Նախկին խորհրդական. Որքան ավելի Հայաստանի իշխանությունները ճնշում գործադրեն ՀԱԵ նկատմամբ, այնքան ավելի կաճի եկեղեցու դերն ու նշանակությունը

Արմինֆո.  Որքան ավելի Հայաստանի իշխանությունները ճնշում գործադրեն Հայ Առաքելական Եկեղեցու նկատմամբ՝ այն չեզոքացնելու նպատակով, այնքան ավելի կմեծանա Հայ Առաքելական Եկեղեցու դերն ու նշանակությունը հասարակական միջավայրում: Այդ մասին հունիսի 25-ին լրագրողներին հայտարարել է ՀՀ վարչապետի նախկին գլխավոր խորհրդական Արսեն Գասպարյանը։

Նրա ասելով՝ Հայաստանի իշխանությունների և Հայ Առաքելական Եկեղեցու միջև առճակատումը սկսվել է 2018 թվականին, երբ սկիզբ էր առել "Նոր Հայաստան, նոր կաթողիկոս "շարժումը: "Դրանում զարմանալի ոչինչ չկա, նման դեպքեր նկատվել են շատ այլ երկրներում։ Մասնավորապես, Արևելյան Եվրոպայի երկրներում (Չեխոսլովակիա, Լեհաստան և այլն) սառը պատերազմի տարիներին իշխանությունները, ըստ էության, ճնշում էին գործադրում կաթոլիկ եկեղեցու և այլ կրոնական հաստատությունների նկատմամբ։ Նույնը տեղի է ունենում այսօր Կուբայում։ Այս բոլոր իրադարձությունները միավորում է նույն բանը՝ հեղափոխական ձախ ուժերի կառավարությունների և իշխանությունների կողմից եկեղեցիները արմատական մեթոդներով վերահսկողության տակ վերցնելու փորձերը։ Հայաստանն այդ ցուցակում բացառություն չի կազմում", - ասել է Գասպարյանը՝ նշելով մեկ տարբերություն. նույն Արեւելյան Եվրոպայում, այլ տոտալիտար պետություններում եւ, նույնիսկ, Աֆրիկայում ոչ ոք եկեղեցիների հասցեին այնպիսի բառապաշար չի օգտագործել, ինչպիսին կիրառվում է Հայաստանում։

Պատասխանելով ՀԱԵ-ի նկատմամբ Հայաստանի իշխանությունների հարձակումների և ՀԱԵ հասցեին Կովկասի մահմեդականների ղեկավար Ալահշուքյուր Փաշազադեի հայտարարությունների միջև փոխադարձ կապի վերաբերյալ հարցին՝ փորձագետը նշել է 2020 թվականի պատերազմի արդյունքները, որում և Ադրբեջանը, և Թուրքիան հանդես էին գալիս միասնական ճակատով։ Ռազմական էքսպանսիայից հետո, ինչպես նշել է Գասպարյանը, որպես կանոն, հաջորդում է քաղաքական էքսպանսիա, որի վառ օրինակ են Փաշազադեի հայտարարությունները։

"Հայաստանի իշխանությունների բոլոր գործողությունները՝ կապված ՀՀ սահմանադրության, հայոց պետականության խորհրդանիշների փոփոխությունների հետ, ՀԱԵ դեմ հարձակումները Բաքվի և Անկարայի կողմից քաղաքական էքսպանսիայի մաս են կազմում",-ասել է վարչապետի նախկին խորհրդականը։

Նա անդրադարձել է նաև երկրում ստեղծված իրավիճակին՝ պետական հեղաշրջման փորձի մասին հաղորդագրությունների ֆոնին։ "Ոչ մի հեղաշրջում չկա, դա քաղաքական հետապնդում է։ Այս հետաապնդման մասին թող մտածեն այն 600 հազար մարդիկ, ովքեր 2021 թվականին իրենց ընտրությունը կատարեցին երկրի ներկայիս ղեկավարների օգտին։ Երբ վերջիններս հայտարարում են Հայաստանում խոսքի ազատության առկայության մասին, պետք է նկատի ունենալ, որ ձեռքբերում կլիներ կենսաթոշակների բարձրացումը և կրթական ոլորտի աշխատակիցների աշխատավարձերի կրկնակի աճը, իսկ այս դեպքում գործ ունենք քաղաքական հետապնդման հետ", - ընդգծել է Գասպարյանը ։