իբր, Արշակ արքեպիսկոպոսը կնոջ հետ է։ Տեսանյութի որակը շատ վատն է, և տեսանելի են դեմքի ընդհանուր գծերը։ Թե որտեղից է ստացվել տեսանյութը, դեռ հայտնի չէ։ Ինքը՝ հոգևորականը, բազմիցս ընդգծել է, որ որևէ առնչություն չունի այս տեսանյութի հետ։