ՀՀ պաշտպանության նախարարության պատվիրակությունը մասնակցում է Ֆրանսիայի Լա Բուրժե քաղաքում անցկացվող ռազմաավիացիոն ցուցահանդեսին

Արմինֆո.ՀՀ պաշտպանության նախարարի տեղակալ Կարեն Բրուտյանի գլխավորած պատվիրակությունը, Ֆրանսիայի Հանրապետության զինված ուժերի նախարարության հրավերով, մասնակցում է հունիսի 16-22-ը Ֆրանսիայի Լա Բուրժե քաղաքում անցկացվող «Paris Air Show» ռազմաավիացիոն ցուցահանդեսին։ Այդ մասին ասվում է Հայաստանի ՊՆ հաղորդագրությունում:

Ինչպես գրում է RFI-ն, հունիսի 16 - ին Լա Բուրժեում բացվել է 55-րդ միջազգային ռազմաավիացիոն ցուցահանդեսը, որը մասնակիցների թվով պատմության մեջ ամենամեծն է. 48 երկրների 2400 ընկերություններ իրենց արտադրանքն են ներկայացնում ավելի քան 70 հեկտար տարածքում, իսկ ամենօրյա ցուցադրություններին մասնակցում է 150 թռչող սարք: Լա Բուրժեն ավանդաբար ծառայում է որպես համաշխարհային ավիացիոն և տիեզերական արդյունաբերության նվաճումների ցուցափեղկ: Սակայն 2025 թվականին այն նշանավորվել է պաշտպանական ընկերությունների լայնածավալ ներկայությամբ. ցուցադրության 45 տոկոսը բաժին է ընկնում սպառազինություն արտադրողներին, ինչը ռեկորդային է ցուցահանդեսի 115-ամյա պատմության ընթացքում: