Փաստաբանների պալատի նախագահը դատապարտել է փաստաբան Կոչուբաևի ձերբակալման ժամանակ անհամաչափ ուժի կիրառումը

Արմինֆո. Փաստաբան Ալեքսանդր Կոչուբաևի ձերբակալությունը և դրա դաժան ձևն անթույլատրելի են և դատապարտելի: Այդ մասին հայտարարել է Փաստաբանների պալատի նախագահ Սիմոն Բաբայանը։

«Համացանցում հայտնվել է փաստաբան Ալեքսանդր Կոչուբաևի ձերբակալությունը պատկերող տեսանյութ։ Դրանում պարզորոշ երևում է, որ բռնության հետ չկապված՝ միջին ծանրության հանցանքի մեջ մեղադրվող անձը ձերբակալվում է ցուցադրական նվաստացման տարրեր պարունակող եղանակով՝ դիմակավորված իրավապահների կողմից, ասֆալտին պառկեցնելու միջոցով: Նման եղանակով անհամաչափ ուժի կիրառությունը քաղաքացու, հատկապես՝ փաստաբանի նկատմամբ, դառնում է պատժիչ գործիք: Արատավոր այս պրակտիկան դատապարտելի է», - գրել է Սիմոն Բաբայանը՝ «Ֆեյսբուքի» իր էջում։

Հայտնի փաստաբան, Contra Legem փաստաբանական ընկերության ղեկավար Ալեքսանդր Կոչուբաևը ձերբակալվել էր հոկտեմբերի 16-ին Շենգավիթի դատարանից դուրս գալիս, որտեղ ընթանում էր Բագրատ արքեպիսկոպոս Գալստանյանի եւ իշխանությունների կողմից մեղադրվող եւս 17 մարդու գործով դատական նիստը: Ավելին, իշխանամետ դատավոր Մասիս Մելքոնյանն արդեն վճիռ է կայացրել փաստաբանին երկու ամսով կալանավորելու վերաբերյալ։

Հայ Առաքելական Եկեղեցու ներկայացուցիչներին աջակցող իրավաբանական հանրության նկատմամբ հոգեբանական ներգործության նպատակով ձեռնարկված կոպիտ ձերբակալության առիթը նրա գրառումն էր սոցցանցերում, որտեղ փաստաբանն այնքան էլ պատշաճ չի արտահայտվել իրավապահ համակարգի և հենց Հայաստանի իշխանությունների մասին: "Հոգին սատանային վաճառած քննիչներ, դատախազներ, դատավորներ ձեր պատիժը երկնային է լինելու, աղոթում եմ Տիրոջը ձեզ չների և պատիժը քավեք սերունդներով։

Մկրտիչ Սրբազանը ծառայությունը կշարունակի ԿԿԲ պադվալում, բայց դուք ոնց շատ տղա կայիք էտ ձև էլ մնացիք։

Հ.գ. Ու չհամարձակվեք ասեք տուն ենք պահում, ես էլ էի տուն պահում, երբ 2018 թվականին սատանաների ավազակավորջը եկավ իշխանության, ես էլ սպա էի ու ուսադիրը սրանց վրա շպռտելը եղել է կյանքիս ամենաբարդ որոշումը, բայց տուն պահել կարելիա արդար քրտինքով, ոչ թե ձեր պես աշխատավարձ ծծելով", - գրել է Կոչուբաեւը։

Փաստաբանը հավելել է նաև մի քանի անպարկեշտ արտահայտություն, սակայն, ըստ նրա գործընկերների, ովքեր իրենց վերաբերմունքն են արտահայտել միջադեպի վերաբերյալ, դրանցից ոչ մեկը որպես ոչ անձնավորված վիրավորանք չի ընկնում Քրեական օրենսգրքի հոդվածների տակ:

Ըստ երևույթին, այդ արտահայտությունները խիստ վիրավորել են նրա նախկին գործընկերներին, քանի որ Կոչուբաևը երկար ժամանակ աշխատել է Ոստիկանության համակարգում, ինչպես նաև նրանց, ովքեր այսօր քաղաքական դրդապատճառներով պատրաստ են բանտ նետել Հայ Առաքելական Եկեղեցու ողջ ղեկավարությանը։