Բաքուն պնդում է. «պատմական հնարավորությունը ճիշտ գնահատելու և խաղաղության պայմանագիրն ստորագրելու համար», պարզապես, անհրաժեշտ է վերանայել Հայաստանի սահմանադրությունը

Արմինֆո.Ադրբեջանի արտաքին գործերի նախարար Ջեյհուն Բայրամովը Թյուրքական պետությունների կազմակերպության արտգործնախարարների խորհրդի նիստում հերթական անգամ հայտարարել է, որ "խաղաղության պայմանագրի ստորագրման համար անհրաժեշտ է վերացնել Հայաստանի տարածքային հավակնություններն Ադրբեջանի նկատմամբ":

Ինչպես հաղորդում են ադրբեջանական ԶԼՄ-ները, Բայրամովը նշել է, որ ձևավորվող նոր միջազգային անվտանգության ճարտարապետության մեջ Թյուրքական պետությունների կազմակերպությունը որպես ուժերի միավորման խորհրդանիշ ավելի կարևոր դեր խաղալու ներուժ ունի: "Տասնամյակներ շարունակ հակամարտության մեջ գտնվող Հայաստանի հետ կարգավորման գործընթացի ուղղությամբ Ադրբեջանի հետևողական ջանքերն ու նպատակաուղղված գործողությունները նույնպես ուղղված են մեր տարածաշրջանում խաղաղության և կայունության հաստատմանը", - ասել է նա:

Ջեյհուն Բայրամովը նաև նշել է, որ "այն բանից հետո, երբ 2023 թվականին Ադրբեջանը լիովին վերականգնեց իր ինքնիշխանությունը, Հայաստանի հետ հարաբերությունների կարգավորմանն ուղղված կողմերի անմիջական շփումներն ու համատեղ ջանքերն ավելի ինտենսիվ դարձան"։

«Այդ համատեքստում օգոստոսի 8-ին ԱՄՆ-ում կայացած գագաթաժողովն ու ստորագրված փաստաթղթերը պատմական նշանակություն ունեն: Այդ պատմական հնարավորությունը ճիշտ գնահատելու և խաղաղության պայմանագիր ստորագրելու համար անհրաժեշտ է, որ Հայաստանը վերացնի Ադրբեջանի նկատմամբ տարածքային պահանջները, որոնք ամրագրված են ՀՀ սահմանադրության մակարդակով", - հայտարարել է նա։

Հիշեցնենք, որ օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Վաշինգտոնում ստորագրել են "խաղաղության մասին" յոթ կետից բաղկացած համատեղ հռչակագիր: Այն նախատեսում է համատեղ դիմում Եվրոպայի անվտանգության եւ համագործակցության կազմակերպությանը (ԵԱՀԿ) ԵԱՀԿ Մինսկի գործընթացի եւ դրա հետ կապված կառույցների դադարեցման մասին, ինչպես նաեւ Հայաստանի տարածքով տրանսպորտային միջանցքի ստեղծում, որը կմիացնի Ադրբեջանը իր նախիջեւանյան էքսկլավին: TRIPP նախագիծը (Trump Route for International Peace and Prosperity, թարգմանաբար ՝ «Միջազգային խաղաղության և բարգավաճման Թրամփի ճանապարհ», Հայաստանի հարավում գտնվող 42 կմ ճանապարհ, որի կառավարումը 99 տարով կտան ԱՄՆ-ին), փորձագետների կարծիքով, կարող է էապես փոխել աշխարհաքաղաքական իրավիճակը Հարավային Կովկասում:

Նշենք նաև, որ ՀՀ վարչապետ Նիկոլ Փաշինյանը բազմիցս ամենատարբեր հարթակներից հայտարարել է, որ Հայաստանի սահմանադրությունը տարածքային պահանջներ չի պարունակում Ադրբեջանի նկատմամբ: Մինչդեռ , Ադրբեջանի սահմանադրությունը տարածքային պահանջներ է պարունակում Հայաստանի Հանրապետության նկատմամբ։ "Դրանում հղում կա 1991թ. անկախության ակտին, ինչպես նաեւ 1918թ. Ադրբեջանի անկախության հռչակագրին, որտեղ նշված է, որ այսօրվա Ադրբեջանը Ադրբեջանի առաջին Հանրապետության իրավահաջորդն է, որտեղ հիշատակվում են Հարավային եւ Արեւմտյան Անդրկովկասը որպես նրա մաս, եւ տարածքային հավակնություններ կան Տավուշի,

Գեղարքունիքի եւ Արարատի մարզերի նկատմամբ: Մեր սահմանադրության համեմատ ՝ Ադրբեջանի սահմանադրությունը տարածքային պահանջներ է պարունակում Հայաստանի նկատմամբ։ Մենք այդ հարցը չենք բարձրացնում, որովհետև խաղաղության պայմանագրի համաձայնեցված հոդվածներում արդեն կա այն, որ կողմերից ոչ մեկը չի կարող հղում կատարել իր ներքին օրենսդրական ակտերին", - ավելի վաղ հայտարարել էր Փաշինյանը