Քաղաքագետ. Հայ հոգևորականների և գործարար Կարապետյանի մեկուսացումը միայն ցուցադրում է իշխանության սնանկությունն ու վախերը

Արմինֆո.  Արքեպիսկոպոսներ Բագրատ Գալստանյանի և Միքայել Աջապահյանի, ինչպես նաև ռուսաստանաբնակ գործարար Սամվել Կարապետյանի մեկուսացումը նրանց չի վնասում, այլ, հակառակը, օգուտ է բերում, քանի որ լայն հասարակայնությանը ցուցադրում է գործող իշխանության սնանկությունն ու վախերը։ Քաղաքագետ Վլադիմիր Մարտիրոսյանն այդպես է մեկնաբանել վարչապետ Նիկոլ Փաշինյանի նախաձեռնած հակաեկեղեցական արշավի շրջանակներում ընդդիմադիր հայացքներ ունեցող անձանց ձերբակալությունները:

«Եթե Փաշինյանը չի ուզում հաշվետվություն ներկայացնել, թե շուրջ մեկ ամսից ավել տևած եղկելի հակաեկեղեցական արշավի արդյունքում քանի՞ միլիմետր է մոտեցել իրեն պատվիրված նպատակին, դա կանեմ ես: Արդյունքները սոսկալի վատն են նրա համար, իսկ լուծման ենթակա խնդիրը դեմ է առել պատին:

Վեհափառը վեհարանում է և շարունակում է կրել Գարեգին Բ Ամենայն Հայոց Կաթողիկոսի տիտղոսը:

Բագրատ և Միքայել սրբազանների նկատմամբ նույնիսկ տիտանական քրեաիրավական գործողություններ, որակումներ ու բնորոշումներ կիրառելուց հետո որևէ կերպ հնարավոր չի դառնում հանրային ընկալումների մեջ արմատավորել քրեաիրավական տարրի էլեմենտ նրանց նկատմամբ: Սրբազանները պատվով կրում են հանուն եկեղեցու, երկրի և ժողովրդի համար անձնվեր պայքարող նվիրյալների պատվաբեր տիտղոսները:

Վեհարանը ասպատակելու փորձերը խայտառակել են ԱԱԾ ինստիտուտը, որպես պետության և ժողովրդի անվտանգությունը ապահովող ինստիտուտ՝ այն վերածելով Փաշինյանի անձնական օգտագործման ռեյդերային ծառայության:

Դատախազական և քննչական ինստիտուտները ի ցույց են դրել իրենց բութ և անորակ մասնագիտական կոնվեյերների բնույթը, ինչը հենց արտահամակարգային իրավական մասնագիտական հանրույթի կողմից մեղմ ասած արժանանում է մասնագիտական պախարակման և ամոթի:

Հայ առաքելական եկեղեցու հոգևորականների ընկալումներն ու վարկանիշը վեհարանը ասպատակող ուժայիններին դիմադրություն ցույց տալուց և թույլ չտալուց հետո շեշտակի և որակապես դրականորեն փոխվել է:

Սամվել Կարապետյանը, ով իր մեկ կարճ քննադատական ելույթով ամբողջացրեց այս եղկելի արշավի ողջ հանրային մերժելիությունն ու անընդունելիությունը դարձել է լրջագույն քաղաքական ֆակտոր հողի վրա, ով քաղաքականությամբ չզբաղվողների և միևնույնականների մի ահռելի շերտի ստիպել է սկսել հետևել քաղաքական գործընթացներին և ձևավորել հստակ հակաիշխանական դիրքավորում:

Եթե մի կողմ թողնենք իշխանական անարդյունք աղբը, որը ամենօրյա ռեժիմով արտադրվում և դաշտ է նետվում կաթողիկոսի, եկեղեցու, սրբազանների և Սամվել Կարապետյանի մասով այդ աղբը որևէ կերպ չի կապիտալիզացվում Փաշինյանի կողմից որպես իր ճշմարտացիության և քաղաքական ամրության ռեսուրս: Սրբազաններն ու Սամվել Կարապետյանը մեկուսացված են: Այդ մեկուսացումն ու բանտարկումը տանում են պատվով և դա աշխատում է, ոչ թե ի վնաս իրենց, այլ ի օգուտ իրենց և մեծ նպատակի, որի թիրախը այս իշխանության սննանկության ու վախերի ցուցադրումն ու ապացուցումն է լայն հանրային շերտերի առջև:

Չոր արդյունքում ստորանալուց, խայտառակվելուց, բարոյազրկվելուց, սեփական սնանկությունն ու անարժեքությունը ողջ աշխարհի առջև ի ցույց դնելուց բացի այլ էական արդյունք և քաղաքական կապիտալիզացիա Փաշինյանը չունի և իր նախաձեռնած խաղը շեշտակի շրջվում է իր դեմ, որովհետև յուրաքանչյուր քայլ՝ ավելի խորացնելու է արդեն վաբանկ գնացածի իր պատային կարգավիճակը:

Վեհափառը վեհարանում է և շարունակում է կրել Ամենայն Հայոց Կաթողիկոս Գարեգին Բ-ի կարգավիճակը:

P.S. Նա ոչ առաջին ոչ էլ վերջին ավտոկրատ բռնակալն է, ով մնացել է իր սկսած խաղի փլատակների տակ, որը վերածվել է սեփական քաղաքական վերջնախաղի", - գրել է Մարտիրոսյանը՝ «Ֆեյսբուքի» իր էջում:

Հիշեցնենք, որ բարերար եւ "Տաշիր" ընկերությունների խմբի նախագահ Սամվել Կարապետյանը ձերբակալվել էր հունիսի 18-ի գիշերը Հայաստանի իրավապահ մարմինների կողմից՝ այն բանից հետո, երբ Հայ Առաքելական Եկեղեցուն աջակցություն էր հայտնել: Դրան ի պատասխան՝ բացահայտ սպառնալիքներ էին հնչել վարչապետի կողմից։ Հունիսի 19-ի գիշերը Երևանի ընդհանուր իրավասության դատարանը երկու ամսով կալանավորեց Սամվել Կարապետյանին: Նա պահվում է "Երևան - Կենտրոն" ՔԿՀ-ում (հայտնի "ՊԱԿ-ի նկուղը" ՝ ԱԱԾ շենքում)։ Նրան մեղսագրվում են երկրում իշխանությունը զավթելու հրապարակային կոչերը։ Կարապետյանը մեղքը չի ընդունում։

Հունիսի 25-ին իրավապահ մարմինների աշխատակիցները խուզարկություններ են իրականացրել "Սրբազան պայքար" շարժման կողմնակիցների և ընդդիմադիր հայացքներ ունեցող անձանց տներում: ՔԿ-ում հայտարարել են, որ շարժման մասնակիցներն ու առաջնորդները, իբր, ծրագրել էին ահաբեկչություններ և իշխանության զավթում Հայաստանում: "Իշխանությունը զավթելու" փորձի մեղադրանքով ձերբակալվել է 16 մարդ, այդ թվում ՝ շարժման առաջնորդ Բագրատ արքեպիսկոպոս Գալստանյանը: Բոլոր ձերբակալվածները կալանավորվել են երկու ամիս ժամկետով։

Իսկ հունիսի 28-ին Երևանի առաջին ատյանի դատարանը որոշում է կայացրե երկու ամսով կալանավորել ՀԱԵ Շիրակի թեմի առաջնորդ Միքայել արքեպիսկոպոս Աջապահյանին, ոի մեղադրվում է իշխանությունը բռնի տապալելու կոչեր անելու համար։ Ընդ որում, խոսքը վերաբերում է այն կոչերին, որոնք հնչեցվել էին մեկ տարի առաջ և ՀՀ ԱԱԾ կողմից ճանաչվել էին որպես հանցագործություն չպարունակող։