Սյունիքով արտատարածքային միջանցքի բացումը հայ-թուրքական հարաբերությունների կարգավորման համար նրանց նախապայմաններից մե՞կն է

Արմինֆո. Հայաստանի Սյունիքի մարզով արտատարածքային միջանցքի բացումը նրանց նախապայմաններից մեկն է հայ-թուրքական հարաբերությունների կարգավորման համար։ Այդ մասին են վկայում Ադրբեջանում Թուրքիայի դեսպան Բիրոլ Աքգյունի հայտարարությունները APA-ի հետ հարցազրույցում:

Թուրք դիվանագետը նշել է, որ Ադրբեջանի ու Հայաստանի և Թուրքիայի ու Հայաստանի միջև հարաբերությունների կարգավորման գործընթացները պետք է դիտարկել համալիր, և դրանք ընթանում են զուգահեռ:

Այդ առումով նա հիշեցրել է, որ 2022 թվականին Թուրքիայի և Հայաստանի միջև հարաբերությունների կարգավորման գործընթացում հատուկ ներկայացուցիչներ են նշանակվել։

"Հայաստանը սահմանակից է Ադրբեջանին և Թուրքիային արևելքից և արևմուտքից, այդ սահմանները փակ են։ Այդ հաշտությունից կշահեն բոլորը, բայց ամենից շատ կշահի Հայաստանը։ Մենք ցանկանում ենք արագացնել կարգավորման գործընթացը։ Եթե ստորագրվի կամ նախաստորագրվի կայուն խաղաղության համաձայնագիր, և կատարվեն "Զանգեզուրի միջանցքին" վերաբերող պայմանները, ապա թուրք-հայկական սահմանը կարող է բացվել հարմար պահին՝ Անկարայի և Բաքվի միջև խորհրդատվությունների արդյունքում: Դա կախված կլինի այն բանից, թե ինչպես կզարգանա կարգավորման գործընթացը", - եզրափակել է թուրք դիվանագետը։

Մեղրիի երթուղին Հայաստանի Սյունիքի մարզի տարածքով շուրջ 40 կմ երկարությամբ տրանսպորտային երթուղու նախագիծ է, որը տրանսպորտային կապ կապահովի Ադրբեջանի արևմտյան շրջանների և նրա էքսկլավի ՝ Նախիջևանի Ինքնավար Հանրապետության միջև: Տարածաշրջանում տրանսպորտային ուղիների բացումը նախատեսված էր Ռուսաստանի, Հայաստանի և Ադրբեջանի ղեկավարների 2020 թվականի նոյեմբերի 9-ի եռակողմ հայտարարության 9-րդ կետով: Մինչդեռ, Ադրբեջանը փորձում է խեղաթյուրել այդ պայմանավորվածությունների էությունը և ստանալ արտատարածքային միջանցք ։