"Ռուսաստանը ձեզ հետ է" ծրագրի շրջանակում Հայաստան է ուղարկվել շուրջ 140 տոննա մարդասիրական օգնություն արցախցիներին

Արմինֆո. "Ռուսաստանը ձեզ հետ է" ծրագրի շրջանակում Հայաստան է ուղարկվել շուրջ 140 տոննա մարդասիրական օգնություն, որը նախատեսված է Արցախից բռնի տեղահանված բնակիչների, առաջին հերթին, սոցիալապես խոցելի խմբերի համար: Այդ մասին հուլիսի 31-ին Երեւանում կայացած մամլո ասուլիսում հայտարարել է Ռուսաստանի Պետդումայի պատգամավոր, "Եվրասիա" ՀԱՄ-ի խորհրդի նախագահ Ալյոնա Արշինովան։

Նրա խոսքով՝ իրենց հաշվարկներով առաջին փուլում մարդասիրական օգնություն կտրամադրվի շուրջ 30 000 արցախցու։ Ընդ որում, Արշինովան ուշադրություն է հրավիրել այն հանգամանքին, որ մասնակիցների և կամավորների մեջ կլինեն նաև տեղահանված արցախցիներ: "Հենց նրանց հետ զրույցում պարզ դարձավ, թե բնակչությունն ամենից շատ ինչի կարիք ունի, և ինչ է նրանց պետք բառացիորեն ամեն օր։ Նախաձեռնությանը կմասնակցեն նաև բազմաթիվ կազմակերպություններ և կամավորներ Հայաստանից", - հավելել է "Եվրասիա" ՀԱՄ-ի Խորհրդի նախագահը:

Իր հերթին՝ Հայաստանում "Ռուսական հումանիտար առաքելություն" ՀԿ ներկայացուցչության ղեկավար Արսենի Պրոնինը հաղորդել է, որ այս տարի նախաձեռնությունը նախագծի գործնական իրականացմանը ձեռնամուխ է լինում արդեն այսօր՝ հուլիսի 31-ից:

Այս առնչությամբ նա ուշադրություն է հրավիրել այն հանգամանքին, որ կազմակերպությունը բավականին խորը ներգրավված է գործընթացում ՝ սկսած 2020 թվականից ՝ 44-օրյա պատերազմից հետո, և մինչև Արցախի ողջ բնակչության բռնի տեղահանումը մարդասիրական օգնություն է տրամադրել Լեռնային Ղարաբաղին: "140 տոննա մարդասիրական օգնությունը կներառի առաջին անհրաժեշտության պարագաներ. դրանք կլինեն ստանդարտացված հավաքածուներ ՝ նախնական կարիքները հաղթահարելու համար ։ Բացի այդ, կլինեն նաև առանձին հավաքածուներ, որոնք նախատեսված են մանկահասակ երեխաներ ունեցող ընտանիքների համար։ Մեր թիրախային լսարանը ձևավորելիս մեծ ուշադրություն է դարձվել հենց խոցելի խմբերին, այսինքն, բազմազավակ ընտանիքներին, ինչպես նաև կերակրողին կորցրած ընտանիքներին, որտեղ կան հաշմանդամներ, ինչպես նաև միայնակ մարդկանց: Գործընթացի կազմակերպման շրջանակներում մեզ հաջողվել է կետեր ձևավորել այն բնակավայրերում, որտեղ ապրում է բռնի տեղահանված արցախցիների հիմնական մասը ", - նշել է Պրոնինը։

Նրա խոսքով՝ առաջին փուլը տեղի կունենա ողջ օգոստոս ամսին և կսկսվի Մասիս համայնքից. նախատեսվում է այցելել  բոլոր այն բնակավայրերը, որտեղ բնակվում են արցախցիներ: "Կամավորների օգնության շնորհիվ այդ բնակավայրերում իրազեկման միջոցառումներ կիրականացվեն, որպեսզի բնակիչները տեղեկացված լինեն իրականացվող նախաձեռնությունների մասին։ Իսկ այդ բնակավայրերում աշխատանքներն ավարտելուց հետո, այսինքն, առաջին փուլի ավարտից հետո մենք կիրականացնենք արդյունքների ամփոփում, որոշակի հետևություններ կանենք և հետագայում կմշակենք ճանապարհային քարտեզ, որին համապատասխան, կգործենք հաջորդ նախաձեռնությունների շրջանակներում։ Այլ կերպ ասած՝ օգոստոսից հետո նախատեսվում է շարունակել մեր ակցիան ", - ընդգծել է նա։

Ինչպես հաղորդել է Հայաստանում "Եվրասիա" ՀԱՄ-ի կամավոր Արամ Ղուկասյանը, նախաձեռնությանը կարող են միանալ բոլոր նրանք, ովքեր ցանկանում են օգնել: Դրա համար, նրա ասելով, անհրաժեշտ է հետևել "Եվրասիա" Արմենիա տելեգրամյան ալիքին, ինչպես նաև այն կազմակերպությունների հայտարարություններին, որոնց հետ նրանք սերտորեն համագործակցում են այս նախագծի շրջանակներում: Անդրադառնալով այն խնդիրներին, որոնց առավել հաճախ բախվում են արցախցիները, հատկապես այսօր, նա նշել է, որ օրակարգում, առաջին հերթին, բնակարանների, ինչպես նաև դեղորայքի տրամադրման հարցն է: "Նախաձեռնությանը, չնայած ծանր իրավիճակին, մասնակցում են արցախցի երիտասարդներ, ովքեր բարձրաձայնում են այն հիմնական հարցերն ու խնդիրները, որոնց բախվում են իրենց հայրենակիցները ։ Հատկապես նկատելի է երիտասարդների մասնակցությունն այս նախաձեռնությանը ։ Տարվա ընթացքում "Եվրասիա" ՀԱՄ-ը Հայաստանում անցկացրել է ավելի քան 200 միջոցառում, որին մասնակցել են ավելի քան 9000 երիտասարդ ուսանողներ, դպրոցականներ, ակտիվիստներ: Այդ թիվը խոսում է այն մասին, որ ներգրավվածությունը շատ բարձր է, Արցախից ՝ այդ թվում", - եզրափակել է Ղուկասյանը։