Փաստաբան․ Վիգեն Էուլջեքչյանի առողջական վիճակը կտրուկ վատացել է Բաքվի բանտում

Արմինֆո. Ադրբեջանական բանտում ապօրինի պահվող լիբանանահայ Վիգեն Էուլջեքչյանի վիճակը կտրուկ վատացել է։ Այդ մասին ահազանգում է Արգենտինայից նրա փաստաբան Լուչիանա Մինասյանը։

Ինչպես ասվում է փաստաբանի հրապարակման մեջ, գերեվարված ՀՀ քաղաքացի Վիգեն Էուլջեքչյանը նոյեմբերի 16-ին 45 օրվա ընթացքում առաջին անգամ կարողացել է կարճատև զանգ կատարել ընտանիքին:

"Հարազատների ասելով՝ Վիգենն այլևս չի կարողանում քայլել։ Նա հաղորդել է, որ իր ֆիզիկական վիճակը կտրուկ վատացել է, և իրեն անվասայլակ է հարկավոր, սակայն այն չեն տրամադրում: Բժշկական օգնությունն ամբողջությամբ արգելափակված է: Նրան տարել են բժշկի մոտ, սակայն պահապանները թույլ չեն տվել ոչ մի դեղ տալ։ Փաստորեն, նա մնում է առանց բուժման:

Սնունդը նվազագույնի է հասցվում: Էուլջեքչյանը ստանում է միայն թեյ և հաց, ինչն ընտանիքը գնահատում է որպես սննդից կանխամտածված զրկում և անմարդկային վերաբերմունք:

Հատկապես ցինիկ է, որ դա տեղի է ունենում "Բաքվում թեյ խմելու" մասին Իլհամ Ալիևի  վերջին խոսքերի ֆոնին, որոնք ընտանիքն ընկալում է որպես ծաղր հայ բանտարկյալների տառապանքների նկատմամբ", - նշել է փաստաբանը ։

 Հայտարարության մեջ ընդգծվում է, որ նկարագրված պայմանները կարող են իրենցից ներկայացնել միջազգային մարդասիրական իրավունքի, բանտարկյալների մարդասիրական վերաբերմունքի իրավունքի, բանտարկյալների նկատմամբ վերաբերմունքի վերաբերյալ ՄԱԿ-ի նվազագույն ստանդարտ կանոնների (Մանդելայի կանոններ), դաժան, անմարդկային կամ արժանապատվությունը նվաստացնող վերաբերմունքի արգելքի կոպիտ խախտումներ:

Հարազատները կոչ են անում անհապաղ միջազգային միջամտության ՝ անկախ բժիշկների հասանելիություն, անվասայլակի, սննդի և դեղորայքի տրամադրում, ՄԱԿ-ի կառույցներին և իրավապաշտպան կազմակերպություններին հրատապ իրազեկում:

Հիշեցնենք, որ 46-ամյա Էուլջեքչյանը Հայաստանի և Լիբանանի քաղաքացի է, ով ադրբեջանական զինված ուժերի կողմից առևանգվել էր Լեռնային Ղարաբաղում 2020 թվականի նոյեմբերի 10-ին ՝ Հայաստանի և Ադրբեջանի միջև հրադադարի մասին համաձայնագրի կնքման հաջորդ օրը, որը վերջ դրեց Արցախյան 44-օրյա պատերազմին ։ Նա Ադրբեջանի կողմից պատանդ պահվող 6 քաղաքացիական անձանցից մեկն է։

Էուլջեքչյանը վերջին տարիներին արդեն երրորդ անգամ է հացադուլի մեջ։ 2023 թվականին նա 24-օրյա հացադուլ է հայտարարել այն բանից հետո, երբ նրան թույլ չէին տվել կնոջ հետ խոսել արաբերեն, պնդելով, որ  խոսի հայերեն, որին իր կինը չի տիրապետում։

Այս տարվա մայիսին նա երկշաբաթյա հացադուլ էր հայտարարել՝ կնոջ հետ հեռախոսային խոսակցությունների լիակատար արգելքի պատճառով։ Դրանից հետո նրան թույլ են տվել զանգահարել ամիսը մեկ անգամ։ Ըստ որոշ տեղեկությունների՝ նրա զանգը հունիսին հնարավոր է դարձել Կարմիր խաչի միջազգային կոմիտեի (ԿԽՄԿ) միջամտության շնորհիվ ։

Գերության հինգ տարիների ընթացքում Էուլջեքչյանը ենթարկվել է ֆիզիկական և հոգեբանական բռնության։ Ճշմարտության և արդարության կենտրոնի զեկույցի համաձայն ՝ գերեվարումից հետո Էուլջեքչյանին ծեծել են գիտակցության կորստի աստիճանի: Նրան նաեւ ձեւական մահապատժի են ենթարկել։ Հեռուստատեսությամբ հեռարձակվող հարցաքննությունների կադրերում Էուլջեքչյանի ձեռքի վրա, որտեղ նախկինում խաչի տեսքով դաջվածք է եղել, երեւում են այրվածքներ, ինչը ցույց է տալիս, որ նրա ձեռքն այրել են:

Ամենայն հավանականությամբ, Էուլջեքչյանին զրկել են նորմալ սննդից և բժշկական օգնությունից, ինչը հանգեցրել է մարսողական խնդիրների և, որպես հետևանք, քաշի կորստի և ցավերի: