Հայաստանի ԱԳ փոխնախարարը Վիեննայում ԵԱՀԿ նախարարական համաժողովի հարթակներում բանակցություններ է վարել մի շարք երկրների ներկայացուցիչների հետ

Արմինֆո. Վիեննայում՝ ԵԱՀԿ նախարարական համաժողովի 32-րդ նստաշրջանի շրջանակներում, ՀՀ ԱԳ նախարարի տեղակալ Ռոբերտ Աբիսողոմոնյանը հանդիպում է ունեցել Կանադայի ԱԳ նախարարի խորհրդարանական քարտուղար Ռոբերտ Օլիֆանտի հետ:
 

Հայաստանի ԱԳՆ հաղորդագրության համաձայն,  փոխնախարարը ներկայացրել է տարածաշրջանային վերջին զարգացումները` կարևորելով հաստատված խաղաղության հետագա ամրապնդումը և ինստիտուցիոնալացումը: Այս համատեքստում Ռոբերտ Աբիսողոմոնյանն ընդգծել է ՀՀ կառավարության «Խաղաղության խաչմերուկ» նախագծի և վերջինիս կարևոր բաղադրիչ «TRIPP ուղի» ծրագրի նշանակությունը տարածաշրջանում տրանսպորտային ենթակառուցվածքների ապաշրջափակման համատեքստում: 

Հանդիպման ընթացքում քննարկվել են նաև Հայաստան-Կանադա երկկողմ օրակարգին վերաբերող հարցեր: Ընդգծվել է երկու երկրների միջև քաղաքական երկխոսության հետագա խորացման կարևորությունը: Անդրադարձ է կատարվել փոխադարձ հետաքրքրություն ներկայացնող ոլորտներում, այդ թվում՝ առևտրատնտեսական բնագավառում, համագործակցության հեռանկարներին: Մտքեր են փոխանակվել 2026թ. Երևանում անցկացվելիք Կենսաբանական բազմազանության մասին ՄԱԿ-ի կոնվենցիայի կողմերի 17-րդ համաժողովի վերաբերյալ: ԱԳ նախարարի տեղակալ Ռոբերտ Աբիսողոմոնյանն ընդգծել է ՀՀ տեսլականը` ուղղված ներառական և արդյունավետ, ինչպես նաև միջազգային գործընկերների և բոլոր շահագրգիռ կողմերի լիարժեք ներգրավմամբ Համաժողովի կազմակերպմանը:

ԵԱՀԿ նախարարական համաժողովի 32-րդ նստաշրջանի շրջանակներում, ԱԳ նախարարի տեղակալ Ռոբերտ Աբիսողոմոնյանը հանդիպում է ունեցել նաեւ Իռլանդիայի՝ Եվրոպական և պաշտպանության հարցերով պետական ​​նախարար Թոմաս Բըրնի հետ:

Տարածաշրջանային զարգացումների համատեքստում ՀՀ ԱԳ նախարարի տեղակալը գործընկերոջն է ներկայացրել ՀՀ Կառավարության «Խաղաղության խաչմերուկ» նախագծի և դրա կարևոր բաղադրիչ «TRIPP ուղի» ծրագրի առանցքային նշանակությունը՝ Հարավային Կովկասում և դրանից անդին փոխկապակցվածության ընդլայնման հարցում:

Հանդիպմանն անդրադարձ է կատարվել Հայաստան-Իռլանդիա երկկողմ օրակարգի, ինչպես նաև ՀՀ-ԵՄ գործընկերության հավակնոտ ծրագրի շրջանակներում փոխգործակցության ընդլայնման հարցերին: Երկուստեք ընդգծվել է փոխադարձ հետաքրքրություն ներկայացնող ոլորտներում, մասնավորապես՝ նոր և նորագույն տեխնոլոգիաների բնագավառում, համագործակցության հետագա ընդլայման պատրաստակամությունը: 

Կողմերը քննարկել են բազմակողմ հարթակների  և միջազգային կազմակերպությունների

շրջանակներում Հայաստանի և Իռլանդիայի միջև համագործակցության հարցերը: Մտքեր են փոխանակվել Հայաստանում 2026թ. հյուընկալվելիք Կենսաբանական բազմազանության մասին ՄԱԿ-ի կոնվենցիայի կողմերի 17-րդ համաժողովի, ինչպես նաև Եվրոպական քաղաքական համայնքի 8-րդ գագաթնաժողովի անցկացման շուրջ: 

Վիեննայում ԱԳ նախարարի տեղակալ Ռոբերտ Աբիսողոմոնյանը հանդիպում է ունեցել  նաեւ Պորտուգալիայի եվրոպական հարցերով պետքարտուղար Ինես Դոմինգոսի հետ:

Զրուցակիցներն ընդգծել են բազմակողմ հարթակներում Հայաստանի և Պորտուգալիայի միջև ձևավորված արդյունավետ համագործակցության բարձր մակարդակը և վերահաստատել փոխադարձ հետաքրքրություն ներկայացնող հարցերի շուրջ միջազգային կազմակերպությունների շրջանակներում փոխգործակցության  ընդլայնման պատրաստակամությունը:

ՀՀ ԱԳ նախարարի տեղակալն իր գործընկերոջը է ներկայացրել ՀՀ տեսլականը 2026թ. Հայաստանում հյուրընկալվելիք Կենսաբանական բազմազանության մասին ՄԱԿ-ի կոնվենցիայի կողմերի 17-րդ համաժողովի և Եվրոպական քաղաքական համայնքի 8-րդ գագաթնաժողովի անցկացման առնչությամբ: Այս համատեքստում Ռոբերտ Աբիսողոմոնյանը վերահաստատել է ՀՀ հանձնառությունը՝ ուղղված COP17-ի և EPC-ի շրջանակներում ներառական, կառուցողական և համագործակցային երկխոսության ապահովմանը:

Անդրադարձ է կատարվել նաև ընդհանուր արժեքների վրա խարսխված ՀՀ-ԵՄ գործընկերության հավակնոտ օրակարգին:

Հանդիպման ընթացքում քննարկվել են նաև երկկողմ օրակարգին առնչվող հարցեր: Երկուստեք ընդգծվել է քաղաքական և տնտեսական կապերի խորացման կարևորությունը, ինչպես նաև նորարարական տեխնոլոգիաների ոլորտում ձևավորված համագործակցության հետագա զարգացումը: