ԱՄՆ Կոնգրես է ներկայացվել Ադրբեջանի նկատմամբ պատժամիջոցների վերանայման մասին օրինագիծ

Արմինֆո. ԱՄՆ կոնգրեսականներ Դինա Տիտուսը և Գաս Բիլիրակիսը ներկայացրել են "Ադրբեջանի նկատմամբ պատժամիջոցների վերանայման մասին" երկկուսակցական օրինագիծ, որը Թրամփ-Վենսի վարչակազմին կպարտավորեցնի վերանայել Մագնիտսկու գլոբալ օրենքի շրջանակներում պատժամիջոցների կիրառելիությունը պատերազմական հանցագործությունների, մարդու իրավունքների խախտումների և հայ ռազմագերիների ու քաղաքացիական պատանդների շարունակական ապօրինի կալանքի տակ պահելու համար պատասխանատու ադրբեջանցի պաշտոնյաների նկատմամբ: Այդ մասին հաղորդում է Ամերիկայի Հայ դատի հանձնախումբը (ANCA):

Սփյուռքյան կազմակերպությունից հաղորդել են, որ Ամերիկայի Հայ դատի հանձնախումբը ողջունել է օրինագծի ներկայացումը և համազգային արշավ է սկսում ՝ երկկուսակցական լայն աջակցություն ապահովելու համար:

ANCA-ում նաև ընդգծել են, որ օրինագծի հիմնավորման մեջ շարադրված են Ադրբեջանի հանցագործությունները, այդ թվում ՝ 2020 թվականի պատերազմը, 2023 թվականի ցեղասպանության ակտերը և հայ բանտարկյալների նկատմամբ ապօրինի կալանքի, խոշտանգումների և կեղծ դատավարությունների շարունակվող քաղաքականությունը: "Ադրբեջանում կալանավորների պահումը, խոշտանգումները, արտադատական մահապատիժները և մարդու իրավունքների այլ կոպիտ խախտումները լրջորեն կասկածի տակ են դնում մարդու իրավունքները հարգելու և արդար ու կայուն խաղաղության շուրջ բանակցություններ վարելու նրա պատրաստակամությունը", - ասվում է օրինագծի հիմնավորման մեջ:

"Լաչինի միջանցքի անօրինական, մեկ տարի տևած շրջափակումից հետո Ադրբեջանը պարենը զենքի վերածեց և սովամահ արեց 120 000 արցախահայության։ Ալիևի կառավարությունը մերժել է զորքերի դուրսբերման և լարվածության թուլացման միջազգային կոչերը և հարձակվել Արցախի վրա ։ Տարիներ շարունակ այդ հողերի բնակիչները համակարգված աքսորվել են ՝ դառնալով ագրեսորի զոհ։ Երեխաները զրկված էին սնունդից և ջրից, դպրոցում սովորելու հնարավորությունից, իսկ քրիստոնեական սրբավայրերը պղծվում էին։ Ժամանակն է պատասխանատվության ենթարկել Ալիևին և նրա կողմնակիցներին, այլ ոչ թե պարգևատրել նրանց ռազմական օգնությամբ և ներդրումային համաձայնագրերով", - օրինագիծը ներկայացնելիս ասել է կոնգրեսական Տիտուսը:

Կոնգրեսական Բիլիրակիսը համաձայնել է նրա հետ, նկատելով, որ չնայած այն հանգամանքին, որ անցյալ ամիս Ադրբեջանի և Հայաստանի միջև խաղաղության հռչակագրի ստորագրումը կարող է առաջընթացի նշան լինել, տարածաշրջանը շարունակում է գտնվել քաղաքական և հումանիտար ճգնաժամի մեջ, որն առաջացել է Ադրբեջանի ագրեսիայի հետևանքով: "Ես հպարտ եմ, որ կրկին օրինագիծ եմ ներկայացնում, որը կպարտավորեցնի նախագահին որոշել, թե արդյոք Մագնիտսկու պատժամիջոցները պետք է կիրառվեն ադրբեջանցի բարձրաստիճան պաշտոնյաների նկատմամբ, որոնք պատասխանատու են արցախահայության էթնիկ զտումների և երկրի ներսում քաղաքական ընդդիմության ճնշման համար: Ամերիկացի հարկատուների փողերը չպետք է օգտագործվեն դաժան ռեժիմին աջակցելու համար, հատկապես, երբ այդ ռեսուրսները կարելի էր ծախսել հրատապ ներքին խնդիրների լուծման վրա", - հավելել է նա։

Օրինագիծը նախագահին կպարտավորեցնի 180 օրվա ընթացքում որոշել, թե արդյոք ավելի քան 50 ադրբեջանցի պաշտոնյաներ, այդ թվում ՝ բարձրաստիճան զինվորականներ, անվտանգության ծառայությունների ղեկավարներ, դատախազներ եւ դատավորներ, համապատասխանում են պատժամիջոցների չափանիշներին՝ համաձայն Մագնիտսկու գլոբալ օրենքի կամ Պետդեպարտամենտի ֆինանսավորման մասին օրենքի 7031(c) բաժնի:

Քանի որ Հայաստանի եւ Ադրբեջանի միջեւ խաղաղ բանակցությունները չեն հանգեցրել արդարության վերականգնման կամ հայ բանտարկյալների ազատ արձակման, այս օրինագիծը կարեւոր քայլ է Ալիեւին եւ նրա համախոհներին ԱՄՆ օրենսդրության համաձայն պատասխանատվության ենթարկելու ճանապարհին