Փաստաբաններ Ջեֆրի Ռոբերտսոն և Ամալ Քլունի. ՄԻԵԴ որոշումը «Հաղթանակ է Հայաստանի համար»

 «Փերինչեքն ընդդեմ Շվեյցարիայի» գործում որպես երրորդ կողմ Հայաստանը ներկայացնող փաստաբաններ Ջեֆրի Ռոբերտսոնն ու Ամալ Քլունին կարծում են, որ Մարդու իրավունքների եվրոպական դատարանի վերջին որոշումը «հաղթանակ է Հայաստանի համար»:

Փաստաբանների տարածած համատեղ հայտարարության մեջ նշվում է, որ իրենք գոհ են այն փաստի առնչությամբ, որ Հայաստանի կառավարության անունից ներկայացված փաստարկներն աջակցություն են գտել: Փաստաբանների կարծիքով, Հայաստանը գործին միջամտել է միայն մեկ պատճառով. ստորին ատյանի դատարանը կասկածի տակ էր դրել փաստը, որ 1915 թվականին հայ ժողովրդի նկատմամբ ցեղասպանություն է իրագործվել: «Որպես փաստաբան՝ մենք ձգտում էինք ուղղել այդ լուրջ սխալը, եւ Գերագույն պալատն արեց դա: Այսօրվա դատը չի վիճարկում հայոց ցեղասպանության փաստը. տասը դատավորներն ասացին, որ հարցն ընդհանրապես չի դիտարկվելու, իսկ յոթ դատավորներ էլ հայտարարեցին, որ Հայոց ցեղասպանությունը հստակ պատմական փաստ է», - ասված է հայտարարությունում: Բացի այդ, ինչպես նշել են փաստաբանները, այդ որոշումը սատարում է սեփական արժանապատվությունը պաշտպանելու հայերի իրավունքը:

Ինչպես նշվում է փաստաբանների հայտարարությունում, դատարանի վերջին որոշումը, որը պնդում է կարծիք արտահայտելու ազատության կարեւորությունը, լուրջ հետեւանքներ ունի Թուրքիայի համար, որը խոսքի ազատության տեսանկյունից վատթարագույն վարկանիշն ունի ՄԻԵԴ-ի բոլոր երկրների շրջանում: Թուրքիան այլեւս չի կարողանա արդարացնել դատական հետապնդումներն այնպիսի անձանց նկատմամբ, ինչպիսին էր Հրանտ Դիքը, որոնց մեղադրում է «թուրք ժողովրդին վիրավորելու մեջ»:

«Մենք Թուրքիային կոչ ենք անում չեղյալ հայտարարել 301 հոդվածը եւ դադարեցնել հետապնդումները»,- հայտարարել են փաստաբանները: Ռոբերտսոնն ու Քլունին նշել են, որ դատարանը մերժել է 120 հազար եվրոյի չափով փոխհատուցման մասին Փերինչեքի պահանջը, նրա դատական ծախսերը ևս ոչ ոք չի վճարի:

Հիշեցնենք, որ 2005 թվականին Թուրքիայի աշխատավորական կուսակցության առաջնորդ Դողու Փերինչեքը Շվեյցարիայի տարբեր քաղաքներում միջազգային խորհրդաժողովներում իր ելույթների ժամանակ բազմիցս հայտարարել էր, թե 1915 թվականի Հայոց ցեղասպանությունը «միջազգային հերյուրանք է»: Շուտով շվեյցարահայկական իրավապաշտպան ասոցիացիան նրա դեմ հայց էր ներկայացրել: Արդյունքում` Լոզանի դատարանը 2007 թվականին Թուրքիայի աշխատավորական կուսակցության առաջնորդին մեղավոր էր ճանաչել ռասայական խտրականության համար: Այդպիսի հետևության էին հանգել նաև բարձրագույն ատյանի դատարանները: Փերինչեքը դատավճիռը բողոքարկել էր ՄԻԵԴ-ում, որը 2013 թվականի դեկտեմբերի 17-ին որոշում էր կայացրել թուրք գործչի օգտին: 2014 թվականի մարտի 7-ին Շվեյցարիայի կառավարությունը ՄԻԵԴ դատավճիռը բողոքարկելու որոշում էր կայացրել: Դատական նիստնը կայացել էր 2015 թվականի հունվարին: Դատարանում Հայաստանը ներկայացնում էին հոլիվուդյան աստղ Ջորջ Քլունիի տիկինը` Ամալ Քլունին, և Ջեֆրի ՌՖոբերտսոնը: 2015 թվականի հոկտմբերի 15-ին ՄԻԵԴ-ը հրապարակել է  Փերինչեքի գործով դատավճիռը, որի համաձայն, Շվեյցարիան խախտել է թուրք գործչի ազատ կարծիք արտահայտվելու իրավունքը: «Ժողովրդավարական հասարակությունում հայ հնարության շահերը պաշտպանելու համար Փերինչեքին քրեական պատասխանատվության ենթարկելու անհրաժեշտություն չէր լինի», - ասվում է որոշման մեջ: «Անհերքելի է, որ Փերինչեքի դատապարտումն ու պատիժը, ինչպես նաև Շվեյցարիայի հայ համայնքին փոխհատուցում վճարելու որոշումը խախտել է նրա ազատ կարծիք արտահայտելու իրավունքը», - ասվում է դատարանի որոշման մեջ»: Դատավճիռը  վերջնական է և վերանայման ենթակա չէ: