Ադրբեջանական զինված ծառայողները Սյունիքի մարզի Տեղ համայնքից երկու անչափահաս տղաների տարել են անհայտ ուղղությամբ. Թաթոյան

Արմինֆո.Ադրբեջանական զինված ծառայողները ՀՀ Սյունիքի մարզի Տեղ համայնքից երկու անչափահաս տղաներին արդեն իսկ տարել են անհայտ ուղղությամբ։ Այդ մասին հաղորդել է Մարդու իրավունքների նախկին պաշտպան Արման Թաթոյանը՝ «Ֆեյսբուքի»  իր էջում:

«Պարզից էլ պարզ է, որ երկու անչափասները որևէ այլ նպատակ ունենալ չէին կարող իրենց քթի տակ 2020-2022թթ. հանցավոր արարքների արդյունքում անօրինական տեղավորված ադրբեջանական զինված ուժերի համար, որոնք մեր բնակիչների կյանքն անհնարինության են վերածել:

Սա է «բարեկամ» ու «խաղաղասեր» Ադրբեջանը, ում հետ հարևանություն, առևտուր ու համատեղ ապրելու կեղծ կոչեր են անում սեփական իշխանությունը պահպանելու մոլուցքով տառապող ՀՀ անհեռատես իշխանությունները:

Ահա, թե ինչու է կարևոր ադրբեջանական զինված ծառայողներին Հայաստանի համայնքներից ու ճանապարհներից հեռացնելու ու անվտանգության գոտի ունենալու իմ տարիների առաջարկը, որպեսզի սահմանի բնակիչները կարողանան շնչել մի քանի տարի առաջ հային գնդակահարող, գլխատող, դիակներն անարգող ու անպատիժ մնացած ադրբեջանական զինվորականների ներկայությունից», - գրել է Թաթոյանը։

Այսօր ավելի վաղ Հայաստանի ԱԱԾ մամուլի կենտրոնը հաղորդել էր, որ Սյունիքի մարզի երկու անչափահաս բնակիչներ մոլորվել են և հայտնվել Ադրբեջանի տարածքում: «Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում։ Ձեռնարկվում են անհրաժեշտ բոլոր միջոցները՝ քաղաքացիների գտնվելու վայրը պարզելու և նրանց անվտանգ վերադարձն ապահովելու ուղղությամբ», - ասվում էր ԱԱԾ հաղորդագրությունում։

Մինչդեռ, Արավուս համայնքի նախկին ղեկավար, Տեղ համայնքի ավագանու անդամ Արագամ Հովսեփյանի ասելով՝ "առավոտյան իրենք տեսել են, թե ինչպես են նրանք տղաներին նստեցրել մեքենան ու տարել":

Factor.TV-ի Ճշտող հարցին, թե արդյոք ադրբեջանական ուժերը ողջ գիշեր պահել են տղաներին և միայն առավոտյան են տարել, Հովսեփյանը դրական պատասխան է տվել՝ առանց մանրամասնելու. «Չեմ բացի փակագծերը, թե ինչպես եմ ես դա տեսել, ինչ եմ տեսել, ես ձեզ ասում եմ՝ նրանց 100%-ով տարել են։ Հուսով եմ՝ նրանք շուտով կվերադառնան, երիտասարդ տղաներ են, նոր են ավարտել 12-րդ դասարանը, մեկ ամսից պետք է բանակ գնային: Ծնողները շատ վատ վիճակում են, դա սարսափելի է»: