Ռուսաստանցի փորձագետ. Ստեղծված պայմաններում հայ-թուրքական հարաբերություններում բեկում ակնկալելու հարկ չկա

 Թուրքիայի հայ համայնքին ոչ մի լուրջ վտանգ չի սպառնում այդ երկրում ներքաղաքական ճգնաժամի ֆոնին, ամենայն հավանականությամբ, ժառանգականության գիծը կպահպանվի, սակայն Երևանի նկատմամբ Անկարայի քաղաքականությունում դրական տեղաշարժեր նույնպես չարժե ակնկալել: ԱրմԻնֆո-ի թղթակցի հետ զրույցում այդպիսի կարծիք է հայտնել քաղաքագետ, Ռուսաստանի հումանիտար համալսարանի հետխորհրդային երկրների ամբիոնի վարիչի տեղակալ Ալեքսանդր Գուշչինը:

«Իհրակե, հայ համայնքն այնքան բազմամարդ չէ, և նախընտրական քարոզարշավի շրջանում նրան սիրաշահելը ռազմավարական կարևորություն չի ներկայացնում, սակայն, այդուհանդերձ, խորհդրարանում բացարձակ մեծամասնության բացակայության պայմաններում Էրդողանն ստիպված էր հաշվի առնել ինչպես ընդդիմությանը, այնպես էլ ազգային փոքրամասնություններին: Կարծում եմ, որ հայ-թուրքական հարաբերություններն առայժմ կտրուկ չեն փոխվի, դրանց բնույթը կպահպանվի: Այժմ Թուրքիայի համար դա առաջնահերթ հարց չէ, առավել ևս,  Մոսկվայի հետ լարված հարաբերությունների պայմաններում հազիվ թե հարկ լինի խոսել Հայաստանի հետ հարաբերություններում ինչ-որ բեկման հնարավորության մասին», - նշել է քաղաքագետը:

Ընդ որում նա հավելել է, որ Էրդողանի, ավելի շուտ, նրա կուսակցության հաղթանակը, որը պաշտոնապես գլխավորում է վարչապետ Դավութօղլուն, բավականին անսպասելի էր: Փորձագետը կարծում է, որ քչերն էին սպասում ձայների այդպիսի առավելություն:

«Ընտրարշավի քայլն, ընդհանրապես, դիտարկվում էր որպես ռիսկային Էրդողանի համար, շատ փորձագետներ կարծում էին, որ նախագահը դիմել է ծայահեղ քայլի, սակայն պետք է խոստովանել, որ քաղաքական հոտառությունն այս անգամ էլ նրան չդավաճանեց: Հաղթանակի պատճառները, նախևառաջ, առնչում են այն հանգամանքին, որ օրակարգը լիովին կենտրոնացված էր անվտանգության հարցերի վրա: Տնտեսության բացասական գործոնները մղվել էին երկրորդ պլան, իսկ Էրդողանն ընկալվլում է որպես առաջնորդ, որն իրոք կարող է  երկիրը պաշտպանել քրդական սպառնալիքից և մի շարք այլ մարտահրավերներից, և դա ցույց տվեցին նույնիսկ ընտրությունների արդյունքները միլիոնանոց քաղաքներում», - նշել է ռուսսատանցի քաղաքագետը:

Հիշեցնենք, որ նոյեմբերի 1-ին Թուրքիայում կայացած խորհրդարանական ընտրություններում կառավարող «Արդարություն և զարգացում» կուսակցությունն ապահովեց Թուրքիայի ազգային մեծ ժողովում 317 տեղ` 550-ից, դրանով իսկ ստանալով միայնակ կառավարություն ձևավորելու հնարավորություն (անհրաժեշտ է 276 տեղ): Միևնույն ժամանակ, «Արդարություն և զարգացում» կուսակցությունն անհրաժեշտ  թվով ձայներ չի հավաքել երկրում սահմանադրական բարեփոխումներ իրականացնելու համար: Քրդամետ Ժողովուրդների դեմոկրատական կուսակցությունը հաղթահարեց 10%-ի շեմը և խորհրդարան մտնելու հնարավորություն ստացավ, սակայն 21 մանդատով պակաս ստացավ, քան հունիսին կայացած ընտրություններում: «Ազգայնական շարժում» կուսակցությունը ստացավ ձայների ընդամենը 11.9%-ը: