Էմանուել Մակրոն. Հայաստանի և Ադրբեջանի միջև խաղաղության պայմանագրի շուտափույթ ստորագրումը կարող է նոր գլուխ բացել տարածաշրջանի պատմության մեջ

Արմինֆո. Ելիսեյան պալատում տեղի է ունեցել ՀՀ վարչապետ Նիկոլ Փաշինյանի առանձնազրույցը Ֆրանսիայի նախագահ Էմանուել Մակրոնի հետ:

ՀՀ կառավարության հաղորդագրության համաձայն, վարչապետը ջերմորեն շնորհավորել է Էմանուել Մակրոնին Ֆրանսիայի ազգային տոնի առիթով և բարեկամ Ֆրանսիային մաղթել բարօրություն և բարգավաճում:

Ֆրանսիայի նախագահը շնորհակալություն է հայտնել բարեմաղթանքների համար՝ ընդգծելով Հայաստանի հետ բազմակողմ համագործակցությունը զարգացնելու և խորացնելու իր հանձնառությունը:

Զրուցակիցները քննարկել են Հայաստան-Ֆրանսիա հարաբերությունների օրակարգային մի շարք հարցեր, որոնք վերաբերել են նաև համատեղ ծրագրերի ընթացքին:

Վարչապետ Փաշինյանն անդրադարձել է Բրյուսելում այսօր տեղի ունեցած քննարկումներին՝ ընդգծելով ԵՄ-ի հետ համագործակցությունը խորացնելու ՀՀ Կառավարության նպատակադրումը:

Մտքեր են փոխանակվել նաև տարածաշրջանային նշանակության հարցերի շուրջ:

Էմանուել Մակրոնն  X-ի իր էջում հանդիպման առնչությամբ նշել է, որ ուրախ է ողջունել Հայաստանի վարչապետ Նիկոլ Փաշինյանին Փարիզում: "Ես վերահաստատել եմ Ֆրանսիայի աջակցությունը Ադրբեջանի հետ խաղաղություն հաստատելու նրա համարձակ ջանքերին։ Հայաստանի և Ադրբեջանի միջև խաղաղության պայմանագրի շուտափույթ ստորագրումը կարող է նոր գլուխ բացել տարածաշրջանի պատմության մեջ", - նշել է Ֆրանսիայի նախագահը։