Հայաստանի ԱԺ նախագահը հույս ունի, որ Իլհամ Ալիևի որոշումը վերջնական չէ, և Ադրբեջանի ու Թուրքիայի ղեկավարները, այնուամենայնիվ, կժամանեն ԵՔՀ գագաթնաժողովին

Արմինֆո. Մենք պետք է պատրաստ լինենք այն բանին, որ ադրբեջանական պատվիրակություններն այցելելու են Երևան, իսկ հայկական պատվիրակությունները՝ Բաքու։ Այդ մասին հոկտեմբերի 31-ին լրագրողների հետ զրույցում հայտարարել է Ազգային ժողովի նախագահ Ալեն Սիմոնյանը՝ մեկնաբանելով Երեւանում կայանալիք Եվրոպական քաղաքական համայնքի (ԵՔՀ) գագաթնաժողովին մասնակցելուց Ադրբեջանի նախագահ Իլհամ Ալիեւի հրաժարվելը։

ԱԺ նախագահը հաղորդել է, որ վերջերս ադրբեջանցի գործընկերոջ հետ հանդիպման ընթացքում քննարկվել է նաեւ Հայաստանում անցկացված «Եվրանեսթ» ԽՎ-ի միջոցառմանը ադրբեջանական պատվիրակության չմասնակցելու հարցը: "Իմ գործընկերոջ հետ հանդիպման ժամանակ նա խնդրեց ինձ փոխանցել, որ իրենք Հայաստանի Հանրապետություն գալու առնչությամբ խնդիր չունեն, և  "Եվրանեսթ"-ին իրենց չմասնակցելը պայմանավորված է բացառապես այդ կազմակերպության հետ հարաբերություններով, և նրանք որևէ խնդիր չեն տեսնում մեր համագործակցության և փոխայցելությունների մեջ", - նշել է նա:

«Իհարկե, կան հարցեր, որոնք պետք է քննարկվեն, մասնավորապես, մեր գերիների և պահվող անձանց հարցը ամենամեծ խնդիրն է։ Այնուամենայնիվ, շփումները պահպանվում են, և մենք մտադիր ենք դրանք խորացնել ։ Երբ ես ասում եմ "մենք", նկատի ունեմ նաև ադրբեջանական կողմին։ Վերջին շփումներից ես հասկացա, որ մենք նույն ալիքի  վրա ենք", - ասել Է Սիմոնյանը։

Այդ առնչությամբ ԱԺ նախագահը հույս է հայտնել, որ Իլհամ Ալիևի այդ որոշումը վերջնական չէ, և Ադրբեջանի ու Թուրքիայի ղեկավարները, այնուամենայնիվ, կժամանեն ԵՔՀ գագաթնաժողովին: "Ամեն ինչ կանենք, որպեսզի Ալիևն ու Էրդողանը Հայաստանում հանգիստ զգան", - հավելել է նա:

Ավելի վաղ ՀՀ ԱԳ նախարար Արարատ Միրզոյանը հաղորդել էր, որ Թուրքիայի և Ադրբեջանի նախագահներ Ռեջեփ Թայիփ Էրդողանը և Իլհամ Ալիևը հրավիրվել են 2026 թվականի գարնանը Երևանում կայանալիք Եվրոպական քաղաքական համայնքի գագաթնաժողովին: Ավելի ուշ ադրբեջանական ԶԼՄ-ները հաղորդել են, որ Ալիևը չի ծրագրում մասնակցել հանդիպմանը, վկայակոչելով այն հանգաամաանքը, որ "երկկողմ հարաբերությունների անբավարար մակարդակը դեռևս թույլ չի տալիս նախագահ Ալիևի այցը Երևան դիտարկել որպես արդիական քայլ":

Հիշեցնենք, որ Եվրոպական քաղաքական համայնքի 8-րդ գագաթնաժողովը տեղի կունենա Հայաստանում՝ 2026 թվականի մայիսի 4-ին: Ինչպես հաղորդել է ՀՀ վարչապետ Նիկոլ Փաշինյանը, ինքը պաշտոնապես Երևան է հրավիրել մասնակից երկրների իր առաջատար գործընկերներին:

Եվրոպական քաղաքական համայնքը (European Political Community) միջկառավարական կազմակերպություն է, որը ստեղծվել է  2022 թվականի մայիսին՝ Եվրոպայի ապագայի վերաբերյալ քաղաքական և ռազմավարական քննարկումների համար՝ Ֆրանսիայի նախագահ Էմանուել Մարկոնի առաջարկով։ Մակրոնի նախագծի նպատակն է հարթակ տրամադրել եվրոպական բոլոր երկրների քաղաքականությունը համակարգելու համար և խթանել քաղաքական երկխոսությունն ու համագործակցությունը ՝ ընդհանուր հետաքրքրություն ներկայացնող հարցերի լուծման, եվրոպական մայրցամաքի անվտանգության, կայունության և բարգավաճման ամրապնդման համար, մասնավորապես ՝ կապված էներգետիկ ճգնաժամի հետ: Եվրոպական քաղաքական համայնքին անդամակցում են նաև ԵՄ անդամ չհանդիսացող երկրները, ինչպիսիք են Միացյալ Թագավորությունը, Ադրբեջանը, Իսլանդիան, Ուկրաինան և Մոլդովան, Թուրքիան, Վրաստանը և Հայաստանը:

Այն մասին, որ Հայաստանը պատրաստվում է իր մոտ անցկացնել այդ միջոցառումը, առաջին անգամ հանրությունը տեղեկացել է Ռուսաստանի արտգործնախարար Սերգեյ Լավրովից ։ Երեւանում հայ-ռուսական համալսարանում կայացած հանդիպման ժամանակ Լավրովը հայտարարել էր, որ ռուսական կողմը հայ գործընկերների հետ բանակցություններում գնահատական է տվել այդ նախաձեռնությանը: Նախարարը հույս էր հայտնել, որ այդ գնահատականը հասկանալի է և հարգանքով կընկալվի, ինչպես ՌԴ-ն հարգանքով է ընկալում ԱՊՀ և ՀԱՊԿ շրջանակներում գործընկերների և դաշնակիցների գործողությունները: Բանն այն է, որ գագաթաժողովն ի սկզբանե նախաձեռնվել էր որպես ԵԱՀԿ եվրոպական անդամների մասնակցությամբ ձևաչափ՝ բացի Ռուսաստանից և Բելառուսից։ ՌԴ արտաքին քաղաքական գերատեսչության ղեկավարի խոսքով՝ միայն այդ հանգամանքն արդեն ցույց է տալիս, թե հանուն ինչի է ստեղծվել այդ համայնքը ։