Երևանի քաղաքապետարանում կարծում են, որ տուգանքների բարձրացումը գործուն միջոց կդառնա շինարարական նորմերի խախտումների դեմ պայքարում

Արմինֆո. Երևանի քաղաքապետարանում կարծում են, որ շինարարական ընկերությունների կողմից անվտանգության նորմերը չպահպանելու խնդրի լուծման արդյունավետ միջոցներից մեկը տուգանքների զգալի ավելացումն է՝ 10 և, նույնիսկ, 15 անգամ: Այդ մասին հունիսի 3-ին մամուլի ասուլիսի ժամանակ հայտարարել է Երեւանի քաղաքապետարանի մամուլի քարտուղար Հայկ Կոստանյանը։

Ընդ որում, նա խոստովանել է, որ նախկինում սահմանված տուգանքները չեն հասել իրենց նպատակին, քանի որ շատ շինարարներ նախընտրում են, պարզապես, չնչին գումարներ վճարել՝ հայտնաբերված խախտումները վերացնելու փոխարեն: Կոստանյանի խոսքով՝ այդ առնչությամբ քաղաքապետարանում որոշել են նախաձեռնել օրենսդրական փոփոխություններ, որոնք արդեն քննարկվում են կառավարության մակարդակով:

Բացի այդ, մամուլի  քարտուղարը հավելել է, որ նախատեսվում է ընդլայնել քաղաքապետարանի լիազորությունները. մեկ-երկու խախտումից հետո իշխանությունները հնարավորություն կունենան կասեցնել շինարարական ընկերության գործունեությունը: Այդ նորամուծությունը, նրա խոսքով, վերաբերելու է շինարարության բոլոր օբյեկտներին։

"Այսինքն, մեկ-երկու տուգանքից հետո Երևանի քաղաքապետարանը հնարավորություն կունենա ժամանակավորապես դադարեցնել շինարարությունը՝ մինչև խախտումների վերացումը։ Մենք արդեն ներկայացրել ենք բոլոր անհրաժեշտ առաջարկները և սպասում ենք պատասխանի ։ Հույս ունենք, որ այդ որոշումներն ընդունելուց հետո կտեսնենք դրական արդյունքներ", - ընդգծել է Կոստանյանը։

Բացի այդ, մամուլի քարտուղարն անդրադարձել է էլեկտրաէներգիայի և ջրի հաճախակի անջատումների խնդրին: Նա հաղորդել է Երևանում էներգախնայող ենթակառուցվածքների արդիականացման աշխատանքների մեկնարկի մասին։ Այդ ծրագրի շրջանակներում քաղաքի 111 փողոցներում կիրականացվեն ցանցերի թարմացման աշխատանքներ, ինչը, նրա խոսքով, թույլ կտա խուսափել փոքր կենտրոնում անջատումներից:

"Միեւնույն ժամանակ, "Գազպրոմ Արմենիա" ընկերության կողմից իրականացվում է 15 կմ գազատարի ցանցի կառուցում, ինչը նույնպես ամբողջությամբ կլուծի գազամատակարարման առնչությամբ առկա խնդիրները", - հավելել է Կոստանյանը:

Անդրադառնալով "Վեոլիա Ջուր" ընկերության ջրամատակարարման աշխատանքներին և հաճախակի ջրանջատումների հետ կապված խնդիրներին ՝ մամուլի քարտուղարը հաղորդել է շուրջ 72 կմ ջրագծի արդիականացման մեկնարկի մասին: Այդ աշխատանքները, նրա խոսքով, վերաբերում են բացառապես խմելու ջրին եւ պետք է հանգեցնեն մասնավոր տարածքներում անջատումների թվի նվազմանը։

"Բացի այդ, դա նաև կհանգեցնի ջրի կորուստների նվազման և անջատումների ժամանակացույցի փոփոխման", - եզրափակել է Կոստանյանը, խոստովանելով, որ ամռանը ջրամատակարարման անջատումների վերաբերյալ բազմաթիվ բողոքներ են ստանում: