Սամվել Կարապետյանը հանդես է եկել առաջիկա օրերին «Մեր ձևով» շարժում ստեղծելու մասին հայտարարությամբ

Արմինֆո."Տաշիր" ընկերությունների խմբի նախագահ Սամվել Կարապետյանը հանդես է եկել առաջիկա օրերին «Մեր ձևով» շարժում ստեղծելու մասին հայտարարությամբ: Այդ մասին նա հաղորդել է իր հայտարարության մեջ, որը տարածել է  Սամվել Կարապետյանի պաշտպանություն խորհուրդը։

«Սիրելի՛ հայրենակիցներ, ուշադրության արժանի երկու իրադարձություն է սպասվում առաջիկա օրերին։ Առաջինը. վաղը տեղի է ունենալու իմ ապօրինի կալանքի վերաբերյալ դատական նիստը։ Սա միայն իմ խնդիրը չէ. այս նիստում ընդունվելիք որոշմամբ կհասկանանք՝ գոյություն ունի՞ արդյոք արդարադատություն Հայաստանում։ Դատավորները պատրա՞ստ են արժանապատվորեն կատարել իրենց աշխատանքը, թե՞ փոքրիկ խմբակին դուր գալու համար չեն խորշի հեղինակազրկումից: Շատերը կասեն, թե պատասխանն արդեն պարզ է, բայց սպասենք՝ հասկանանք։

Երկրորդ. շուտով հանրությանը կներկայացնենք «Մեր ձևով» շարժումը։ Այս նախաձեռնությունը ձևավորվել է հստակ գաղափարների շուրջ և մեծ ծրագրեր ունի Հայաստանի համար։ Մեր նպատակներն են՝

• զարգացնել տնտեսությունը,

• ստեղծել իրական հնարավորություններ բիզնեսի և հարստացման համար,

• ամրապնդել ընտանեկան ու ազգային արժեքները,

• վերականգնել Հայաստանի՝ վստահելի գործընկերոջ համբավը,

• ապահովել արցախցիների՝ արժանապատիվ ապրելու իրավունքը,

• երիտասարդներին վերադարձնել ապագայի նկատմամբ հավատը՝ զարգացնելով կրթական համակարգը,

• պահպանել ու պաշտպանել մեր Սուրբ Եկեղեցին։

«Մեր ձևով» շարժումը դառնալու է այն հենքը, որի վրա կձևավորվի նոր քաղաքական ուժը. ուժ, որի կարիքը բոլորն են զգում այսօր։ Մեր ծրագրերը հաստատուն են։ Մենք շարունակելու ենք Մե՛ր ձևով», - ասվում է գործարարի հայտարարությունում։

Նշենք, որ օգոստոսի 14-ին նշանակված է Սամվել Կարապետյանի կալանքի ժամկետը երկարացնելու միջնորդության քննությունը Հակակոռուպցիոն դատարանում:

Բարերար եւ "Տաշիր" ընկերությունների խմբի նախագահ Սամվել Կարապետյանը ձերբակալվել է հունիսի 18-ի գիշերը Երեւանում ՝ Հայ Առաքելական Եկեղեցուն աջակցություն հայտնելուց հետո: Դրան ի պատասխան ՝ բացահայտ սպառնալիքներ են հնչել վարչապետի կողմից ։ Հունիսի  19-ի գիշերը Երևանի ընդհանուր իրավասության դատարանը երկու ամսով կալանավորել է Սամվել Կարապետյանին: Նա պահվում է "Երևան - Կենտրոն" ՔԿՀ-ում (հայտնի "ՊԱԿ-ի նկուղը" ՝ ԱԱԾ շենքում) ։ Նրան մեղադրում են երկրում իշխանությունը զավթելու հրապարակային կոչերի համար։ Դրան հաջորդել է "Տաշիր" ընկերությանը պատկանող ՀԷՑ-ի ազգայնացմանն ուղղված օրենսդրական փոփոխությունների փաթեթի ընդունումը ՀՀ ԱԺ-ում, իսկ հուլիսի 18-ին ՀԾԿՀ նախագահի որոշմամբ Ռոմանոս Պետրոսյանը նշանակվել է ՀԷՑ-ի ժամանակավոր կառավարիչ ՝ վարչական վարույթի և ՀԷՑ-ի նկատմամբ կանխարգելիչ միջոցառումների կիրառման շրջանակներում: Պետրոսյանի լիազորությունները կպահպանվեն մինչև վարչական վարույթի արդյունքների մասին ակտի ուժի մեջ մտնելը:

Հուլիսի 16-ին Կարապետյանի պաշտպանական կողմը հաղորդել էր, որ քրեական վարույթը կարճելու և կալանքը վերացնելու փոխարեն, հայտնի գործարար և բարերար Սամվել Կարապետյանին վերջերս ակնհայտ անհիմն նոր մեղադրանք է առաջադրվել՝ "մի քանի ընկերությունների գործունեության արդյունքում փողերի լվացման" համար՝ առանց որևէ տվյալների: