Արմեն Գրիգորյան. Հայաստանը պատրաստ է ստորագրել ԵԱՀԿ Մինսկի խմբի լուծարման մասին դիմումը՝ նույն օրը, երբ ստորագրվի խաղաղության պայմանագիրը

Արմինֆո.  Հայաստանը պատրաստ է ստորագրել ԵԱՀԿ Մինսկի խմբի լուծարման մասին դիմումը՝ այն նույն օրը, երբ ստորագրվի Ադրբեջանի հետ խաղաղության պայմանագիրը: Այդ մասին մայիսի 29-ին հայտարարել է Հայաստանի անվտանգության խորհրդի քարտուղար Արմեն Գրիգորյանը՝ պատասխանելով խաղաղության պայմանագրի ստորագրման վերաբերյալ Ադրբեջանի դիրքորոշման մասին հարցին։

Անդրադառնալով ՀՀ սահմանադրության փոփոխությանը, որը նույնպես ԵԱՀԿ Մինսկի խմբի լուծարման հետ մեկտեղ ադրբեջանական կողմի պահանջն է՝ խաղաղություն կնքելու համար, նա, չմանրամասնելով, միայն նշել է, որ Հայաստանի դիրքորոշումը բոլորին է հայտնի:

Ընդ որում, Գրիգորյանը հիշեցրել է, որ խաղաղության պայմանագրի տեքստը հասցվել է ավարտին, մնում է միայն ստորագրել։ Այդ առնչությամբ ԱԽ քարտուղարը նշել է, որ դիվանագիտական խողովակներով խորհրդատվություններ են ընթանում ադրբեջանական կողմի հետ՝ այդ հարցն առաջ մղելու համար։

 Հիշեցնենք, որ մայիսի սկզբին ՀՀ արդարադատության նախարար Սրբուհի Գալյանը նշել էր, թե միանգամայն հնարավոր է, որ Հայաստանի նոր սահմանադրության տեքստը պատրաստ լինի 10 ամսից: Ընդ որում,  նա ընդգծել էր, որ խորհրդի նիստերում ՀՀ սահմանադրությունից Անկախության հռչակագրին վերաբերող դրույթները հանելու հարցը չի քննարկվում:

Նշենք, որ Հայաստանի սահմանադրության փոփոխության վերաբերյալ ադրբեջանական կողմի պահանջները վերաբերում են հենց Հայաստանի անկախության հռչակագրին, որում, նրանց կարծիքով, տարածքային պահանջներ կան Ադրբեջանի նկատմամբ:

Հավելենք, որ Հայաստանի գործող սահմանադրության նախաբանում ասվում է, որ դրա հիմքում ընկած է Հայաստանի անկախության մասին հռչակագիրը, որն ընդունվել է 1990թ. օգոստոսի 23-ին, այդ թվում՝ "հիմնվելով Հայկական ԽՍՀ Գերագույն խորհրդի եւ Լեռնային Ղարաբաղի Ազգային խորհրդի 1989թ. դեկտեմբերի 1-ի "Հայկական ԽՍՀ-ի եւ Լեռնային Ղարաբաղի վերամիավորման մասին" համատեղ որոշման վրա": Այնտեղ նաեւ նշվում է, որ Հայաստանի Հանրապետությունը հանդես է գալիս Օսմանյան Թուրքիայում և Արևմտյան Հայաստանում 1915 թվականի Հայոց ցեղասպանության միջազգային ճանաչման օգտին:

Մինչդեռ, այս տարվա ապրիլին Հայաստանի վարչապետ Նիկոլ Փաշինյանը նշել էր, թե համոզված է, որ երկրի նոր սահմանադրությունում չպետք է լինի հղում Հայաստանի անկախության հռչակագրին: «Ես կարող եմ ասել, որ, իմ կարծիքով, նոր սահմանադրության տեքստում չպետք է հղում լինի Անկախության հռչակագրին ։ Բայց պետք է որոշի Հայաստանի Հանրապետության ժողովուրդը։ Իհարկե, "կողմ" և "դեմ" փաստարկները պետք է ներկայացնեն քաղաքական ուժերն ու նրանց առաջնորդները։ Սա է իմ քաղաքական դիրքորոշումը», - հայտարարել էր կառավարության ղեկավարը։