"Վերածնվող Արցախը"-ի ակցիան կառավարության դիմաց. Հայաստանի իշխանությունների խոստումները արցախցիների շարժումը թուլացնելու և նրանց՝ երկիրը լքել հարկադրելու փորձ է

Արմինֆո.  Արցախցիները պետք է գիտակցեն, որ իրավիճակը, որում հայտնվել են, արդյունք է Հայաստանի կառավարության խոստումների, որոնք տրվել են սկսված շարժումը թուլացնելու նպատակով: Այդ մասին հունիսի 19-ին կառավարության շենքի դիմաց բողոքի ակցիայի ժամանակ լրագրողների հետ զրույցում հայտարարել է "Վերածնվող Արցախ" շարժման համակարգող, Արցախցիների իրավունքների պաշտպանության խորհրդի նախկին անդամ Անաստաս Իսրայելյանը։

Նա կարծում է, որ մարտի 29-ին արցախցիների  հանրահավաքից հետո կառավարության հետ սկսված բանակցությունները ոչ այլ ինչ են, քան մանիպուլյացիա, որն ուղղված է խաբելու և բողոքի շարժումը թուլացնելու:

Իսրայելյանը պարզաբանել է, որ արցախցիներին օգնելու ծրագրերում փոփոխություններ կատարելու պատրաստակամության մասին հայտարարություններից հետո, որոնք կարող էին օգնել նրանց ինտեգրվել Հայաստանին, այդ խոստումները կատարելուց հրաժարումներ են եղել: Նա համոզմունք է հայտնել, որ կառավարության բոլոր որոշումներն իրականում ունեն մեկ նպատակ. արցախցիներին հասցնել այնպիսի վիճակի, երբ միակ ելքը լինի արտագաղթը:

"Նրանք ամեն ինչ անում են, որպեսզի մարդիկ հեռանան Հայաստանից և մեկնեն արտերկիր։ Բայց մենք դա չենք ուզում, մենք ուզում ենք մնալ և ապրել Հայաստանում։ Սակայն, ի վերջո, կառավարության հետ այդ բոլոր բանակցությունները միայն մեծացնում են արցախցիների արտագաղթի ռիսկը", - վստահեցրել է շարժման համակարգողը։

Իսրայելյանն այդ առնչությամբ ընդգծել է, որ ոչինչ չի խանգարում արցախցիներին վերսկսել ակտիվ գործողությունները, այդ թվում ՝ զանգվածային հավաքները հրապարակներում: Նա նման միջոցառումներն ավելի արդյունավետ է համարում, քան, պարզապես, կառավարության ներկայացուցիչների հետ քննարկումները։

"Եթե արդյունք չկա, ապա դա միայն վկայում է բանակցությունների ձախողման կամ Հայաստանի կառավարության հետ դավադիր համաձայնության մասին։ Որոշ մարդիկ (Իսրայելյանը չի պարզաբանել, թե ում մասին է խոսքը-խմբ.) շարժվում են կառավարության օրակարգով, դրա համար էլ արցախցիները հայտնվել են այս իրավիճակում։ Սա իրավիճակի իմ գնահատականն է", - հավելել է Իսրայելյանը։

Բացի այդ, նա համոզմունք է հայտնել, որ կառավարության ծրագրերն ուղղված են բռնի տեղահանված արցախցիների տարանջատմանը: Նա իր խոսքերը հիմնավորել է այն բանով, որ այդ ծրագրերը տարբերություններ են ստեղծում ավելի խոցելի խմբերի և նրանց միջև, ովքեր, պարզապես, մի փոքր ավելի մեծ հնարավորություններ ունեն իրենց նվազագույն ապահովման համար:

"Սակայն, ինչի՞ մասին է խոսքը, եթե 150 հազար մարդ հայտնվել է այս իրավիճակում՝ Հայաստանի իշխանությունների սխալների պատճառով։ Բոլորի համար պետք է ապահովվի առկա բոլոր հարցերի հավասար լուծումներ, հաշվի առնելով այն ծանր հանգամանքները, որոնցում գտնվում են այդ մարդիկ", - ամփոփել է Իսրայելյանը։

Հիշեցնենք, որ մարտի 29-ին Ազատության հրապարակում հանրահավաք էր անցկացվել հանուն արցախցիների հավաքական վերադարձի, հայրենիքում արժանապատիվ և անվտանգ ապրելու, Հայաստանում սոցիալ-տնտեսական իրավունքների ապահովման, գերիների վերադարձի և Արցախի մշակութային ժառանգության պաշտպանության ջանքերի: Հանրահավաքի նախապատրաստման հետ կապված ձևավորվել էր հատուկ խորհուրդ, որի կազմում ընդգրկվել էին Արցախի հասարակական կազմակերպությունների, խորհրդարանական ուժերի ներկայացուցիչներ և անհատներ: Խորհուրդը վրան էր տեղադրել Ազատության հրապարակում, որտեղ պարբերաբար հանդիպումներ էին անցկացվում տարբեր հասարակական-քաղաքական գործիչների և քաղաքական ուժերի հետ: Սակայն Խորհրդի վերջին բանակցությունները հանգեցրին սոցիալական օգնության երկարաձգման, ընդամենը,  երկու ամսով։ Այս պահին վտանգ կա, որ շատ արցախցիներ կարող են անօթևան մնալ սոցիալական աջակցության դադարեցման պատճառով ։