Փորձագետը ՝ նորաձևության մասին․ Ոչ թե կրթությունն է նորաձև, այլ նորաձև է մասնագետ լինելը

Արմինֆո.Տարիներ առաջ , երբ մենք նոր էինք սկսում, հայ դիզայներներն ավելի մասնագիտորեն էին մոտենում իրենց աշխատանքին, ունեին ոգեշնչման աղբյուր, պրոֆեսիոնալ կերպով ներկայացնում էին իրենց մտահղացումը, իրենց խոսքը, ունեին բրենդի ԴՆԹ: Նման կարծիք է հայտնել դիզայներ, Harmony ապրանքանիշի հիմնադիր Միկա Դանիելյանը՝ հոկտեմբերի 24-ին 3-րդ Yerevan Fashion Week (YFW) շրջանակում անցկացվող Fashion Talks-ի ժամանակ ։

"Հիմա նորաձևությունը, կարելի է ասել, սեզոնային է դարձել. կես տարին  նոր բան է ստեղծվում, բայց երբ նայում ես նոր դիզայներներին, չես հասկանում ՝ դիզայները բրենդի ԴՆԹ ունի, թե ոչ, ինչ է ուզում ասել իր սպառողին", - նշել է նա:

Դանիելյանն ուշադրություն է հրավիրել այն հանգամանքի վրա, որ, նույնիսկ, տաղանդավոր երիտասարդ դիզայներների առկայության դեպքում նրանց ստեղծած վերջնական արտադրանքը գոհացուցիչ չէ: Վերջինս, ըստ նրա, սահմանափակվում է էսքիզներով, իսկ կարելը պատվիրակում են դերձակուհիներին։ Սակայն, Դանիելյանի կարծիքով, դիզայները պետք է հասկանա այն ամենը, ինչ վերաբերում է արդյունաբերությանը ։ "Նրանք պետք է պատկերացում ունենան կտրվածքի, գործվածքների, տեխնիկայի և այլնի մասին: էսքիզը կարող է շատ տաղանդավոր լինել, բայց դերձակուհին կարող է ասել, որ անհնար է ստանալ այն, ինչ պատկերված է թղթի վրա: Բայց մենք հակառակն ենք ապացուցում, քանի որ դիզայներների մեր սերունդը հասկանում է հյուսվածքները , գործվածքները, կտրվածքները, և մենք ասում ենք, որ դա հնարավոր է ստանալ այս կամ այն տեխնիկան կիրառելով, այս կամ այն գործվածքն օգտագործելով և այլն", - ասել է փորձագետը։

Ընդ որում, նա չի համաձայնել "կրթվելը նորաձեւ է" կարգախոսին։ Դանիելյանն այդ առումով նշել է, որ մեր շուկան լի է դիզայներներով, որոնք, ցավոք, այսօր պետք չեն, քանի որ Հայաստանում չկա այդքան զարգացած թեթեւ արդյունաբերություն, չկան այդքան կետեր իրենց դիզայներական արտադրանքի իրացման համար, բացի այդ, մի շարք հարակից մասնագետների, այդ թվում ՝ կոնստրուկտորների, տեխնոլոգների, դերձակների սուր պակաս կա: "Մասնագետների պակասն իրականում մեծ խնդիր է, և այն առկա է Հայաստանի գրեթե բոլոր ոլորտներում ։ Հետևաբար, ոչ թե կրթությունն է նորաձեւ, այլ նորաձեւ է մասնագետ լինելը", - ընդգծել է Harmony բրենդի հիմնադիրը։

Նշենք, որ Երևանի նորաձևության շաբաթն անցկացվում է հոկտեմբերի 24-26-ը "Մերիդիան" էքսպո կենտրոնում: Նախաձեռնողը Նորաձևության և հագուստի պալատն է ։