ԱԺ պատգամավոր. Հայաստանը երախտապարտ է Ֆրանսիային Լեռնային Ղարաբաղի 44-օրյա պատերազմից հետո սկզբունքային որոշում կայացնելու համար

Արմինֆո.  Հայաստանը երախտապարտ է Ֆրանսիային Լեռնային Ղարաբաղի 44-օրյա պատերազմից հետո երկրում ֆրանսիական այս կամ այն պատվիրակության ներկայության մասին սկզբունքային որոշում կայացնելու համար: Այդ մասին հունիսի 2-ին հայտարարել է ՀՀ Ազգային ժողովի պետաիրավական հարցերի հանձնաժողովի նախագահ, ՀՀ-ՖՀ բարեկամության խորհրդարանական խմբի նախագահ Վլադիմիր Վարդանյանը՝ Հայաստան-Ֆրանսիա միջտարածաշրջանային համագործակցության 5-րդ համաժողովում:

Նրա խոսքով, այդ ժամանակից ի վեր Հայաստանը միայնակ չի մնացել, հաճախ երկիր են այցելել այս կամ այն պատվիրակությունները, լինեն դրանք խորհրդարանական, թե տեղական ինքնակառավարման մարմինների: "Ֆրանսիան մեզ երբեք մենակ չի թողել։ Բացի ավանդական դարձած համագործակցության ուղղություններից, որոնց շարքին են դասվում կրթությունը, մշակույթը, տնտեսությունը, պետք է մտածել նաև նոր ոլորտների մասին, որոնց շարքին, օրինակ, կարելի է դասել տեղեկատվական տեխնոլոգիաների ոլորտները, արհեստական բանականության մեխանիզմները, որոնց հիման վրա փորձել կառուցել ապակենտրոնացված համագործակցություն", - ասել է պատգամավորը։ Նա նշել է, որ ապակենտրոնացված համագործակցություն այսօր իրականացվում է, որպես կանոն, Ֆրանսիայի այն շրջանների հետ, որտեղ զգալի հայ համայնք կա։ Սակայն զուգահեռաբար անհրաժեշտ է մտածել նաև Ֆրանսիայի այլ տարածաշրջանների մասին, որոնք կարող են փոխադարձ շահեր ունենալ Հայաստանի այս կամ այն մարզի հետ։