Փրկարարները Մարմարիկ գետում հայտնաբերել են մայիսի 4-ից որոնվող երեխայի դին

Արմինֆո.  Մայիսի 24-ին, ժամը 10:52-ի սահմաններում Ճգնաժամային կառավարման ազգային կենտրոն տեղեկություն է ստացվել, որ որոնողական աշխատանքներ իրականացնող փրկարարները ժամը 10։40-ին Մարմարիկ գետում՝ «Հրազդան ՋԷԿ»-ի մոտակա կամրջի մոտ, հայտնաբերել են մայիսի 4-ից որոնվող երեխայի դին։ Ինչպես հաղորդում է Հայաստանի ՆԳՆ Փրկարար ծառայությունը, ժամը 11։11-ին փրկարարները գետից դուրս են բերել Տ․ Պ․-ի (ծնված 2023 թ․) դին։

Աղբյուրը հիշեցնում է, որ մայիսի 4-ին, ժամը 11։47-ին Կոտայքի մարզային փրկարարական վարչության ճգնաժամային կառավարման կենտրոն ահազանգ էր ստացվել, որ Մարմարիկ գյուղի 3-րդ փողոցի տներից մեկի բակից 2 տարեկան երեխան կորել է (տան մոտակայքով հոսում է Մարմարիկ գետը). անհրաժեշտ է փրկարարների օգնությունը: «Մայիսի 4-24-ը որոնողական աշխատանքներին ներգրավված են եղել, ընդհանուր առմամբ, 1591 փրկարարական ծառայող և ոստիկանության շուրջ 800 ծառայող», - նշվում է ՓԾ հաղորդագրությունում։