Փաստաբան․ Մասիսի քաղաքապետի պատժի ժամկետը երկարաձգվել է՝ համաներում կիրառելու հնարավորությունը բացառելու նպատակով

Արմինֆո. Մասիսի քաղաքապետ Դավիթ Համբարձումյանի պատժի ժամկետը երեք ամսով երկարաձգվել է, որպեսզի նա համաներումից չօգտվի: Այդ մասին ֆեյսբուքյան իր էջում հայտարարել է Համբարձումյանի փաստաբան Տիգրան Աթանեսյանը։

Նա հիշեցրել է, որ քրեական գործը հարուցվել էր 2018 թվականին՝ նույն թվականի ապրիլին Հայանիստ և Հովտաշատ գյուղերի խաչմերուկում տեղի ունեցած դեպքերի կապակցությամբ: "Այս գործի շրջանակներում Դավիթ Համբարձումյանին մեղադրանք է առաջադրվել ՀՀ նախկին քրեական օրենսգրքի 250-րդ հոդվածի 4-րդ մասով, որը վերաբերում է "զինված խուլիգանությանը", - պարզաբանել է փաստաբանը:

Աթանեսյանը նշել է, որ այդ ժամանակահատվածում Մասիսի քաղաքապետի նկատմամբ պետք է կիրառվեր համաներում, որը հայտարարվել էր 2019 թվականի աշնանը: "Սակայն այժմ դատարանը միտումնավոր ավելացրել է ևս երեք ամիս և խափանման միջոց է կիրառել կալանքը՝ նրան համաներման իրավունքից զրկելու համար։ Այսպիսով՝ 2019 թվականից դատարաններում գտնվող գործը վերջապես ավարտվեց", - հավելել է Աթանեսյանը։

Անդրադառնալով այդ գործով վկաներին՝ փաստաբանը պարզաբանել է, որ 4 հոգի ցուցմունք է տվել Համբարձումյանի դեմ, որոնք իրականության հետ կապ չունեն: Հետագայում, նրա խոսքով, նրանցից երեքը հրաժարվել են իրենց ցուցմունքներից, իսկ չորրորդը խայտառակվել է (փաստաբանը չի մանրամասնել, թե կոնկրետ ինչ նկատի ուներ - խմբ.): "Հետաքրքիր է, որ դատաքննության ժամանակ չորսն էլ պնդում էին, որ Դավիթ Համբարձումյանը նշված օրերին որևէ հակաիրավական գործողություն չի կատարել: Այսինքն, ըստ էության, վկաները համոզիչ ցուցմունքներ չեն տվել, ինչը խանգարել էր դատավորին այն ժամանակ մեղադրական դատավճիռ կայացնել", - նշել է փաստաբանը։

Վերն ասվածի առնչությամբ Աթանեսյանն ընդգծել է, որ զարմացած չէ ընթացիկ զարգացումներից ։ "Մի երկրում, որտեղ կալանավորում են արքեպիսկոպոսների և բարերարների, ինչպես նաև՝ բազմաթիվ անմեղ մարդկանց, դատարանից արդար դատաքննություն ակնկալելը, հատկապես, վարչապետի ընդդիմադիր թեկնածուի գործով, ով Մասիս համայնքում հաղթել է կառավարող "Քաղաքացիական պայմանագիր" կուսակցության նկատմամբ, միամտություն կլինի",- եզրափակել է փաստաբանը:

Հիշեցնենք, որ դատարանը Հայաստանի հանրապետական կուսակցության կողմից որպես ՀՀ վարչապետի թեկնածու առաջադրված Մասիսի քաղաքապետ Դավիթ Համբարձումյանին դատապարտել էր 6 տարի 3 ամիս ժամկետով ազատազրկման: Նա մեղադրվում էր 2018 թվականի "զանգվածային անկարգություններ կազմակերպելու և դրանց մասնակցելու"գործով: Այն ժամանակ Համբարձումյանն ազատ էր արձակվել 5 մլն դրամ գրավի դիմաց և չհեռանալու մասին ստորագրությամբ։