Միխայիլ Կավելաշվիլի. Վրաստանը հանձնառու է Հարավային Կովկասում խաղաղության, կայունության և վստահության ամրապնդման գործընթացին աջակցելուն

Արմինֆո.  Վրաստանի նախագահ Միխայիլ Կավելաշվիլին Անկարայում կայացած ճեպազրույցի ժամանակ հայտարարել է, որ ողջունում է Ադրբեջանի և Հայաստանի կողմից տևական խաղաղության հաստատման ուղղությամբ ձեռնարկված քայլերը:

Ինչպես նշել է Վրաստանի նախագահը սոցցանցում, Թուրքիայի Հանրապետության նախագահ Ռեջեփ Թայիփ Էրդողանի հետ առանձնազրույցի ընթացքում ընդգծվել է տարածաշրջանում խաղաղության և կայունության առանձնահատուկ կարևորությունը:

"Վրաստանը հանձնառու է երկխոսության, դիվանագիտության եւ համագործակցության միջոցով Հարավային Կովկասի տարածաշրջանում խաղաղության, կայունության եւ վստահության ամրապնդման գործընթացին աջակցելուն եւ պատրաստ է շարունակել իր ներդրումն ունենալ ի շահ տարածաշրջանի երկրների", - գրել է Միխայիլ Կավելաշվիլին:

Հիշեցնենք, որ օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Վաշինգտոնում ստորագրել են "խաղաղության մասին" յոթ կետից բաղկացած համատեղ հռչակագիր: Այն նախատեսում է համատեղ դիմում Եվրոպայի անվտանգության եւ համագործակցության կազմակերպությանը (ԵԱՀԿ) ԵԱՀԿ Մինսկի գործընթացի եւ դրա հետ կապված կառույցների դադարեցման մասին, ինչպես նաեւ Հայաստանի տարածքով տրանսպորտային միջանցքի ստեղծում, որը կմիացնի Ադրբեջանը իր նախիջեւանյան էքսկլավին: TRIPP նախագիծը (Trump Route for International Peace and Prosperity, թարգմանաբար ՝ «Միջազգային խաղաղության և բարգավաճման Թրամփի ճանապարհ», Հայաստանի հարավում գտնվող 42 կմ ճանապարհ, որի կառավարումը 99 տարով կտան ԱՄՆ-ին), փորձագետների կարծիքով, կարող է էապես փոխել աշխարհաքաղաքական իրավիճակը Հարավային Կովկասում:

Նույն օրը Հայաստանի և Ադրբեջանի արտգործնախարարները նախաստորագրել են խաղաղության համաձայնագիրը, որը բաղկացած է 17 հոդվածից: Փաստաթղթի նախաբանում ասվում է, որ
Հայաստանի Հանրապետությունը և Ադրբեջանի Հանրապետությունը, գիտակցելով տարածաշրջանում արդար, համապարփակ և տևական խաղաղության հաստատման հրատապ անհրաժեշտությունը,

ձգտելով նպաստել այդ նպատակի իրականացմանը միջպետական ​​հարաբերությունների հաստատման միջոցով, առաջնորդվելով Միավորված ազգերի կազմակերպության կանոնադրությամբ, «Միավորված ազգերի կանոնադրությանը համապատասխան պետությունների միջև բարեկամական հարաբերությունների և համագործակցության վերաբերյալ միջազգային իրավունքի սկզբունքների մասին» հռչակագրով (1970թ.), Եվրոպայում անվտանգության և համագործակցության Հելսինկյան կոնֆերանսի եզրափակիչ ակտով (1975թ.) և 1991 թվականի դեկտեմբերի 21-ի Ալմաթիի հռչակագրով և նպատակ ունենալով զարգացնել հարաբերությունները նշված փաստաթղթերում ամրագրված նորմերի և սկզբունքների հիման վրա,

արտահայտելով իրենց միջև բարիդրացիական հարաբերություններ հաստատելու փոխադարձ կամքը,

համաձայնել են խաղաղություն և միջպետական ​​հարաբերություններ հաստատել միմյանց միջև: