Փաշինյանի ավտոշարասյան կողմից վրաերթի ենթարկված Սոնա Մնացականյանի իրավահաջորդը որևէ փոխհատուցում չի ստացել, մինչդեռ, «մարտի 1-ի» զոհերի իրավահաջորդներին վճարվել է 670 մլն դրամ. փաստաբան

Արմինֆո.Վարչապետ Նիկոլ Փաշինյանի ավտոշարասյան կողմից վրաերթի հետևանքով մահացած հղի Սոնա Մնացականյանի իրավահաջորդը ՀՀ կառավարությունից որևէ փոխհատուցում չի ստացել, ավելին, անգամ քրեական կարգով հատուցման ենթակա նյութական վնասը որևէ չափով չի փոխհատուցվել: Այդ մասին Facebook-ի իր էջում գրել է Սոնա Մնացականյանի գործով տուժող կողմի փաստաբան Րաֆֆի Ասլանյանը:

«ՀՀ կառավարությունը 2008 թվականի մարտի 1-ին զոհված 10 քաղաքացիների իրավահաջորդներին տրամադրել է 670 միլիոն ՀՀ դրամ, այսինքն յուրաքանչյուրին 67 միլիոն դրամ, և այդ ահռելի, անհասկանալի գումարը հիմա քրեական գործով պահանջում են ՀՀ երկրորդ նախագահից և մյուսներից։ Սա այն պայմաններում, երբ ՀՀ վարչապետին ուղեկցող ավտոշարասյան կողմից վրաերթի ենթարկված Սոնա Մնացականյանի իրավահաջորդը թե ՀՀ կառավարության կողմից և թե առհասարակ՝ որևէ դրամի փոխհատուցում չի ստացել, ավելին՝ նույնիսկ քրեական դատավարության կարգով հատուցման ենթակա նյութական վնասը որևէ չափով չի վերականգնվել։ Իհարկե, տուժողի իրավահաջորդ Մնացական Մնացականյանի համար դա որևէ նշանակություն չունի, վերջինս միայն իր աղջկա մահվան մեջ մեղավոր անձանց քրեական պատասխանատվությունն ու խիստ պատիժն է կարևորում, բայց սա ընդամենը արձանագրենք ողջամիտ մարդկանց հետևությունների համար», - գրել է Ասլանյանը։

Հիշեցնենք, որ 2022 թվականի ապրիլի 26-ին Երևանում ՀՀ վարչապետին ուղեկցող ոստիկանական մեքենան Երևանի Լեո-Պարոնյան փողոցների խաչմերուկում հետիոտնային անցումում վրաերթի էր ենթարկել 29-ամյա հղի կնոջ, ում տեղափոխել էին "Նաիրի" բժշկական կենտրոն, որտեղ նա մահացել էր։

2025 թվականի հուլիսի 30 - ին ոստիկանության մայոր Արամ Նավասարդյանը (ավտոմեքենայի վարորդը) դատարանի կողմից մեղավոր է ճանաչվել, իսկ նրա նկատմամբ ընտրված խափանման միջոցը ՝ ստորագրությունը հանրապետությունից չհեռանալու մասին, թողնվել է անփոփոխ: Դատարանը խափանման միջոցը որոշելու համար նշանակել է լրացուցիչ դատական նիստ, որը տեղի կունենա օգոստոսի 13-ին ՝ ժամը 12:00-ին:

Լրագրողների հետ զրույցում մահացած կնոջ իրավահաջորդի փաստաբանը հիշեցրել է, որ նախնական փորձաքննությունը հաստատել է, որ վարորդի գործողություններում խախտում է տեղի ունեցել, նա գերազանցել է արագությունը: Այսպես, "Տոյոտա Պրադո" - ի արագությունը, որի ղեկին Արամ Նավասարդյանն էր, խաչմերուկ մտնելու պահին և արգելակման պայմաններում կազմել է ավելի քան 108 կմ/ժ: Ակնհայտ է, որ մինչև այդ պահը տվյալ մեքենայի արագությունը կազմել է առնվազն 120-130 կմ/ժ, ընդգծել է նա: Մինչդեռ, հատուկ նշանակության տրանսպորտային միջոցներին ուղեկցող տրանսպորտային միջոցների արագությունը քաղաքներում և բնակավայրերում չպետք է գերազանցի 100 կմ/ժ-ը:

Սակայն, քանի որ, ըստ փաստաբանի, ոչնչացվել կամ դիտավորությամբ թաքցվել են ռադիոկապով խոսակցությունները՝ վթարից առաջ, հնարավոր չէ նաև սպառիչ պատասխան տալ այն հարցին, թե ինչ հրահանգ է տրվել, և արդյոք հրահանգ է եղել մեծացնել արագությունը: Այդ ձայնագրությունների առկայությունը կարող էր օգնել ստուգել վարչապետ Նիկոլ Փաշինյանի հուլիսի 16-ի այն հայտարարությունների հավաստիությունը, թե Մնացականյանին հարվածել է ոչ թե իր անձնական, այլ վարչապետի ավտոշարասյան ուղեկցման մեքենան, ինչի հետ կապված նա անձամբ կապ չունի տեղի ունեցածի հետ: