Լավրով. Ցանկացած ռադիկալ գործողություն վնասում է ղարաբաղյան հակամարտության կարգավորման ուղղությամբ ԵԱՀԿ ՄԽ համանախագահների աշխատանքին

Ցանկացած կտրում, ռադիկալ գործողություն, ու կողմից էլ դա նախաձեռնվի, միայն վնասում է ղարաբաղյան հակամարտության կարգավորման ուղղությամբ ԵԱՀԿ Մինսկի խմբի համանախագահների աշխատանքին: Այս մասին նոյեմբերի 9-ին Երևանում, ՀՀ արտգործնախարար Էդվարդ Նալբանդյանի հետ համատեղ մամուլի ասուլիսում, հայտարարել է ՌԴ արտգործնախարար Սերգեյ Լավրովը, մեկնաբանելով բրիտանացի խորհրդարանական Ռոբերտ Ուոլթերի «Բռնության աճ Լեռնային Ղարաբաղում և Ադրբեջանի մյուս օկուպացված տարածքներում» զեկույցը ԵԽԽՎ վեհաժողովի հունվարյան նստաշրջանի օրակարգում ընդգրկվելու փաստը:

«Մենք, Ռուսաստանը, Ֆրանսիան և ԱՄՆ հաստատուն կերպով հանդես ենք գալիս, այն բանի դեմ, որպեսզի ԼՂՀ կարգավորման հարցում ընթացող հետևողական, գործնական, համբերատար երկխոսությունը փորձեր չարվեն դուրս բերել զանազան միջազգային հարթակներ, որոնք դրա կարգավորմամբ չեն զբաղվում: Միջազգային հանրության կողմից ոչ մեկը նրանց նման հանձնարարություն, գոնե, չի տվել»,-նշել է ռուս նախարարը, հավելելով, որ հարցն, իրոք, բավականին բարդ է նաև իր պատմության առումով: Լավրովն ընդգծել է, որ ԵԱՀԿ Մինսկի խմբի համանախագաններն աշխատում են կողմերի միջև ձեռք բերված պայմանավորվածությունների հիման վրա, որոնք արժանացել են ՄԱԿ-ի ԱԽ հավանությանը: Իսկ այդ եռյակը հանդիսանում է լիազորված կոլեկտիվ, որն զբաղվում է լեռնային ղարաբաղյան հակամարտության կարգավորմամբ:

Իսկ Նալբանդյանն էլ իր հերթին է նշել, որ Ադրբեջանը փորձում է ԼՂՀ կարգավորման քննարկումները դուրս բերել այլ շրջանակներ, ձևաչափեր, բայց հակամարտության կարգավորման միակ ձևաչափը ԵԱՀԿ Մինսկի խումբն է, որն այդ մանդատն ստացել է միջազգային հանրությունից: «Հայաստանի դիրքորոշումը բացարձակապես համընկնում է ԵԱՀԿ ՄԽ համանախագահների դիրքորոշմանը, հետևաբար, այլ կառույցները և կազմակերպոյթունները չպետք է ձեռնարկեն քայլեր, որոնք կարող են խանգարել հակամարտության խաղաղ կարգավորման գործընթացին, նպաստելով լարվածության աճին տարածաշրջանում: Այդ համատեքստում, իհարկե, հակամարտության ձևաչափն այլ ձևաչափեր տեղափոխելու փորձերը, իսկ դուք գիտեք, որ ոչ մի հակամարտություն չի կարգավորվել ԵԽԽՎ ձևաչափով, հեռանկարներ չունի: Կան հաստատված ձևաչափեր, և մենք պետք է աշխատենք համանախագահների հետ, որպեսզի գտնենք հարցի բացառապես խաղաղ կարգավորումը»,-ընդգծել է Է.Նալբանդյանը:

Խոսելով այն մասին, թե որքանով էր անաչառ բրիտանացի խորհրդարանական Ռոբերտ Ուոլթերի զեկույցը, Նալբանդյանը նշել է, որ ամբողջովին պարզ է, որ բրիտանական խորհրդարանի Ադրբեջանի բարեկամների խմբում երկար տարիներ եղած մարդը, որն այդ նույն բրիտանական մամուլում հրապարակված լուրերով, ֆինանսավորվում է Բաքվի համապատասխան հիմնադրամներից, ոչ մի կերպ չէր կարող ունենալ անկողմնակալ դիրքորոշում: Հատկապես եթե հաշվի առնենք, որ այդ նույն բրիտանական մամուլը գրել է, որ Ուոլթերն, ինչպես նաև նրա ընտանիքի որոշ անդամներ, Ադրբեջանում ունեն ֆինանսական և տնտեսական շահեր: Ըստ հայ նախարարի, շատ տարօրինակ էր, որ բրիտանական խորհրդարանում, հետևաբար, նաև ԵԽԽՎ-ում, իր մանդատը, կորցնելուց երկու օր առաջ նա որոշեց արագ հորինել այդ փաստաթուղթը: Նալբանդյանը նշել է, որ արժանի չի համարում նման փաստաթղթերը մեկնաբանելը: «Ադրբեջանը տարբեր ձևերով է մեկնաբանում այդ կառույցի կողմից ընդունված այս կամ այն փաստաթղթերը,  այդ կազմակերպության ընդունած վերջին փաստաթուղթն անվանելով թղթի կտոր: Իսկ բրիտանացու ներկայացված փաստաթուղթը ներկայացնում է որպես միջազգային իրավունքի գրեթե ամենագլխավոր փաստաթուղթ, որպես ՄԱԿ-ի Սահմանադրությանը գրեթե հավասար փաստաթուղթ: Մեկնաբանությունները թողնում են ադրբեջանցիների ու նրանց բարեկամների խղճին»,-եզրափակել է ՀՀ արտգործնախարարը:

Հիշեցնենք, որ Բրիտանացի խորհրդարանական Ռոբերտ Ուոլթերի «Բռնության աճ Լեռնային Ղարաբաղում և Ադրբեջանի մյուս օկուպացված տարածքներում» զեկույցն ընդգրկվել է Եվրախորհրդի խորհրդարանական վեհաժողովի հունվարյան նստաշրջանի օրակարգում: Նման որոշում է կայացվել է ԵԽԽՎ քաղաքական կոմիտեի նիստում` 26 «կողմ», 10 «դեմ» ձայնով, չորս պատվիրակ ձեռնպահ է մնացել:

Այդպիսով՝ հայկական պատվիրակության ջանքերն ապարդյուն են անցել: Ավելի վաղ հայկական պատվիրակությունը բազմիցս իր վրդովմունքն էր հայտնել՝ կապված զեկույցում տեղ գտած սուբյեկտիվ ձևակերպումների հետ: Հայ պատվիրակները նաև կոչ են արել ԵԽԽՎ-ին ընդհանրապես չանդրադառնալ ղարաբաղյան խնդրին, քանի որ դրա համար գոյություն ունի ԵԱՀԿ ՄԽ ձևաչափը, և դրանից դուրս ցանկացած քննարկում կարող է խոչընդոտել միջնորդների աշխատանքին: Սակայն, հայկական կողմի փաստարկները հաշվի չեն առնվել: Ավելի վաղ ԵԽԽՎ-ում հայկական պատվիրակության անդամները հայտարարել են, որ զեկույցի ընդունման դեպքում համապատասխան միջոցներ կձեռնարկեն, չճշտելով, թե` ինչպիսի: