ՀՀ ԱԳՆ. Երևանը գնահատում է տարածաշրջանում տևական խաղաղության և կայունության հաստատմանն ուղղված Փարիզի ջանքերը

Արմինֆո.  Փետրվարի 2-ին Գորիսում մեկնարկել է Հայաստանի և Ֆրանսիայի սուբյեկտների միջև ապակենտրոնացված համագործակցության հինգերորդ համաժողովը:

Ողջույնի խոսքով դիմելով համաժողովի մասնակիցներին՝ ՀՀ ԱԳ նախարարի տեղակալ Վահան Կոստանյանը նշել է, որ Հայաստանը բարձր է գնահատում Ֆրանսիայի դիրքորոշումը հայկական պետության ինքնիշխանության և սահմանների աջակցության, ինչպես նաև ժողովրդավարության հետագա ամրապնդման հետ կապված հարցերում: Դիվանագետն ընդգծել է, որ Երևանը նաև բարձր է գնահատում Փարիզի աջակցությունը Հայաստանի և Եվրոպական միության միջև հարաբերությունների ընդլայնման և զարգացման, ՀՀ պաշտպանական կարողությունների հզորացման և տնտեսական դիմադրողականության գործում:

Կոստանյանը նշել է, որ Հայաստանի և Ֆրանսիայի միջև փոխգործակցության ամենաակտիվ զարգացող ուղղություններից մեկը միջտարածաշրջանային համագործակցությունն է, և Գորիսում նման բարձր մակարդակի համաժողովի անցկացումը դրա հերթական դրսևորումն է, հատկապես, երկրի սահմանամերձ շրջանների, այդ թվում՝ Սյունիքի մարզի զարգացման համատեքստում: Ինչպես ընդգծել է փոխնախարարը, երկկողմ հարաբերությունների բարձր մակարդակի մասին է խոսում Գորիսում Ֆրանսիայի պատվո հյուպատոսության բացումը: "Հույս ենք հայտնում, որ պատվո հյուպատոսության բացումը լրացուցիչ խթան կհաղորդի Հայաստանի Սյունիքի մարզում ֆրանսիական կապիտալի ներգրավմանը և ռազմավարական նշանակություն ունեցող ծրագրերի իրականացմանը: Այսօր երկու երկրների միջև եղբայրական հարաբերություններն աննախադեպ բարձր մակարդակում են։ Հետևողականորեն զարգանում է համագործակցությունը գրեթե բոլոր ոլորտներում, այդ թվում՝ ռազմավարական", - ասել է Վահան Կոստանյանը։ Նա հիշեցրել է վերջերս Հայաստանի մայրաքաղաքում անցկացված "Երեւանյան օրերին" Ֆրանսիայի Եվրոպայի եւ արտաքին գործերի նախարար Ժան-Նոել Բարոյի մասնակցության մասին, որը հայտարարել է Հայաստանում ակտիվ ներդրումներ սկսելու ֆրանսիական բիզնեսի մտադրության մասին:

Խոսելով առկա աշխարհաքաղաքական գործընթացների մասին, որոնք ուղեկցվում են բազմաթիվ մարտահրավերներով, փոխնախարարը նշել է, որ Հայաստանը վճռական է տարածաշրջանում երկարաժամկետ խաղաղության եւ անվտանգության հաստատման հարցում, նկատի ունենալով Հարավային Կովկասի պետությունների տարածքային ամբողջականության, ինքնիշխանության եւ սահմանների անխախտելիության սկզբունքները, որոնք Հայաստանն ու Ադրբեջանը ստանձնել են 1991թ. Ալմա-Աթայի հռչակագրին համապատասխան: "Մենք տրամադրված ենք Ադրբեջանի հետ հարաբերությունների կարգավորման։ Ինչպես հայտնի է, երկու պետությունները համաձայնության են եկել խաղաղության պայմանագրի տեքստի շուրջ։ Հայաստանը պատրաստ է անհապաղ ստորագրել այդ փաստաթուղթը և հետագայում վավերացնել այն։ Կարող ենք վստահեցնել, որ մնացած հարցերի և կասկածների կարգավորման միակ հնարավորությունը պետք է լինի խաղաղության պայմանագրի ստորագրումը:  Մեր նպատակն է ձևավորել անվտանգ և խաղաղ տարածաշրջան, որտեղ հակամարտությունները կփոխարինվեն համագործակցությամբ, փակ սահմանների փոխարեն կհայտնվեն բաց դարպասներ, իսկ տարաբնույթ սպառնալիքների փոխարեն կսկսեն զարգանալ միջպետական հարաբերությունները: Այդ նպատակների իրագործման համար ՀՀ կառավարությունը նախաձեռնել է "Խաղաղության խաչմերուկ" նախագիծը, որը խնդիր է դնում զարգացնել հաղորդակցությունները Հայաստանի բոլոր մերձավոր հարևանների հետ: Այս համատեքստում Երևանը գնահատում է տարածաշրջանում տևական խաղաղության և կայունության հաստատմանն ուղղված Փարիզի ջանքերը", - ասել է ՀՀ ԱԳ նախարարի տեղակալը։