ՀԷՑ-ը նոր գլխավոր տնօրեն ունի

«Հայաստանի էլեկտրական ցանցեր» ՓԲԸ նոր գլխավոր տնօրեն ունի: Այդ պաշտոնում նշանակվել է Կարեն Հարությունյանը: Այդ  մասին ԱրմԻնֆո-ին հաղորդեց ՀԷՑ մամուլի քարտուղար Նատալյա Սարջանյանը: Նրա ասելով, 2011 թվականից ՀԷՑ գլխավոր տնօրենի պաշտոնն զբաղեցնող Եվգենի Բիբինն այսօր հանձնել է իր լիազորությունները: Նոր գլխավոր տնօրենին ներկայացրել է «Տաշիր» ընկերությունների խմբի նախագահ Սամվել Կարապետյանը: Կարեն Հարությունյանն ավելի վաղ աշխատել է ՀԷՑ ղեկավար կառույցներում:

Հիշեցնենք, որ ՀՀ հանրային ծառայությունները կարգավորող հանձնաժողովը հոկտեմբերի 1-ին համաձայնություն է տվել ՀԷՑ բաժնետոմսերի 100%-ը «Լիորմանդ Հոլդինգ Լիմիթիդ» ընկերությանը վաճառքի գործարքին: Սեպտեմբերի 30-ին «Տաշիր» ընկերությունների խումբը և «Ինտեռ ՌԱՕ» ընկերությունը համաձայնագիր են ստորագրել՝ Հայաստանի Հանրապետությունում էլեկտրաէներգետիկ ակտիվների առքուվաճառքի վերաբերյալ։ Կողմերը նաև պայմանավորվել են, որ «Հայաստանի էլեկտրական ցանցեր» ՓԲԸ-ն և «Հրազդանի ՋԷԿ» ԲԲԸ-ն շարունակելու են ամբողջ ծավալով կատարել իրենց կողմից նախկինում ստանձնած պարտավորությունները։ «Տաշիր» ընկերությունների խումբն ամբողջությամբ իր վրա է վերցնում ՀԷՑ-ի կառավարման գծով պարտականությունները։ Զարգացման հետագա պլանների մեջ է մտնում հակաճգնաժամային ծրագրի ներդրումը՝ ընկերության ֆինանսական գործունեության օպտիմալացման և «Հայաստանի էլեկտրական ցանցեր» ՓԲԸ-ի ֆինանսա-տնտեսական վերահսկողությունն ուժեղացնելու նպատակով։ Նախատեսվում է իրականացնել նաև բաշխիչ ցանցերի սարքավորումների փուլային արդիականացում։ Հայաստանի Հանրապետության բնակչությանն աջակցելու նպատակով որոշում է ընդունվել հաջորդ տարվա ընթացքում սեփական միջոցների հաշվին՝ ՀՀ կառավարության հետ պարիտետային սկզբունքով, փոխհատուցել բարձրացած և մինչև 2015թ. օգոստոսի 1-ը գործող սակագնի տարբերությունը՝ բնակչության և փոքր բիզնեսի համար։ ՀՀ Հանրային ծառայությունները կարգավորող հանձնաժողովը հունիսի 17-ին ընդունել էր էլեկտրաէներգիայի գները զգալիորեն բարձրացնելու մասին որոշում: Հունիսի 19-ին սկսվեցին բողոքի լայնամասշտաբ ակցիաները: Դրանից հետո երկրի նախագահ Սերժ Սարգսյանը հայտարարեց, որ «Հայաստանի էլցանցեր» ՓԲԸ-ում կանցկացվի միջազգային աուդիտ, իսկ մինչև դրա ավարտը կառավարոթյունն իր վրա կվերցնի էլեկտրաէներգիայի «սակագների բարձրացման բեռը»: Դրանից հետո Ինտեր ՌԱՕ ընկերությունն սկսեց իր ակտիվները վաճառելու համար փնտրել գնորդի: