Նպատակս միայն մեկն է՝ ազատվել չարիքից. "Պատիվ ունեմ"-ի վարչապետի թեկնածուն միավորման կոչ է արել բոլոր ընդդիմադիրներին

Արմինֆո.  «Հայաստանի Հանրապետական կուսակցության ղեկավար մարմնի կողմից ստացա պարտավորեցնող առաջարկ մաս կազմել մեր բոլորիս հայրենիքը ազատագրելու գործին», - «Ֆեյսբուքում» գրել է Մասիս համայնքի ղեկավար, ՀՀԿ խորհրդի անդամ Դավիթ Համբարձումյանը, ով այժմ ԱԺ "Պատիվ ունեմ" խմբակցության վարչապետի թեկնածուն է՝ Փաշինյանին անվստահություն հայտնելու գործընթացը սկսելու համար։

«Սիրելի ընկերներ, գաղափարակիցներ Հայաստանի Հանրապետական կուսակցության ղեկավար մարմնի կողմից ստացա պարտավորեցնող առաջարկ մաս կազմել մեր բոլորիս հայրենիքը ազատագրելու գործին: Սա պարտավորեցնող ու պատվաբեր առաջարկ է, որը ես ընդունել եմ խորապես գիտակցելով պատասխանատվությունը, վտանգները և իհարկե մեր բոլորի երազած հաղթանակի ռեալ հնարավորությունը: Իշխանազավթման առաջին օրից ձեր բոլորի աչքի առաջ ամեն ջանք գործադրել եմ աղետը կանխելու կամ գոնե հեռացնելու ուղղությամբ: Ինձ ու համարյա իմ բոլոր հարազատներին շինծու գործերով բանտարկել են, սակայն իմ կամքի վրա ազդելն անհնար է: Պայքարի մեջ ես վերկուսակցական մոտեցման կողմնակից եմ: Ինքս բոլոր ընդդիմադիրներին անկեղծ համախմբման կոչ եմ անում և պատրաստ եմ արձագանքել նման բոլոր կոչերին: Ես հայ տղամարդ եմ ու զերծ եմ անառողջ ամբիցիաներից: Նպատակս միայն մեկն է՝ ազատվել չարիքից: Զգործս ձեռաց մերոց ուղիղ արա ի մեզ, Տէ՜ր, եւ զգործս ձեռաց մերոց յաջողեա՜ մեզ: Ամէն», - գրել է Դավիթ Համբարձումյանը:

Ավելի վաղ ՀՀԿ-ն՝ ի դեմս ԱԺ "Պատիվ ունեմ" ընդդիմադիր խմբակցության, Փաշինյանին անվստահություն հայտնելու գործընթաց սկսելու համար հրապարակել էր վարչապետի թեկնածուի անունը:

Նշենք, որ գործող վարչապետին անվստահություն հայտնելու հարցը ԱԺ-ում կարող է քննարկվել միայն այն դեպքում, եթե առնվազն 36 պատգամավոր ներկայացնի գործընթացը սկսելու համար անհրաժեշտ ստորագրություններ: Ընդդիմադիր երկու խմբակցությունները ("Հայաստան" և "Պատիվ ունեմ") միասին կազմում են 34 պատգամավոր։ Եվս չորսն ունեն անկախ կարգավիճակ։ Կառավարության ղեկավարին անվստահություն հայտնելու համար իմփիչմենթի օգտին պետք է քվեարկի 107 պատգամավորներից, առնվազն, 54-ը:

Հիշեցնենք, որ 2018 թվականին Մասիսի այն ժամանակվա քաղաքապետն ու նրա եղբայրը ձերբակալվել էին 2018 թվականի ապրիլյան իրադարձությունների ("թավշյա հեղափոխություն"), ինչպես նաև Արարատի մարզի Հայանիստ և Հովտաշատ գյուղեր տանող ճանապարհների խաչմերուկում (հրազենի գործադրմամբ) տեղի ունեցած միջադեպի հետաքննության շրջանակներում։

2021 թվականի դեկտեմբերի 5-ին Դավիթ Համբարձումյանը հայտարարել էր, որ իր վրայից հանվել են 2018 թվականի ապրիլի 22-ին Երևանում քաղաքացիների նկատմամբ բռնություն գործադրելու գործով մեղադրանքները: Այդ ժամանակ էլ նա հայտարարել էր, որ Քննչական կոմիտեն որոշել է դադարեցնել իր նկատմամբ հետապնդումը, քանի որ իր մեղավորության ապացույցներ չեն հայտնաբերվել ։ Նախկին պաշտոնյան հավելել էր, որ այժմ որպես մեղադրյալ է անցնում մեկ այլ գործով՝ նույն 2018 թվականին Հայանիստ և Հովտաշատ գյուղեր տանող ճանապարհների խաչմերուկում կազմակերպված բողոքի ակցիայի մասնակիցների վրա հարձակման գործով: "Ես հասել եմ այն խաչմերուկին, երբ դիմակայությունն այնտեղ արդեն եռում էր։ Փորձում եմ չխոսել այդ թեմայով, քանի որ սպասում եմ քննության արդյունքներին ։ Կապրենք՝ կտեսնենք ՝ մեղավոր եմ, թե ոչ", - ասել էր Համբարձումյանը։ Միևնույն ժամանակ, նա հավելել էր, որ չի վախենում ճնշումներից և բանտարկությունից: