Մոսկվայում արձագանքել են "հիբրիդային պատերազմների"մասին Երևանի դատողություններին

Արմինֆո.  ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Հայաստանից ավելի հաճախ հնչող դատողությունները "հիբրիդային պատերազմների" մասին, որոնք, իբր, տարվում են Երևանի նկատմամբ, հատկապես՝ 2026 թվականի հունիսին կայանալիք խորհրդարանական ընտրությունների ֆոնին։

Ռուս դիվանագետն արձանագրել է, որ, իրոք, հնչել են մի շարք նման արտահայտություններ ինչպես փորձագետների, այնպես էլ Հայաստանի պաշտոնատար անձանց կողմից, այդ թվում, օրինակ, Ազգային ժողովի նախագահ Ալեն Սիմոնյանի կողմից:

Զախարովան հիշեցրել է, որ "հիբրիդային պատերազմների" հայեցակարգը հորինել են և անմիջապես սկսել են գործնականում ակտիվորեն կիրառել ամերիկյան ռազմական տեսաբանները: Այս առումով նա նշել է, որ ոչ վաղ անցյալում Հայաստանի հարևան Վրաստանում "հավաքական Արևմուտքի" երկրները կրկին իրենց դրսևորեցին "հիբրիդային ողջ հմայքով". կոպտորեն միջամտում էին ներքաղաքական գործընթացներին, թեժացնում "մայդանային" տրամադրությունները, մերժում Թբիլիսիի զարգացման ուղի ընտրելու ազատությունը, զբաղվում բացահայտ քաղաքական շանտաժով ՝ սպառնալով զրկել առանց այդ էլ պատրանքային եվրահեռանկարից։

"Մեզ խորթ է նման մոտեցումը։ Մենք միշտ հարգել և հարգելու ենք ցանկացած ժողովրդի ինքնիշխան ընտրությունը։ Ընդ որում, չենք կարող չնշել, որ Հայաստանի դեմ "հիբրիդային պատերազմի" մասին հայտարարությունները հնչում են մեր երկրի հետ կապերի զարգացման կողմնակիցների հետապնդումների ֆոնին, կարծես թե, վերջին տարիներին այլ երկրներում, օրինակ, Մոլդովայում, մշակված սխեմայով", - փաստել է Ռուսաստանի ԱԳՆ պաշտոնական ներկայացուցիչը։

Նա, միաժամանակ, նշել է, որ Մոսկվայում պատրաստ են քննարկել հայ գործընկերների հնարավոր մտահոգությունները՝ ինչպես խորհրդարանական, այնպես էլ պրոֆիլային գերատեսչությունների միջև ռուսական կողմի առաջարկած խորհրդատվությունների շրջանակներում, այդ թվում, եթե անհրաժեշտ է, ռուս-հայկական հարաբերությունների շուրջ ձևավորվող տեղեկատվական ֆոնի շտկման նպատակով:

"Ռուսաստանը Հայաստանի համար միշտ եղել և մնում է հուսալի դաշնակից ։ Մոսկվան առանց հապաղելու օգնության է հասնում եղբայրական ժողովրդին ։ Վերջին օրինակներից ՝ 2024 թվականի հունիսին ռուս մասնագետները բառացիորեն հաշված շաբաթների ընթացքում վերականգնել են հեղեղումներից ավերված երկաթուղային գիծը երկրի հյուսիսում ։ Ս. թ. նոյեմբերին ամենակարճ ժամկետներում կազմակերպվեց ցորենի մատակարարումը մեր երկրից Հայաստան ՝ Ադրբեջանի և Վրաստանի տարածքով բացված երկաթուղային երթուղով: Առաջին խմբաքանակը ժամանել է ս. թ. նոյեմբերի 6-ի գիշերը: Ընդգծենք, որ այս իրադարձությունը մեծամասամբ հնարավոր է դարձել տարածաշրջանային հաղորդակցությունների ապաշրջափակմանն ուղղված եռակողմ աշխատանքային խմբի շրջանակներում ժամանակին ձեռնարկված ջանքերի և Ռուսաստանի, Հայաստանի և Ադրբեջանի ղեկավարների 2020-2022 թվականների պայմանավորվածությունների շնորհիվ", - ասվում է Զախարովայի հայտարարության մեջ, որը հրապարակվել է ՌԴ ԱԳՆ կայքում։

Եզրափակելով խոսքը ՝ նա արձանագրել է, որ մասնակցելով նշված հարավկովկասյան հանրապետությունների միջև հարաբերությունների կարգավորման գործընթացներին ՝ Ռուսաստանն անփոփոխ հետևողականորեն առաջնորդվում է նրանց ինքնիշխան ազգային շահերով: "Իսկ Արեւմուտքի միջնորդական ջանքերը դեռ պետք է անցնեն ժամանակի փորձություն", - ամփոփել է նա: