ՀԾԿՀ նախագահը հայտարարել է, որ ՀԷՑ-ի նկատմամբ իր գործողությունները քաղաքական ենթատեքստ չունեն

Արմինֆո. Ռոմանոս Պետրոսյանին "Հայաստանի էլեկտրական ցանցեր" ՓԲԸ-ի ժամանակավոր կառավարիչ նշանակելը բխում է իմ լիազորություններից և կապված չէ քաղաքական ցուցումների կատարման հետ։ Այս մասին հուլիսի 24-ին լրագրողների հետ զրույցում հայտարարել է Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։

Նրա խոսքով, ժամանակավոր կառավարիչ նշանակելու հարցը ծագել է այն բանից հետո, երբ կառավարության լիազոր մարմինը, մասնավորապես, ՀՀ տարածքային կառավարման եւ ենթակառուցվածքների նախարար Դավիթ Խուդաթյանը հաղորդել է կառավարման թերությունների մասին: Մասնավորապես, խոսքը մատուցվող ծառայությունների ցածր որակի, վատ տեխնիկական սպասարկման և ներդրումների անարդյունավետության մասին էր։ Ընդ որում, նա խոստովանել է, որ էլեկտրաէներգիայի անջատումները կարող են տեղի ունենալ ցանկացած ղեկավարության օրոք։

"Հարցն առնչվում է անջատումների հաճախությանը, պատճառներին, էլեկտրամատակարարման վերականգնման տևողությանը և արագությանը։ Մենք հենց դրա մասին ենք խոսում։ Խնդիրները շատ ավելի շատ են, և դրանք, ի վերջո, հանգեցրել են վատ և անարդյունավետ կառավարման: Հենց այդ պատճառով էլ կառավարությունը բարձրացրել է այդ հարցը", - վստահեցրել է Մեսրոպյանը։

Նա նաև ընդգծել է, որ իր միանձնյա որոշումն անօրինական չի համարում, քանի որ ունի համապատասխան լիազորություններ, նույնիսկ, եթե այն ընդունվել է առանց հանձնաժողովի ողջ կոլեգիայի մասնակցության:

Մինչդեռ, անդրադառնալով այդ համատեքստում "Վեոլիա Ջուր" ընկերության գործունեությանը, որի աշխատանքում ևս արձանագրվում են մշտական խափանումներ, և քաղաքացիները մշտապես դժգոհում են ջրամատակարարման որակից, Մեսրոպյանը վստահեցրե  է, որ հանձնաժողովն ամենօրյա աշխատանքային հանդիպումներ է ունենում ղեկավարության հետ և իրականացնում համապատասխան գործողություններ:

Նա, սակայն, նկատել է, որ, ի տարբերություն ՀԷՑ-ի, ջրամատակարարման սեփականատերը ոչ թե "Վեոլիա ջուրն" է, այլ՝ պետությունը:

"Երբ կառավարությունը ժամանակին այդ հարցերի կարգավորումը փոխանցեց "Վեոլիա ջրին", այն ժամանակ այդ համակարգում կորուստները կազմում էին ավելի քան 80 տոկոս։ Բայց այս տարվա աշխատանքների և ներդրումների արդյունքում կորուստներն արդեն նվազել են մինչև 55% ։ Իհարկե, սա նույնպես վատ ցուցանիշ է, բայց դրա համար կառավարությունից լրացուցիչ ֆինանսներ են անհրաժեշտ", - արդարացրել է ֆրանսիական ընկերության աշխատանքը ՀԾԿՀ նախագահը։

Բացի այդ, նա որոշել է այդ խնդիրները կապել տնտեսության տեմպերի արագ աճի հետ, որը, նրա խոսքով, նոր խնդիրների է հանգեցնում։ Մասնավորապես, ըստ Մեսրոպյանի, դա կապված է Երևանում բազմաբնակարան շենքերի թվի ավելացման հետ, այն դեպքում, երբ քաղաք է մտնում են ընդամենը վեց հիմնական ջրատար: "Մինչդեռ, շենքերի թիվն ավելացել է, իսկ ջրատարների թիվը մնացել է նույնը, և հին համակարգերի ծանրաբեռնվածությունն աճել է։ Դրա համար էլ ստիպված են եղել կրճատել ջրամատակարարման ժամանակացույցը։ Եվ այստեղ հարց է առաջանում.  ի՞նչ պետք է անի "Վեոլիա Ջուրը"։ Այո, իհարկե, նրանց պետք չէ խղճալ, չէ որ նրանք շատ աշխատանք ունեն, պարտավոր են ժամանակին մատուցել իրենց ծառայությունները, պահպանել ժամանակացույցը և պատասխանել բնակիչների հարցումներին", - նշել է ՀԾԿՀ նախագահը։

Անդրադառնալով այն բանին, թե ինչու են այս երկու դեպքերում մոտեցումները տարբեր, նա միայն կրկնել է, որ "Վեոլիա Ջրի" դեպքում քաղաքացիների բոլոր բողոքները պետք է քննվեն պետության կողմից, քանի որ դրանք կախված չեն հենց ընկերությունից: "Ես չեմ ասում, որ ինչ-որ մեկը անթերի է աշխատում ։ Այստեղ տարբեր մոտեցումներ չկան, ես արդեն բացատրել եմ ՀԷՑ - ի և "Վեոլիա ջրի" խնդիրների տարբերությունը", - եզրափակել է Մեսրոպյանը:

Հատկանշական է, որ ՀԾԿՀ նախորդ նախագահ Գարեգին Բաղրամյանն արդեն նշել էր, որ հաշվի առնելով այն հանգամանքը, որ Երևանի քաղաքապետարանը Տիգրան Ավինյանի գլխավորությամբ բարձրահարկերի կառուցման թույլտվություններ են բաժանում՝ առանց այն ընկերությունների հետ համաձայնեցման, որոնք հետագայում պետք է այդ շենքերը ապահովեն ջրով, գազով, էլեկտրականությամբ, հետագայում քաղաքացիների մոտ խնդիրներ են առաջանում: Այն ժամանակ նա նշում էր, որ էլեկտրաէներգիայի մատակարարման խափանումները պայմանավորված էին այն հանգամանքով, որ ՀԷՑ-ը ստիպված էր ցանցերի արդիականացման համար հատկացված միջոցներն ուղղել նոր բաժանորդների միացմանը։