ՀԷՑ-ի ժամանակավոր կառավարիչը պարզաբանել է, թե ինչի հետ է կապված ՀԷՑ-ի վարկանիշի իջեցումը, եւ սպառնացել նոր պաշտոնանկություններով

Արմինֆո.  "Հայաստանի էլեկտրական ցանցերի" վարկանիշը Moody ' s-ի գնահատականով մեկ բալ բարձր էր Հայաստանի սուվերեն վարկանիշից ։ Ինձ տարօրինակ էր թվում, որ պետական լիցենզիա ունեցող ընկերությունը սուվերեն վարկանիշից բարձր վարկանիշ ունի։ Այդ մասին սեպտեմբերի 20-ին լրագրողների հետ զրույցում հայտարարել է ՀԷՑ-ի ժամանակավոր կառավարիչ Ռոմանոս Պետրոսյանը,  մեկնաբանելով տեղեկություններն այն մասին, որ վերջերս Moody ' s Ratings-ը նվազեցրել է ՀԷՑ-ի երկարաժամկետ կորպորատիվ վարկանիշը (CFR) “Ba2”-ից մինչեւ “Ba3”,  եւ դեֆոլտի հավանականության վարկանիշը (PDR)` "Ba2-PD"-ից մինչեւ <Ba3-PD>, կանխատեսումը` “բացասական”:

“Մյուս կողմից, սա կրկին իմ անձնական վերլուծությունն է: Կարծում եմ ՝ վարկանիշի նվազումը կապված է նաև բացահայտումների, որոշ փաստերի հետ, որոնք հայտնի են դարձել ժամանակավոր կառավարչի գործունեության շնորհիվ։

Ինչ վերաբերում է գործընթացի մնացած հատվածին, ես գործում եմ օրենքով ինձ վերապահված լիազորությունների շրջանակներում ։ Օրենքների այդ փաթեթը ներկայումս վիճարկվում է Սահմանադրական դատարանում, և քանի դեռ չկա որոշում, քանի դեռ չկա դատական ակտ, բնականաբար, ամեն ինչ իրավաչափ է և օրինական, որևէ տարօրինակ բան չկա", - ասել է նա:

Դիտարկմանը, թե կառավարությունն արդեն անավարտ է թողել միջազգային արբիտրաժին վերաբերող մեկ դատական ակտ, Ռոմանոս Պետրոսյանը պատասխանել է. "Դա ոչ թե դատական ակտ էր, այլ որոշում, որը պետք է ի կատար ածվեր ներպետական դատական մարմինների կողմից, որից հետո այն կդառնար պարտադիր կատարման ենթակա։ Ես չեմ ուզում այյլեւս դա մեկնաբանել":

ՀԷՑ-ի ժամանակավոր կառավարիչը հերքել է տեղեկությունն այն մասին, որ ստանում է մոտ 7 միլիոն դրամ աշխատավարձ: “Այդ տեղեկատվությունը սխալ է, ավելին ասեմ, դրանք անձնական տվյալներ են, ես չեմ ուզում հրապարակել, բայց դուք դա կտեսնեք նաև իմ հայտարարագրում: Սուբյեկտներին, ովքեր նման թվեր են նշում․ ես և իմ նշանակած թիմը հրաժարվել ենք այդ սուբյեկտների ստացած բազմամիլիոնանոց և տասնյակ միլիոնավոր դրամների բոնուսներից և դրանք ուղարկել ենք ՀԷՑ-ի նվազագույն սոցիալական շեմից ցածր գտնվող ավելի քան 1000 մարդու", - հայտարարել է նա։

Անդրադառնալով Երևանի կենտրոնում Էլեկտրաէներգիայի անջատմանը, որը հանգեցրել է մայրաքաղաքում 10 բալանոց խցանման, և Երևանյան 17-րդ միջազգային երաժշտական փառատոնի բացման ուշացմանը, Պետրոսյանը նշել է. "ՀԷՑ-ի էներգետիկ ենթակառուցվածքն այնքան է մաշվել, որ հնարավոր չէ բեկումնային փոփոխություններ իրականացնել մեկ, երկու, երեք, հինգ, վեց ամսում: Բայց կարող եմ ձեզ վստահեցնել, որ մեկուկես ժամ տևած անջատումները, եթե չլիներ պետության միջամտությունը, կտևեին գուցե երեք-վեց ժամ։ Երկրորդ՝ որոշակի սխալ է եղել նաև նույն սեփականատերերի հետ փոխկապակցված կապալառու ընկերություններից մեկի կողմից, ինչն էլ հանգեցրել է անջատումների, ինչի կապակցությամբ երկուշաբթի ՀԷՑ - ում կլինեն հեռացումներ, իսկ գործընկերոջ նկատմամբ կկիրառվեն պայմանագրով նախատեսված պատժամիջոցները", - պատասխանել է Ռոմանոս Պետրոսյանը։

Նշենք, որ Moody ' s Ratings - ի հաղորդագրության համաձայն, "ՀԷՑ"-ի վարկանիշների իջեցումն արտացոլում է պետության ազդեցության եւ կարգավորիչ ռիսկերի աճող ազդեցությունը 2025 թվականի հուլիսին օրենսդրական փոփոխությունների ընդունման արդյունքում, որոնք կառավարությանը թույլ են տալիս ազգայնացնել ընկերությունը, իսկ կարգավորողին ՝ որոշակի դեպքերում նախաձեռնել սահմանված վարչական ընթացակարգեր:

“Moody ' s - ը թեև չի ակնկալում վարկունակության վրա ազդող որևէ բացասական սցենարի իրականացում, սակայն ուշադրություն է հրավիրում այն փաստի վրա, որ վերջին օրենսդրական և նորմատիվ փոփոխությունները մատնանշում են ՀԷՑ-ի ՝ կարգավորիչ և գործարար միջավայրի հետ կապված ռիսկերի նկատմամբ աճող ազդեցությունը: Արդյունքում, Moody ' s - ն այլեւս չի կարծում, որ ընկերության վարկանիշն ավելի բարձր մակարդակի վրա է, քան Հայաստանի կառավարության սուվերեն վարկանիշը ("Ba3" ՝ “կայուն” կանխատեսմամբ)", - ասված է փաստաթղթում: