Երկուշաբթի, 7 Հուլիսի 2025 17:23

Արմինֆո. Հուլիսի 11-20-ը Երևանը կհյուրընկալի բասկետբոլի Եվրոպայի մինչև 20 տարեկանների B դիվիզիոնի առաջնությունը. սպասվում է շուրջ 400 մասնակից՝ 21 երկրից։

 

ՀՀ կրթության, գիտության, մշակույթի և սպորտի նախարարության հաղորդագրության համաձայն,  նախարար Ժաննա Անդրեասյանն ու Հայաստանի բասկետբոլի ֆեդերացիայի գլխավոր քարտուղար Արթուր Նազարյանն այսօր լրագրողների հետ հանդիպման ընթացքում ներկայացրել են Եվրոպայի առաջնության նախապատրաստական ընթացքը, անդրադարձել կազմակերպչական հարցերին։

 

ԿԳՄՍ նախարար Ժաննա Անդրեասյանն ընդգծել է բասկետբոլի Եվրոպայի Մ20 տարեկանների առաջնությունը Հայաստանում հյուրընկալելու կարևորությունը, ինչը, ըստ նրա, ամբողջությամբ համահունչ է ՀՀ կառավարության պետական քաղաքականությանն ու ռազմավարությանը:

 

«ՀՀ կառավարությունը վարում է միջազգային խոշոր մրցաշարերը մեր երկրում անցկացնելու քաղաքականություն, և տափօղակի հոկեյի ու կարատեի առաջնություններից հետո սա այս տարվա երրորդ խոշոր մրցաշարն է: Նախատեսվում է անցկացնել նաև վոլեյբոլի մրցաշարը»,- ասել է Ժաննա Անդրեասյանը:

Նրա խոսքով՝ ՀՀ ֆիզիկական կուլտուրայի և սպորտի ոլորտների 2024-2030 թվականների ռազմավարությունում առանձնահատուկ ընդգծված է խաղային մարզաձևերի խրախուսման քաղաքականությունը, և բասկետբոլի առաջնությունը ևս այդ համատեքստում է:

 

«Հայաստանի բասկետբոլի ֆեդերացիայի հետ համագործակցությամբ այս տարի առաջին անգամ անցկացվեց «Դպրոցականների բասկետբոլի լիգան», որը մեծ հետաքրքրություն առաջացրեց երեխաների շրջանում. ավելի քան 8700 դպրոցականներ մասնակցեցին համայնքային փուլին: Եզրափակիչ խաղը և երկրպագուների ներկայությունը ցույց տվեցին, որ խաղային մարզաձևերով զբաղվելու ներուժը մեր երկրում շատ մեծ է»,- ասել է նախարարը՝ հույս հայտնելով, որ այս օրերին ևս բազմաթիվ երկրպագուներ կքաջալերեն մեր հավաքականին:

 

Նախարարի գնահատմամբ՝ սպորտային մեծ տոն է նախատեսվում. մրցաշարին մասնակցում է 21 հավաքական՝ 400 մասնակցով, շուրջ 1000 արտասահմանցի երկրպագուներ ու կամավորներ: Ընդ որում՝ սա ռեկորդային ցուցանիշ է թիմային մարզաձևերից Հայաստանում անցկացվող միջազգային մրցաշարերի մասնակցության տեսանկյունից:

 

Խաղերը հեռարձակվելու են Առաջին ալիքով և միջազգային ֆեդերացիայի յութուբյան ալիքով՝ հասանելի դառնալով նաև հեռուստադիտողի համար և նպաստելով Հայաստանի ճանաչելիության բարձրացմանը:

«ՀՀ կառավարությունն իրականացնում է ամբողջական ֆինանսավորում. առաջնությանը նախապատրաստվելիս կատարվել են նաև ենթակառուցվածքների բարելավման աշխատանքներ, որը կնպաստի նաև մեր երկրում բասկետբոլի զարգացմանը»,- խոսքը եզրափակել է Ժաննա Անդրեասյանը՝ շնորհակալություն հայտնելով գործընկերներին համատեղ ջանքերի և կազմակերպչական աշխատանքների համար:

 

Նախարարը կոչ է արել երկրպագուներին հնարավորինս ակտիվ լինել և ձեռք բերել տոմսեր՝ իրենց ներկայությամբ խրախուսելով մարզիկներին:

 

Ժաննա Անդրեասյանի դիտարկմամբ՝ երկրպագուների ակտիվ աջակցությունը նաև կամրապնդի Հայաստանի հավաքականի հաջող ելույթները:

 

ԿԳՄՍ նախարար Ժաննա Անդրեասյանը նշել է՝ ակումբային սպորտի զարգացումն առանցքային է ինչպես բասկետբոլի, այնպես էլ տարբեր մարզաձևերի պարագայում: Այս համատեքստում նախարարն անդրադարձել է առաջին ընթերցմամբ Ազգային ժողովի կողմից ընդունված «Բարձրագույն կրթության և գիտության մասին» նոր օրենքի նախագծին, որտեղ առանձնակի կարևորվում են ուսանողական սպորտի զարգացումն ու ակումբների ձևավորումը:

 

«Տարբեր երկրներում, հատկապես բասկետբոլի դեպքում, մարզաձևի զարգացումն ապահովվում է համալսարանական ակումբների միջոցով. առանձին նպատակ ունենք խրախուսելու հենց սպորտային ակումբների ձևավորումը բուհական ենթակառուցվածքներում՝ դա փոխկապակցելով նաև ուսումնառության գործընթացի հետ: Այս ինստիտուցիոնալ խրախուսումը, վստահ եմ, ուսանողական ակումբային սպորտի զարգացման հնարավորություն է տալու: Արդեն իսկ որոշ բուհեր գնում են այս ճանապարհով՝ տարբեր մարզաձևերից ձևավորելով թիմեր: Կմտածենք նաև առանձին լիգաների ձևավորման մասին: Սա կարող է լինել շատ լավ միջավայր՝ արդեն ավելի բարձր տարիքում տվյալ մարզաձևում ներգրավվածությունն ապահովելու առումով: Հավաքականներն էլ ակումբներում խաղացող մարզիկներից ավելի մեծ ընտրություն անելու հնարավորություն կունենան»,- ներկայացրել է Ժաննա Անդրեասյանը:

 

Հայաստանի բասկետբոլի ֆեդերացիայի գլխավոր քարտուղար Արթուր Նազարյանի տեղեկացմամբ՝ Հայաստանի մինչև 20 տարեկանների հավաքականն արդեն մեկ ամսից ավելի է՝ ուսումնամարզական հավաք է անցկացնում, որի ընթացքում մի շարք ընկերական հանդիպումներ է ունեցել Ռուսաստանի և Շվեյցարիայի՝ բավական ուժեղ թիմերի հետ: Հուլիսի 9-ին էլ ընկերական հանդիպում է սպասվում Վրաստանի հետ, որը ևս բավական ուժեղ հավաքական է: Արթուր Նազարյանը նշել է, որ Երևան են ժամանելու բազմաթիվ հավաքականներ, և սպասվում է բարդ մրցակցություն։

 

«Առաջնության շրջանակում թույլ մրցակիցներ չկան, բոլոր հավաքականները բավականին ուժեղ են, և սպասվում է շատ լուրջ մրցակցություն։ Ֆավորիտների թվում են Լատվիան, Թուրքիան, Մոնտենեգրոն և Խորվաթիան, որոնք բասկետբոլային գերտերություններ են։ Հայաստանի հավաքականն իր առաջին հանդիպումը կանցկացնի Լատվիայի հետ, որը բավականին լուրջ փորձություն է լինելու»,- նշել է ֆեդերացիայի գլխավոր քարտուղարը։

 

Հայաստանի բասկետբոլի ֆեդերացիայի գլխավոր քարտուղարի գնահատմամբ՝ հայ բասկետբոլիստները լիովին պատրաստ են առաջնության մեկնարկին և ունեն բավարար ներուժ: Նրա խոսքով՝ լավագույն տասնյակում հայտնվելը բավական հաջող արդյունք կլինի Հայաստանի Մ20 տարեկանների հավաքականի համար:

 

Նազարյանը նաև շնորհակալություն է հայտնել ՀՀ կառավարությանը և ԿԳՄՍ նախարարությանը՝ ընդգծելով, որ այս ընթացքում կատարվել է մեծածավալ աշխատանք։

 

«Նման միջոցառում հնարավոր չէ կազմակերպել առանց պետության աջակցության։ Անգամ պատրանք չենք կարող ունենալ, որ նման մրցաշարի թեկուզ մեկ երրորդը կարելի է իրականացնել առանց պետական աջակցության և հոգածության։ Բացի այդ՝ թիմային մարզաձևերի պատմության մեջ Հայաստանում կունենանք ռեկորդային թվով մասնակիցներ։ Սա մեզ հնարավորություն կտա բասկետբոլային քարտեզում զբաղեցնել արժանի տեղ և ցույց տալ, որ կարող ենք կազմակերպել նման մեծ միջոցառումներ: Շատերի համար, ի դեպ, անակնկալ էր, որ Հայաստանը ցանկություն հայտնեց նման մասշտաբի մրցաշար կազմակերպելու»,- ասել է Արթուր Նազարյանը:

 

Նա նաև տեղեկացրել է՝ առաջնությանը հետևելու նպատակով Հայաստան կժամանեն ՖԻԲԱ Եվրոպայի նախագահն ու Եվրոպական ֆեդերացիայի գլխավոր քարտուղարը։

 

Հայաստանի բասկետբոլի մինչև 20 տարեկանների հավաքականը Երևանում կայանալիք Եվրոպայի առաջնությանը հանդես կգա Փիթ Դոմինգեսի գլխավորությամբ:

 

Առաջնության հանդիպումները կանցկացվեն Կ. Դեմիրճյանի անվան մարզահամերգային համալիրում և Սպորտի կառավարման կենտրոնի ենթակայությամբ գործող «Միկա» մարզահամալիրում: